गुल्मी- गुल्मीको इस्मा गाउँपालिका गएको पहिरोमा परी घाइते भएका ५ जनाको हेलिकोप्टरमार्फ्त उद्धार गरिएको छ। पहिरोमा परी घाइते भएका इस्मा गाउँपालिका -१ हस्तिचौरका ५ जनालाई नेपाली सेनाको हेलिकोप्टरमार्फत् उपचारका लागि काठमाडौं ल्याइएको हो।
पहिरोमा परी घाइते भएका स्थानीय २७ वर्षीया महिला ईश्वरी खत्री, उनका ससुरा ६४ वर्षीय टिका खत्री, २५ वर्षीय बसन्त खत्री, २१ वर्षीया सिर्जना सारु र ९० वर्षीया पुतली खत्रीलाई उद्धार गरिएको हो। लाई शुक्रबार साँझ ५ बजे उद्धार गरिएको हो।
घटनास्थलबाट स्ट्रेचरमा बोकेर उद्धार गर्न नसकिने र सडकसमेत अवरुद्ध भएकाले हेलिकोप्टरबाट उद्धार गरिएको हो। पहिरोमा पुरिएकी २७ वर्षीया ईश्वरीको अवस्था गम्भीर छ।
पहिरोमा परी स्थानीय बसन्त सारुका १६ महिनाका छोरा सिजन सारु र रिखबहादुर खत्रीकी ८ वर्षीया छोरी अपेक्षा खत्रीको मृत्यु भएको थियो।
पहिरोमा परी घाइते घाइतेमध्ये ईश्वराको उपचार शिक्षण अस्पताल महाराजगञ्ज र अन्यको उपचार सैनिक अस्पताल छाउनीमा हुने व्यवस्था मिलाइएको छ। पहिरोका कारण उक्त क्षेत्रमा बसोबास गर्ने करिब १६० घर परिवार प्रभावित भएका छन्। पहिरोमा परेर प्रभावित भएका परिवारलाई टेन्ट र खाद्यान्न समेत वितरण गरिएको थियो।
घाइतेहरूको उद्धारका लागि पूर्वमन्त्रीसमेत रहेका नेकपाका सांसद् गोकर्ण विष्ट घटनास्थल पुगेका थिए। उनकै पहलमा सेनाको हेलिकोप्टरमार्फत् घाइतेहरूलाई काठमाडौं ल्याउनुका साथै पीडितलाई राहत वितरण गरिएको हो। विष्ट गुल्मी-२ बाट प्रत्यक्ष निर्वाचित प्रतिनिधिसभा सांसद् हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
