काठमाडौं- फट्यांग्रा जातको किरा सलह नेपाल प्रवेश गरेको छ। भारतसँग सीमाना जोडिएका मध्यतराईका बारा, पर्सा र सर्लाहीलगायत जिल्लामा सलह किराको प्रकोप देखिएको कृषि तथा पशुपन्छी विकास मन्त्रालयले जनाएको छ।
बारा जिल्लामा निजगढ नगरपालिकाको केही वडामा सलह किराको फौजको फैलावट देखिएको निजगढ नगरपालिका-१३ का वडाध्यक्ष सूर्य घलानले नेपाल लाइभ लाइभलाई बताए। घलानका अनुसार सलहका दर्जनौं झुण्डले बालीनालीमा आक्रमण गरेका छन्। सलहले बालीनाली मात्र नभई सबै खालका हरिया बोटबिरुवाका पात र डाँठ खाएर नष्ट पार्न थालेको उनले बताए।
घलानसँग नेपाल लाइभले गरेको टेलिफोन कुराकानीको संपादित अंशः
सलह किरा हिजोसम्म आइसकेको थिएन। आज बिहान मात्रै देखिएको हो। बिहान झिसमिसेमै गाउँका एकजना भाइले फोन गरेर नयाँ किरा आएको बताएपछि मैले थाहा पाएको हुँ।
झट्ट हेर्दा फट्यांङ्राजस्तै देखिएपनि यो किरा फट्यांङ्राभन्दा फरक रहेछ। यसको फट्याङ्राको भन्दा लामो पखेटा छ र रंग पनि फरक (रातो) छ। यसले पाकिसकेको र पहेलो भएको बालीलाई भन्दा हरियो बालीनाली र बोट बिरुवाको पात पनि खाने रहेछ। मान्छे भएको र चहल पहल भएको ठाउँमा नबस्ने र लखेट्यो भने भागेर अर्को ठाउँमा गएर बस्ने रहेछ। तर सुनसान ठाउँमा भने यसको बढी प्रकोप रहेको देखियो। सलक किरा बसेको नजिकै जाँदा त्यसले पात खाएको आवाज पनि सुनिन्छ।
यो किराको प्रकोप वडा नम्बर १३ को सबैठाउँमा देखियो। साविकका रोशनीपुरी गाविसलगायत आसपासका क्षेत्रमा पनि यसको फैलावट देखिएको छ। निजगढ नगरपालिका वडा नम्बर ५,६,७,८ र ९ मा पनि फैलिसकेको छ। साबिक वडा नम्बर १, २ र ३ मा भने फैलिसकेको बारे खबर आएको छैन। प्रस्तावित निजगढ अन्तर्राष्ट्रिय विमानस्थल रहेको क्षेत्रमा पनि देखिएको छ।
मैले थाहा पाउने बित्तिकै नगरप्रमुख, कृषि शाखा प्रमुख, भेटनरीलगायत व्यक्तिहरुलाई खबर गरे। प्रदेशबाट अनुगमन टोली यहाँ आउँदैछ भनेर मलाई फोनमार्फत् जानकारी आएको थियो। तर अहिलेसम्म आइपुगेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778245878.png)
-1764146706.png)
