अन्य

पुरस्कार रकम दिन सुदूरपश्चिम प्रदेश सरकारले माग्यो खेलाडीको विवरण

शेरबहादुर ऐर शुक्रबार, असार १२, २०७७ ०७:५३

कैलाली–कोरोना महामारीका कारण कार्यक्रम गर्न सम्भव नभएपछि सुदूरपश्चिम प्रदेश सरकारले दक्षिण एसियाली खेलकुद प्रतियोगिताका पदक विजेतालाई पुरस्कार रकम दिन बैंक खाताको विवरण मागेको छ।

सामाजिक विकास मन्त्रालयले सूचना जारी गर्दै खेलाडीलाई नगदसहित सम्मान गर्नका लागि विवरण माग गरेको हो।

मंसीर १५ गतेदेखि २४ गतेगतेसम्म नेपालमा भएको दक्षिण एसियाली खेलकुद प्रतियोगिता ९साग० का पदक विजेता सुदूरपश्चिम प्रदेशका खेलाडीहरुलाई प्रदेश सरकारले नगदसहित सम्मान गर्ने निर्णय गरेको थियो। पुस १ को मन्त्रिपरिषद् बैठकले सुदूरपश्चिमका साग विजेता खेलाडीलाई नगदसहित सम्मान गर्ने निर्णय गरेको थियो। हाल कोभिड महामारीका कारण कार्यक्रम गरी पुरस्कार रकम दिन नसकिने भएकाले सिधैं खेलाडीको बैंक खातामा रकम पठाउन विवरण माग गरेको सामाजिक विकास मन्त्रालयले जनाएको छ।

मन्त्रालयको सूचनामा खेलाडीको नाममा रहेको बैंक खाता र खाता नम्बर, नागरिकताको प्रमाणपत्रको प्रतिलिपी सो नभएमा स्थानीय तहको स्थायी बसोबासको व्यहोरा उल्लेख भएको सिफारिसपत्र, वैवाहिक कारणबाट प्रदेशको प्रतिनिधित्व गर्ने महिला खेलाडीको हकमा विवाह दर्ताको प्रमाणपत्रको प्रतिलिपी र खेलाडीको पदक प्राप्त गरेको प्रमाणपत्रको प्रतिलिपी, सम्पर्कनम्बर सहितको विवरण सामाजिक विकास मन्त्रालयले माग गरेको छ । असार २० गतेभित्र विवरण पेस गर्न समयसीमा दिइएको छ।