माथिल्लो तामाकोशी भदौभित्रै, बुढी गण्डकीको मुआब्जा वितरण ८० प्रतिशत सकियो: ऊर्जामन्त्री पुन

पूर्वाधार

नेपाल लाइभ मंगलबार, जेठ २७, २०७७ १३:३८

काठमाडौं- ऊर्जा, जलश्रोत तथा सिंचाई मन्त्री वर्षमान पुनले आगामी आर्थिक वर्षको सुरुवात अर्थात् भदौ महिनाभित्रै ४ सय ५६ मेगावाट क्षमताको माथिल्लो तामाकोशी जलविद्युत आयोजना राष्ट्रिय प्रसारण लाइनमा जोडिसक्ने बताएका छन्।

विनियोजन विधेयक २०७७ माथि उठेका प्रश्नहरुको संसदमा जवाफ दिने क्रममा मन्त्री पुनले माथिल्लो तामाकोशी जलविद्युत आयोजना चालु आर्थिक वर्षभित्रै सम्पन्न गरिसक्ने लक्ष्य राखिएको भएपनि कोभिड-१९ महामारीका कारण उत्पादन सुरु गर्ने मिति २ महिना पर धकेलिएको बताएका हुन्।

त्यस्तै १२ सय मेगावाट उत्पादन क्षमताको बुढीगण्डकी जलासययुक्त जलविद्युत आयोजनाको ८० प्रतिशत मुआब्जा वितरण सम्पन्न भइसकेको र आगामी आर्थिक वर्षभित्र मुआब्जा वितरणको सबै काम सकिसक्ने मन्त्री पुनको भनाइ छ। मुआब्जा वितरणको काम सकिएसँगै लगानी र आयोजना विकास मोडालिटी तयार पारी आगामि आर्थिक वर्षबाटै निर्माणको काम पनि सुरु गरिसक्ने उनले बताए।

आगामी आर्थिक वर्षका लागि एक प्रदेश १ मेगा प्रोजेक्टको अवधारणाअनुसार हरेक प्रदेशमा ठूला आयोजना निर्माणको कामलाई गति दिने पनि उनले संसदमा बताएका छन्। दूधकोशी, माथिल्लो अरुण, तामाकोशी ५, नौमुरे, नलगाड, जगदुल्ला, बेतन कर्णाली, फुकोट कर्णाली र चैनपुर सेती जलविद्युत आयोजना यही अवधारणाअनुरुप अगाडि बढाउन लागिएको उनको भनाइ छ।

ऊर्जा, जलश्रोत तथा सिंचाई मन्त्रालयले आगामि आर्थिक वर्षका लागि कुल ९९ अर्ब २९ करोड ४८ लाख रुपैयाँ बराबर बजेट पाएको छ। जसमध्ये ऊर्जा क्षेत्रका लागि ७२ अर्ब ६० करोड ३ लाख रुपैयाँ र जलश्रोत तथा सिंचाइतर्फ २६ अर्ब ६९ करोड ४५ लाख रुपैयाँ बराबर छुट्याइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

चिठी आदानप्रदान हुन छाडेपछि गोरखाका २१ अतिरिक्त हुलाक कार्यालय बन्द

भीमफेदी डढेलोमा जलेर एक जनाको मृत्यु

हैदराबादविरुद्ध कोलकाताको बलियो योगफल