काठमाडौं- स्वास्थ्य तथा जनसंख्या मन्त्री भानुभक्त ढकालले आरडिटी परीक्षण नरोक्ने स्पष्टीकरण दिएका छन्। प्रतिनिधिसभाको सोमबारको बैठकमा मन्त्रालयगत विनियोजित कार्यक्रम र बजेटमाथि सांसदहरुले राखेको प्रश्नको उत्तर दिँदै मन्त्री ढकालले कोरोना परीक्षणका लागि आरडिटीलाई विश्व स्वास्थ्य संगठनले रोक नलगाएको भन्दै यसको परीक्षण नरोक्ने स्पष्ट पारेका हुन्।
सरकारले संक्रमित भएको भए उसको शरीरमा भाइरससँग लड्न सक्ने एन्टीबडी प्राप्त भए/नभएको अध्ययन गर्नका लागि आरडिटी परीक्षणलाई पनि निरन्तरता दिएको उनको भनाइ थियो। 'विश्व स्वास्थ्य संगठनले अध्ययन अनुसन्धानको निम्ति यसलाई प्रतिबन्ध लगाएको छैन। संक्रमितको शरीरमा त्यो रोगसँग लड्ने एन्टिबडी प्राप्त भएको छ कि छैन भन्ने अध्ययनका निम्ति हामीले आरडिटीको प्रयोग गरेका छौं,' उनको भनाइ थियो।
कसैले भन्दैमा सरकारले आरडिटीबाट परीक्षण गर्न नछोड्ने उनको आशय थियो। विभिन्न अनुसन्धानले समेत आरडिटी विश्वसनीय नभएको देखाइरहेका बेला मन्त्रालय भने ती प्रतिवेदन लुकाएर कमिसनको चक्करमा आरडिटी किट किनेर राज्यकोषको दुरुपयोगमा लागेको भन्दै आलोचना भइरहेको छ।
बैठकमा बोल्दै मन्त्री ढकालले कोरोना नियन्त्रणका लागि संघ, प्रदेश र स्थानीय सरकारबाट भएको खर्चको विवरण प्रस्तुत गरेका थिए। उनले कोरोना नियन्त्रणमा सरकारले १० अर्बभन्दा बढी रकम खर्च गरिसकेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
