काठमाडौं- उद्योग, वाणिज्य तथा आपूर्ति मन्त्री लेखराज भट्टले चाँडै बालाजु र भक्तपुर औद्योगिक क्षेत्रका उद्योग कारखानाहरु स्थानान्तरण हुने बताएका छन्। प्रतिनिधि सभा सांसद प्रेम सुवालले विनियोजन विधेयकमाथि स्पष्टीकरण मागसहित काठमाडौं उपत्यकाका औद्योगिक कारखाना कहिले स्थानान्तरण हुन्छ भन्ने प्रश्नको जवाफ दिँदै मन्त्री भट्टले सरकारले आवश्यक अध्ययन गरिरहेको र चाँडै स्थानान्तरणको टुंगो लगाइने बताएका हुन्।
‘विशेषगरी ललितपुरको पाटन औद्योगिक क्षेत्रमा हस्तकलाका सामग्रीमात्र उत्पादन हुने भएकाले स्थानान्तरण गर्नु आवश्यक नरहेपनि भक्तपुर औद्योगिक क्षेत्र र बालाजु औद्योगिक क्षेत्रलाई स्थानान्तरण गर्ने विषयमा मन्त्रालयले अध्ययन गरिरहेको छ।’ उनले भने‚ ‘हामी अध्ययन गरिरहेका छौं। समय आएपछि हामी स्थानान्तरण गर्छौं।’
उपत्यकाको अवस्थालाई हेरेर यहाँ संचालित उद्योगधन्दालाई बाहिर स्थानान्तरण गर्ने सरकारको नीति रहेको उनको भनाइ छ। ‘मैले काठमाडौं पढ्न आउँदा काठमाडौं उपत्यकामा संचालित उद्योग कारखाना वरपर मानवबस्ती थिएन। औद्योगिक क्षेत्र स्थापना भइसकेपछि मात्र त्यहाँ मानव बस्ती बसेको हो। मलाई लाग्छ जहाँ उद्योगधन्दा खोलिन्छन् त्यहाँ मानवबस्ती बस्ने यो सार्क मुलुककै विशेषता हो’ मन्त्री भट्टले भने।
सरकारी र निजी दुवै क्षेत्रबाट संचालित भएर रुग्ण बनेका उद्योगहरूबारे अध्ययन गरी त्यस्ता उद्योग फेरि संचालनमा गुरुयोजना बन्ने क्रममा रहेको पनि उनले बताए। ‘सार्वजनिक–निजी अवधारणामा कसरी जाने र नेपाल सरकार आफ्नो व्यवस्थापन कस्तो हुने भन्ने निर्क्यौल गरेर वीरगंज चिनी कारखाना, निजी क्षेत्रलाई दिइसकेको लुम्बिनी चिनी कारखाना र कृषि सामग्री संस्थानअन्तर्गतका कारखानाहरू फेरि संचालनमा ल्याउन सरकारले तयारी गरिरहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770196062.png)
-1764146706.png)
