फाइल तस्बिर
काठमाडौँ- सत्तारुढ दल नेपाल कम्युनिस्ट पार्टी (नेकपा)ले मिलेनियम च्यालेन्ज कर्पोरेसन(एमसिसी)का विषयमा छलफल गर्न सोमबार सचिवालय बैठक बोलाएको छ। संसदबाट एमसिसी पारित गर्ने वा नगर्ने भन्ने विषयमा नेकपा सोमबार ४ बजे सचिवालय बैठक बोलाएको प्रवक्ता नारायणकाजी श्रेष्ठले बताए।
‘सोमबार बस्ने सचिवालय बैठकका लागि एजेन्डा तय भएको छैन। सम्भवःएमसिसीका विषयमा छलफल हुन सक्छ,’ श्रेष्ठले भने। एमसिसी अन्तर्गतको बजेट ५५ अर्ब नेकपाभित्र विवाद हुँदा अझै निश्चित हुन सकेको छैन। नेकपा नेताहरूले यति ठूलो राष्ट्रको महत्व बोकेको विषयलाई फेरि स्थायी कमिटी बैठकमा लगेर निर्णय गर्नुपर्ने माग राखेका छन्।
गत मंसिर २९ गते स्थायी कमिटी बैठकमा एमसिसी संसदबाट पारित गर्ने विषयमा विवाद भएको थियो। स्थायी कमिटीमा विवाद भएपछि माघ १५ देखि १९ गतेदेखि केन्द्रीय बैठकमा छलफल भएको थियो।
केन्द्रीय कमिटी बैठकले माघ २० मा पूर्वप्रधानमन्त्री झलनाथ खनालको नेतृत्वमा भीम रावल र प्रदीपकुमार ज्ञवाली रहेको अध्ययन कार्यदल बनाएको थियो।कार्यदलले एमसिसीमा भएका केही प्रावधान संशोधन गरेर मात्रै संसदबाट पारित गर्नु पर्ने भन्दै २० फागुनमा अध्यक्ष केपी ओली र प्रचण्डलाई प्रतिवेदन बुझाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
