काठमाडौं- सम्पूर्ण आर्थिक कारोबार बन्द रहेको विषम परिस्थिति र लकडाउन कायमै रहेका बेला कर चुक्ता गर्न सूचना निकाल्नु सरकारको गैरजिम्मेवारको पराकाष्टा भएको कांग्रेसले जनाएको छ।
कांग्रेस प्रमुख सचेतक बालकृष्ण खाँणले विज्ञप्तिमार्फत सरकारको सूचनाको विरोध गरेका छन्। ‘असहज परिस्थितिमा लकडाउनको सयम भित्रै तत्काल कर बुझाउने सूचना जारी गर्नु अस्वभाविक, अप्राकृतिक, अव्यावहारिक र गैरजिम्मेवारपनको पराकाष्टा हो,' विज्ञप्तिमा भनिएको छ।
लकडाउनका कारण सबै क्षेत्र बन्द रहेको अवस्थामा सरकारको सूचना जारी हुनु दुखद भएको कांग्रेसले उल्लेख गरेको छ। बन्द भएका सानादेखि ठूला उद्योगधन्दाका साथै श्रमिकवर्ग र कृषकहरुका लागि सरकारले विशेष राहत प्याकेज व्यवस्था गर्नुपर्नेमा सरकारले करको ताकेता गरेकोप्रति कांग्रेसले आपत्ति जनाएको छ।
करका लागि ताकेता गर्नुलाई कांग्रेसले नागरिकप्रति सरकार उदासीन रहेको निष्कर्ष निकालेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
