काठमाडौं- नेपाली कांग्रेसका सांसद गगन थापाले उच्च जातीय अहंकारमा रुकुम पश्चिम सोतीको घटनालाई ढाकछोप गर्न संगठित प्रयत्न भएको आशंका गरेका छन्।
प्रतिनिधि सभामा बोल्ने क्रममा थापाले राज्यको लाचारीलाई संसदले टुलुटुलु हेर्ने हो भने लाज समेत सांसदहरुसँग लजाउने बताए। अमानवीय क्रुर घटनालाई भवितव्यका रुपमा देखाउन सहायक कारणहरु अघि सारेको उनको आशंका थियो।
‘संविधानमा स्वतन्त्रता, समानता,आत्मसम्मानपूर्वक बाँच्न पाउने अधिकार, छुवाछुत विरुद्धको हकदेखि दलितको हकसम्म लेख्यौं,’ उनले भने, ‘संविधानमा लेखिएको व्यवस्थालाई गर्व गरिरहँदा रुकुम पश्चिम सोतीको नरसंहारले हामी सबैको अनुहारमा कालो पोतिएको छ।अनुहारको दाग ऐना पुछेर जाँदैन।’
लकडाउनको अवधिमा जातीयताकै कारण ३२ जनाभन्दा बढीले ज्यान गुमाएको तथ्यांक उनले संसदमा प्रस्तुत गरे। लकडाउनको अवधिमा दलित समुदायका नागरिककोे हत्या, आत्महत्या, बलात्कारबाट ज्यान गएको उनले बताए।
रुकुम पश्चिमको घटनाको छानविन गर्न सर्वदलीय संसदीय छानविन समिति गठन गर्न माग गर्दै उनले भने, ‘सदनले सर्वपक्षीय संसदीय समिति नबनाएसम्म न्यायको पक्षमा बोलिरहने छौं। संसदीय समितिको माग गरिरहने छौं।’
जेठ १० मा रुकुम पश्चिमको सोतीमा भएको घटनामा परी पाँच जनाको ज्यान गएको थियो भने एक जना बेपत्ता छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
