काठमाडौं- गृहमन्त्री रामबहादुर थापा बादलले पश्चिम रुकुममा भएको घटनामा जोसुकै संलग्न भएको भए पनि कारबाही हुने बताएका छन्। राष्ट्रिय सभाको बैठकमा विशेष समय लिएर सांसदहरुले उठाएको प्रश्नहरुको जवाफ दिँदै उनले कानुनले वडाध्यक्ष र अन्य जोसुकै भए पनि कारबाही हुने प्रतिबद्धता व्यक्त गरे।
‘वडाध्यक्षको संलग्न भएको कुरा आएको छ, कानुनको उल्लंघन गर्ने जोसुकै होस्, उसमाथि कानुन बमोजिम नै कारबाही हुन्छ’, थापाले भने, ‘पक्राउ गरिएका कसैलाई रिहाई गरिएको मेरो जानकारीमा छैन। वडा अध्यक्ष पनि नियन्त्रणमा रहेका छन्।’
सांसदहरुले उठाएका कानुनी राज्य हुनुपर्ने कुरामा आफू पनि सहमत भएको उनले बताए।
संसदीय समिति गठन गर्ने कुरा सदनको अधिकार भएको भन्दै उनले यसमा राष्ट्रिय सभाले विचार गर्ने उनले बताए। जातीय विभेद गर्ने कसैलाई पनि कानुनी कारबाहीबाट उन्मुक्ति नदिइने उनले बताए।
देशभर भएका यस्ता घटनाहरुका बारेमा विस्तृत अनुसन्धान गर्दै दोषीविरुद्ध मुद्दा दायर भई कानुनी कारबाही हुने उनले बताए।
सांसदहरुको प्रश्न- कानुनी राज्य समाप्त भएको हो?
राष्ट्रिय सभाको वैठकमा बोल्दै सांसदहरुले गृहमन्त्री रामबहादुर थापा बादललाई रुकुम पश्चिम र देशभर भएका जातीय हिंसाको घटनामा संलग्नहरुलाई कानुनी कारबाही गर्न माग गरेका छन्। गृहमन्त्रीले घटनाबारे जानकारी गराएपछि सांसदहरुले प्रश्न गर्दै कानुनी राज्य समाप्त भएको हो भनी प्रश्न गरेका थिए। सांसदहरुले कानुनी राज्यको पालना गर्ने कार्यमा विभेद नगर्न पनि सुझाब दिएका छन्।
कसले के भने?
अनिता देवकोटा
जाजरकोटका युवालाई जातकै कारण मारिएको घटना अमानवीय हो। रुकुमको घटना हामीमाथि पनि भएको हो। त्यहाँ कानुन राज्य छ कि छैन?
चक्रप्रसाद स्नेही
सरकारसँग न्याय माग गर्न चाहन्छु। यही मात्र नभई दलितमाथि धेरै घटना भए। यसका लागि एक संसदीय समिति निर्माण होस्।
राम लखन चमार
जजरकोटको घटनामा के कारवाही भइरहेको छ? रुपेन्देहीको देवदहको १५ वर्षकी महिलाको बारेमा के भइरहेको छ? पोखरामा किरियापुत्री भवनमा बस्न नपाएका व्यक्तिको बारेमा के भइरहेको छ? यो घटनामा प्रदेश सांसद नै संलग्न भएकाले उनीमाथि के कारबाही भइरहेको छ?
पूर्व सचिव भीम उपाध्यायबाट पनि दलित विरुद्ध टिप्पणी भएको छ। कसरी कारबाही अगाडि बढाउनुभएको छ?
खिमकुमार बिक
गृहमन्त्रीले दिनु भएको जानकारी अनुसार १२ जना केटी पक्षमा मानिस अनुसन्धानमा छन्। सञ्चार माध्यमले ६ जना छुटेको भनेका छन्। यो विभेद विगतदेखि नै हुँदै आएको छ। दलितको मुद्दालाई किन गम्भीर रुपमा लिइँदैन?
प्रकाश पन्थ
रुकुम पश्चिम र जाजरकोटमा भएको घटना दुःखद छ। सभ्याता र कानुनी शासनको धज्जी उडाएको छ। कानुन बनउने मात्र कि कार्वान्वयन गर्ने?
विमल राई पौडेल
भगाएर लैजान लागिएको किशोरीलाई संरक्षण र मनोसामाजिक परामर्श दिन जरुरी छ। नत्र उनले यी सबै घटनाको दोष आफूलाई दिने हुनसक्छ।
नरपति लोहार
यी घटनाको भर्त्सना गर्दै कडाभन्दा कडा कारबाही होस्। माथिल्लो वर्गले अन्याय हुँदा अन्याय नहुने तर तल्लो वर्गको ज्यान जाँदा पनि नहुने के हो? कारबाही नर्गनुको कारण के हो?
राधेश्याम पासवान
जाजरकोटको घटनामा भगाउन १९ जना आएको भन्नुभयो । यो मिलेन कि! गम्भीर रुपमा अनुसन्धान हुनपर्यो। सप्तरीको कुरा आएन। पूर्व सचिव भीम उपाध्यायले सामाजिक सञ्जालले लेखेको कुराले मानहानी भएको छ।
भैरवसुन्दर श्रेष्ठ
जाजरकोट अहिले शोकमा छ। दुवैका बीचमा प्रेम भएको कुरा सर्वविदितै छ। जातीय अहंकार र आडम्बर देखिएको छ। के कारबाही हुन्छ? कहिले हुन्छ?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
