काठमाडौं- कोरोनाबाहेक विभिन्न कारणले विदेशमा ज्यान गुमाएका नेपाली श्रमिकहरुका आफन्तहरुले सम्बन्धित मुलुकमै अन्त्येष्टिका लागि सहमति दिन थालेका छन्। अन्तर्राष्ट्रिय उडानहरु ठप्प रहेको र लकडाउन पनि लम्बिँदै गएको अवस्थामा मृतकका हकवालाहरुले विदेशमै अन्त्येष्टि गर्न सहमति दिन थालेका हुन्।
लकडाउनका बीच विदेशमा कोरोनाबाहेक अन्य विभिन्न कारणले ज्यान गुमाएका १ सय ४४ नेपाली श्रमिकहरुका शव अलपत्र अवस्थामा रहेको वैदेशिक रोजगार बोर्डले जनाएको छ। जसमध्ये कतारमा सबैभन्दा बढी ३५, साउदीमा ३४, युएईमा ३२, मलेसियामा २९, कुवेतमा ७, दक्षिण कोरिया र बहराइनमा २/२, सेसेल्स, टर्की र ओमानमा १÷१ शव रहेको बोर्डको तथ्यांकले देखाएको छ।
वैदेशिक रोजगार बोर्डकाअनुसार १० वटा शवलाई गन्तव्य मुलुकमै अन्त्येष्टि गर्न सहमति प्राप्त भएको छ। युएईमा ७, साउदी, सेसेल्स र दक्षिण कोरियामा १/१ शवको अन्त्येष्टिका लागि सहमति प्राप्त भएको बोर्डले जनाएको छ। परिवारको सहमतिपछि कतिपयको अन्त्येष्टि गरिसकिएको छ भने कतिपयको अन्त्येष्टिको तयारी गरिएको वैदेशिक रोजगार बोर्डका कार्यकारी निर्देशक राजनप्रसाद श्रेष्ठले जानकारी दिए।
अन्त्येष्टिका लागि स्वदेशमै ल्याउनेले सामान्य अबस्था कुर्नुपर्ने
लकडाउन तथा अन्तर्राष्ट्रिय उडान बन्द भएका कारण लामो समयदेखि विदेशबाट शव ल्याउन सकिएको छैन। जसले गर्दा मृतकका आफन्तहरु निकै पीडामा छन्। यो अवस्थालाई मध्यनजर गर्दै वैदेशिक रोजगार बोर्डले मृतकका आफन्तहरुको सहमति प्राप्त भएमा सम्बन्धित गन्तव्य मुलुकमै अन्तिम संस्कार गराउन सहजीकरण गर्ने भएको हो।
यो अवधिमा सम्बन्धित गन्तव्य मुलुकमै मृतकको दाहसंस्कार गराउने परिवारलाई बोर्डले सान्त्वना स्वरुप ५० हजार दिने निर्णय गरेको छ। यो बाहेक बोर्डबाट पाउने आर्थिक सहायता, बीमा बापतको रकम र अन्य सुविधाहरु समेत मृतकका हकवालाले पाउने छन्।
मृतकको विदेशमै अन्तिम संस्कार गराउन बोर्डले जर्बजस्ती भने गरेको छैन।
मानवीय संवेदनालाई ध्यानमा राख्दै लकडाउनका कारण लामो समयसम्म शव ल्याउन नसकिने अवस्था सिर्जना भएपछि बोर्डले विकल्पका रुपमा विदेशमै अन्त्येष्टि गर्न सहजीकरण गरिदिने भएको बोर्डका कार्यकारी निर्देशक राजनप्रसाद श्रेष्ठको भनाई छ।
मृतकको अन्तिम संस्कारका लागि शव स्वदेशमै ल्याउन चाहनेहरुले सामान्य अवस्था पर्खनुपर्ने छ।
अन्तर्राष्ट्रिय उडानहरु खुलेपछि शव स्वदेश ल्याउन सकिने बोर्डले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
