धनगढी- धनगढी उपमहानगरपालिकाले लडकडाउनका कारण दैनिक छाक टार्न समस्या भएका परिवारलाई वितरण गर्न ठिक्क पारेको राहतको साढे ५७ क्विन्टल चामल कुहिएको भेटिएको छ।
आइतबार उपमहानगरले वडा नम्बर ४ मा वितरण गरेको राहतको चामल कुहिएको र किरा परेको भेटिएपछि स्थानीयले उपमहानगरलाई नै फिर्ता गरेका थिए। राहत वितरणमा कुहिएको र किरा परेको भन्दै स्थानीयले चामल फिर्ता गरेपछि उपमहानगरपालिकाले छानबिन समिति गठन गरेको थियो।
धनगढी उपमहानगरपालिकाले वडा नम्बर १८ का अध्यक्ष मुरारी अधिकारीको संयोजकत्वमा पाँच सदस्यीय छानबिन समिति गठन गरेको थियो। छानबिन समितिले बिहीबार वडा नम्बर ४ को गोदाममा चेकजाँच गर्दा ४० चालिस क्विन्टल चामल कुहिएको भेटिएको हो।
छानविन समितिक संयोजक अधिकारीले १५ किलोग्राम तौल भएका ३ सय ५६ पोका खोल्दा २ सय ६९ बोरामा गरी ४० क्विन्टल ३५ ग्राम कुहिएको चामल भेटिएको बताए। उनले तीन दिनभित्रै छानबिन सकेर उपमहानगरपालिकालाई प्रतिवेदन बुझाउने बताए।
विश्वमा कोरोनाको कहरले महामारी फैलिरहेको बेला उपमहानगरबाट राहतका नाममा कुहिएको चामल वितरण गरेको भन्दै जनस्तरबाट व्यापक विरोध भएपछि धनगढी उपमहानगर कार्यापालिका बैठकले बिहीबार छानबिन समिति गठन गरेको थियो।
समितिमा संयोजक अधिकारीसँगै सदस्यमा वडा नम्बर ३ का वडाअध्यक्ष बलबहादुर ऐर, वडा नम्बर ९ का वडाअध्यक्ष प्रेमबहादुर भण्डारी, वडा नम्बर १३ का वडाअध्यक्ष विजयराज जोशी र कार्यपालिका सदस्य गीता पन्त तथा उपमहानगरपालिकाको कृषि शाखा प्रमुख लोकराज उपाध्याय सदस्य सचिव रहेका छन्।
समितिलाई तीन दिनको समय दिइएको उपमहानगरले जनाएको छ। समितिको प्रतिवेदनका आधारमा चामल सप्लायर्सलाई कारवाहीको प्रक्रिया थालिने उपमहानगरको भनाइ छ।
धनगढी उपमहानगरपालिकाले लकडाउनमा दैनिक छाक टार्न समस्या भएकाहरुलाई राहत दिने भनेर धनगढीस्थित ठाकुर ट्रेड लिंकसँग २ करोड ६१ लाखमा चामल, दाल, नुन र तेल आपूर्तिका लागि सम्झौता गरेको थियो।
उपमहानगरपालिकामा अख्तियारको छापा, कागजात नियन्त्रणमा
यसैबीच उपमहानगरपालिकाले ठाकुर ट्रेड लिंकलाई चामललगायतका सामग्री आपूर्तिको ठेक्का दिँदा अनियमितता भएको भन्दै सञ्चारमाध्यममा समाचार सार्वजनिक भएपछि अख्तियार दुरुपयोग अनुसन्धान आयोग महेन्द्रनगरले बिहीबार छापा मारेर राहत सामग्री खरिद प्रक्रियाका सबै कागजात नियन्त्रणमा लिएको छ।
अख्तियारका महेन्द्रनगर प्रवक्ता टोपबहादुर विष्टले राहतका सामग्री खरिद प्रक्रियामा भएको अनियमितताबारे छानबिन गर्न सबै कागजपत्र नियन्त्रण लिएको बताए।
सप्लायर्सले आपूर्ति गरेको चामल कुहिएको भेटिएपछि विभिन्न वडाका स्थानीयले राहतको चामल फिर्ता गरेपछि ठाकुर ट्रेड लिंकलाई बोलपत्र दर्ताको समय नसकिँदै मूल्याङकन समेत नगरी उपमहानगरपालिकाले बोलपत्र स्वीकृतका लागि टिप्पणी उठाएको बुझिएको छ।
उपमहानगरपालिकाले वैशाख ११ गते बोलपत्र आह्वान गरेकोमा दर्ताको समय वैशाख १४ गते १२ बजेसम्म राखेको थियो। वैशाख १४ गतेसम्म बोलपत्र दर्ताको समय भएपनि उपमहानगरपालिकाले भने वैशाख १२ गते नै ठाकुर ट्रेड लिंंकको बोलपत्र मूल्याङकनमा सफल भइसकेको भन्दै उपमहानगरपालिकाका प्रशासन शाखा प्रमुख नारायणप्रसाद शर्मा, जिन्सी शाखा प्रमुख कृष्ण प्रशाद जोशी, खरिद इकाई प्रमुख सुरेन्द्र कार्की, लेखा अधिकृत डिल्लीराज ओझा र लेखा शाखा प्रमुख सरस्वती जोशीले उपमहानगरका प्रमुख प्रशासकीय अधिकृतलाई स्वीकृतका लागि टिप्पणी उठाएर पेश गरेको उपहमागरका एक कर्मचारीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
