सप्तरी-सप्तरीको डाक्नेश्वरी नगरपालिका-३ मा भेटिएका कोरोना संक्रमित युवकको गाउँलाई सिल गरिएको छ। जिल्ला सुरक्षा समितिको बैठकले डाक्नेश्वरी नगरपालिका-३ हटैलटोल र त्यसआसपास क्षेत्रलाई सिल गर्ने निर्णय गरेको सप्तरीका प्रहरी उपरीक्षक कृष्ण प्रसाइँले जानकारी दिए।
बैशाख ९ गते चितवनबाट घर आएका ती युवकमा सोमबार कोरोना संक्रमण देखापरेको हो। चितवनबाट आएका युवकलाई सप्तरीको डाक्नेश्वरी नगरपालिका-३ स्थित कन्तचन्द्र मावि पातोको क्वारेन्टाइनमा राखिएको थियो। उनलाई राजविराजस्थित गजेन्द्रनारायण सिंह अस्पतालको आइसोलेसनमा अहिले भर्ना गरिएको छ।
उनलाई अस्पतालमा भर्ना गरी संक्रमित युवकको टोल हटैल र उक्त गाउँका आसपास क्षेत्रलाई सिल गरिएको जिल्ला प्रशासन कार्यालय सप्तरीका सूचना अधिकारी आनन्द ठाकुरले बताए। उनको वैशाख २५ गते स्वाब संकलन गरिएको थियो। रिपोर्ट नआउँदै क्वारेन्टाइनबाट सिधै घर गएका युवकको पछि रिपोर्ट आउँदा कोरोना संक्रमण देखिएको छ।
यसैबीच उनका परिवारसहित उनको सम्पर्कमा आएका सबै व्यक्तिको कोरोना परीक्षण गरिने सूचना अधिकारी ठाकुरले बताए। उनीसँगै क्वारेन्टाइनमा रहेका अन्य व्यक्ति तथा उनका परिवारजनसहित उनीसँग सम्पर्कमा आएका अन्य सबै व्यक्तिको स्वाब परीक्षण गरिने उनको भनाइ छ। लकडाउनको समयमा बैशाख ९ गते डाक्नेश्वरी नगरपालिका-३ तरहीस्थित घर पुगेका उनीसहित १३ जनालाई क्वारेन्टाइनमा राखिएको थियो।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
