एजेन्सी- अमेरिकाका उपराष्ट्रपति माइक पेन्सले सेल्फ क्वारेन्टाइनमा नबस्ने बताएका छन्। आफ्ना सहयोगीलाई कोरोना संक्रमण देखिए पनि उनले सेल्फ क्वारेन्टाइनमा बस्न अस्वीकार गरेका हुन्।
उपराष्ट्रपतिका प्रवक्ता डेभिन ओमाल्लीले उपराष्ट्रपति पेन्स क्वारेन्टाइनमा बस्ने कुनै योजना नरहेको र नियमित रुपमा आफ्नो काम गरिरहने जानकारी दिए।
उपराष्ट्रपति पेन्सका एक सहयोगी तथा सञ्चार सचिव केट मिल्लरलाई कोरोना भाइरसको संक्रमण भएको स्वास्थ्य अधिकारीहरुले पुष्टि गरेका छन्।
सहयोगीलाई संक्रमण भएकाले उपराष्ट्रपति पेन्सलाई पनि संक्रमण भएको हुन सक्ने, नदेखिएको हुन सक्ने र उनीबाट अरुलाई पनि सर्न सक्ने भएकाले उनी सेल्फ क्वारेन्टाइनमा बस्नु उपयुक्त हुने सुझाव धेरैले दिएका थिए।
तर उनले भने आफू नियमित रुपमा कार्यालय जाने, काम गर्ने र आफ्नै कार्यालयको स्वास्थ्य ईकाइसँग निरन्तर परामर्शमा रहने जानकारी दिए।
उपराष्ट्रपति पेन्सका अर्का एक सहयोगीले पहिलाभन्दा केही सतर्कता अपनाउने तर पूर्ण रुपमा सेल्फ क्वारेन्टाइनमा भने नबस्ने निर्णय भएको बताएका छन्।
सञ्चार सचिव मिलरलाई गत शुक्रबार कोरोना पुष्टि गरिएको थियो। ह्वाइट हाउसमा कार्यरतमा कोरोना संक्रमण भएका उनी दोस्रो व्यक्ति हुन्।
विश्वभरी महामारीका रुपमा फैलिएको कोरोना भाइरसबाट मृत्यु भएका र संक्रमित भएकाहरुको सबैभन्दा धेरै संख्या अमेरिकामै रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
