काठमाडौं– सरकारले आन्तरिक उडानलाई प्रभावकरी बनाउन नेपाल वायुसेवा निगम (नेपाल एयरलाइन्स)मा जहाज थप्ने तयारी गरेको छ। कोरोना भाइरसका कारण लामो समयसम्म अन्तर्राष्ट्रिय उडान प्रभावित हुने र व्यापार पनि कम हुने भएपछि निगमले नेपाल एयरलाइन्सलाई संकटबाट जाेगाउन आन्तरिक उडान प्रभावकारी बनाउने योजना अगाडि सारेको छ।
निगमले आन्तरिक उडानको गुमेको साख जोगाउन केही संख्यामा जहाज थप्ने तयारी गरेको हो। संस्कृति, पर्यटन तथा नागरिक उड्डयन मन्त्रालयले आगामी आर्थिक वर्ष २०७७/०७८ को नीति तथा कार्यक्रम बजेटमार्फत नै जहाज थप्ने गरी कार्यक्रम ल्याउन लागेको हो। ‘निगमको आर्थिक संकट सहायताका लागि आन्तरिक उडानमा जहाज थप्ने तयारी भएको छ,’ पर्यटनमन्त्री योगेशकुमार भट्टराईले भने, ‘नेपाल वायुसेवा निगमको आन्तरिक उडान प्रभावकारी बनाउने जहाज थप्नको विकल्प छैन।’
नेपाल एयरलाइन्सले आन्तरिक उडानका लागि जहाज थप्ने विषयमा तयारी गरेको निगमका कार्यकारी अध्यक्ष शुशिल घिमिरे पनि स्वीकार गर्छन्। तर, आन्तरिक उडानमा अहिले प्रयोग भइरहेको जहाज व्यवस्थापनको विषयमा पनि अगाडि बढने उनको भनाइ छ। ‘जहाज थप्ने विषयमा छलफल सुरु भएको छ,’ घिमिरेले भने, ‘कति वटा र कस्तो प्रकृतिको भन्ने हाम्रो आवश्यकता अनुसार हामीलाई उडानमा सहजता हुने प्रकृतिका जहाज थप्ने हो।’
जहाज थप्ने विषयमा अहिले निगमको बोर्डमा छलफल नभएपनि केही समयभित्रै छलफल गर्दै अगाडि बढने उनको भनाइ छ। अहिले निगमसँग आन्तरिक उडानका लागि ९ वटा जहाज भएपनि प्रभावकारी उडान हुने सकेको छैन। आन्तरिक उडानबाट मात्रै निमगले वार्षिक ५० करोडभन्दा बढी घाटा बेहोर्दै आएको छ।
निगगले आन्तरिक जहाजमा प्रयोग गर्दै आएको ४ वटा चिनियाँ वाई १२ जहाजमध्ये एउटमात्रै उडानमा छ। एउटा वाई १२ जहाज केही समय अगाडि मात्रै नेपालगञ्जमा ल्यान्डको क्रममा दुर्घटना भएको थियो। उक्त जहाज पनि काम नलाग्ने भइसकेको छ भने दुई वटा वाई १२ जहाज दुई वर्षदेखि ग्राउन्डेट छ।
अहिले एउटा मात्रै वाई १२ जहाज उडान योग्य छ। यसैगरी २ वटा एमए ६० जहाज मध्ये एउटा लामो समयदेखि ग्राउन्डेट छ। एउटा मात्रै वाई एमए ६० मात्रै उडानमा छ। साथै ३ वटा ट्विनअटर जहाज मध्ये एउटा मात्रै उडानमा छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।