काठमाडौं- शुक्रबारको प्रतिनिधिसभा बैठकमा अध्यादेश र सांसद अपहरणको विषयलाई लिएर सकारको चर्काे आलोचना भयो। प्रतिनिधिसभाको बैठकमा बोल्ने प्रमुख प्रतिपक्ष दलका नेता शेरबहादुर देउवादेखि पूर्वप्रधानमन्त्री डा बाबुराम भट्टराई, राजेन्द्र महतोले पनि यो प्रकरणमा सरकारको आलोचना गरे।
बैसाख ८ गते सरकारले ल्याएका संवैधानिक परिषद् (काम कर्तव्य अधिकार र कार्यविधि) सम्बन्धी (पहिलो संशोधन) अध्यादेश, २०७७ र राजनीतिक दलसम्बन्धी (दोस्रो संशोधन) अध्यादेश, २०७७ दुवै अध्यादेश विवादित बने। प्रतिपक्षी दलदेखि सत्तारुढ दलकै नेताहरूले विरोध गरेपछि सरकारले अध्यादेश फिर्ता लिने निर्णय बैसाख १२ गते गर्यो। तर यो प्रकरणमा सरकारले प्रक्रिया नमिलाउँदा अध्यादेशमाथिको बहस साम्य हुन सकेको छैन भने यसको अन्तर्यका विषयमा सत्तारुढदेखि प्रतिपक्षी दलले समेत आशंका गर्न छोडेका छैनन्।
संसद सञ्चालन नभएको र कोरोना भाइरसको महामारी चलेको समयमा ल्याएको दुई अध्यादेशले सरकारको नियत र गलत कार्यशैली उदाङ्गो भएको आरोप उनीहरुले लगाए। प्रतिनिधि सभाको बैठकमा बोल्ने सत्तापक्षका सांसद तथा संसदीय दलका उपनेता सुवास नेम्वाङले सरकारको बचाउ गरेका थिए।
प्रमुख प्रतिपक्ष नेपाली कांग्रेसका सभापति शेरबहादुर देउवाले विवादित अध्यादेश ल्याएर लोकतन्त्रविरुद्ध सरकार लागेको आरोप लगाए।
सिंगो देश कोरोनाबाट आतंकित भएको बेलामा सरकारले लोकतान्त्रिक मूल्य र मान्यता एवं संविधानको मूल भावनाविपरीत दुईवटा विवादास्पद अध्यादेश जारी गरेर अलोकतान्त्रिक एवं गैह्रजिम्मेवार चरित्र प्रस्तुत गरेको आरोप देउवाले लगाए।
‘विपक्षीलगायत राजनीतिक दल, संचार माध्यम र समस्त नागरिकसहित सबैले कोरोनाविरुद्धको लडाईंमा एक भएर साथ दिइरहेका बेला दल विभाजनको अध्यादेश ल्याउनु र संवैधानिक परिषद्को गरिमा समाप्त पार्ने षड्यन्त्र गर्नु प्रधानमन्त्रीको नियोजित नियत थियो,’ देउवाले प्रतिनिधि सभामा भने‚ ‘एक सांसदको अपहरण र त्यसमा पनि कुनै न कुनै रुपले सरकारको संलग्नता देखिनु अर्को दुर्भाग्यपूर्ण कार्य हो। म यो घटनाको निन्दा गर्दै अपराधमा संलग्न सबैलाई कडा कारबाही गर्न माग गर्दछु।’
सरकारले नियोजित नियतबाट लोकतन्त्र र संविधानका विरुद्ध गरिरहेको घातबाट वर्तमान संविधान र लोकतान्त्रिक व्यवस्थाको रक्षा गर्नुपर्ने परिस्थिति आइपरेको देउवाले दाबी गरे। पूर्व प्रधानमन्त्री बाबुराम भट्टराईले प्रधानमन्त्री ओलीले अब पदबाट राजीनामा दिनुपर्ने बताए। समाजवादी जनता पार्टीका नेता भट्टराईले प्रधानमन्त्रीले ओलीले प्रधानमन्त्रीको रुपमा गरेका कार्यका कारण यस्तो अवस्था आएकाले थप क्षति हुन नदिनका लागि पद छोड्न सुझाव दिएका हुन्।
दल विभाजन गर्ने र संसद् अपहरण गर्ने काममा रहेको भन्दै भट्टराईले प्रधानमन्त्री ओलीको राजीनामा मागेका हुन्। ‘रोगले जीर्ण भएको शरीरलाई आराम दिनुपर्छ,’ डा भट्टराईले बजेट अधिवेशनको पहिलो बैठकलाई सम्बोधन गर्दै भने, ‘यो लोकतन्त्र र तपाईं आफ्नै छवि बचाउनका लागि पनि तपााईंले राजीनामा दिनुपर्ने हुन्छ।’
देशको कार्यकारी पार्टी फुटाउने र संवैधानिक निकाय कब्जा गर्ने काममा लाग्नु लोकतन्त्रका लागि खतरा भएको भट्टराईको भनाइ छ। ‘हाम्रो देशको कार्यकारी नेतृत्व पार्टी फुटाउने र संवैधानिक निकायमा कब्जा गरेर जान सक्छ भन्ने सन्देश प्रवाह भएको छ,’ उनले भने, 'यो लोकतन्त्रका लागि शुभ संकेत होइन। पार्टी फुटाउने अध्योदश किन ल्याउनुपर्यो? संवैधानिक व्यवस्थालाई किन भत्काउन खोजियो? यो निकै खतरनाक संकेत हो।’
उनले अहिले सरकारको छवि राम्रो नभएको र राजनीतिमा सबै भ्रष्ट, पदलोलुप भन्ने बिम्ब बनेको बताए। सांसद अपहरण गरेको विषयको जाहेरी समेत नलिएको भन्दै उनले रातारात सांसद र पूर्व प्रहरी प्रमुख किन जानुपर्यो? भनी प्रश्न समेत गरे।
‘सांसदलाई रातारात किन ल्याउनुपर्यो?,’ उनले भने, ‘सांसद र पूर्व प्रहरी प्रमुख किन राती राती जानुपर्यो? एउटा जाहेरी पनि नलिने भन्ने हुन्छ? किन लिनुहुन्न भन्दा उहाँ म लिन्नँ भन्नुहुन्छ। उहाँ आतंकित बनाउनुहुन्छ। यसरी आतंकित बनाएर, संघसंस्था भत्काएर देश बन्छ? तपाईंले पनि मुद्दा फिर्ता लिनुहोस, हामी पनि लिन्छौं भन्ने? यही हो लोकतन्त्र?’
सजपाका अर्का नेता राजेन्द्र महत्तोले प्रधानमन्त्रीको शैलीमाथि प्रश्न उठाए । सरकार पद बचाउन अध्यादेश र पार्टी विभाजनमा लागेको आरोप उनले लगाए। ‘यो के हो? महामारीमा जनता बचाउन ऊर्जा लगाउनुपर्नेमा कता ऊर्जा खर्च गरिरहेको छ सरकार? ’ उनले प्रश्न उठाए‚ ‘रातारात यी दुई अध्यादेश किन आयो? लोकतन्त्र, पार्टी र जनतालाई बलियो बनाउन हो?’ जनताले उपाचार पाएको छैन। तर सरकार भने अर्को धन्दामा लागेको आरोप उनले लगाए।
‘यो धन्दा यही बेलामा गर्ने हो? यो धन्दामा सरकारलाई गर्न सुहाउँछ?’ उनले प्रश्न गरे‚ ‘कुर्सी जोगाउन र पाउनका किन लागि संकटको समयमा सरकारले यस्तो गर्न मिल्छ? तर सत्तापक्षबाट बोलेका संसदीय दलका उपनेता सुवास नेम्वाङले सरकारको बचाउ गरे। उनले सांसद अपहरणको बारेमा यथार्थ जानकारी आउनुपर्ने बताए।
सरकारले यथोचित कार्य गरिहरेको दाबीसमेत गरे। ‘संसद अपहरणको कुरा के हो त्यो अब यथार्थ बाहिर आउनैपर्दछ,’ उनले भने‚ ‘मलाई विश्वास छ, संसद चल्दाचल्दैको अवस्थामा यथार्थ कुरा आउँछ। हामी कुनै पनि अपराधको पक्षमा छैनौं। हाम्रो दलले संविधान निर्माण गर्दा नेतृत्वदायी भूमिका निभाएको थियो र कार्यान्वयमा पनि त्यही भूमिकामा थियो।’ अहिले सबै दलहरु एक ठाउँमा आउनुपर्ने पनि उनले बताए।
कोरोना भाइरसमा सरकार सफल भएको दाबी उनले गरे। उनले सरकारले समयमै सचेत भएर लकडाउन गर्दा संक्रमितको संख्या कम भएको दाबीसमेत गरे। उनीभन्दा अघि देउवाले सरकारको कार्यशैलीको विरोध गरेपनि नेम्वाङले त्यसको जवाफ दिएनन्। कोरोनाको बारेमा यो अधिवेशनले सम्बोधन गर्ने दाबी उनले गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772682681.png)
-1764146706.png)
