नेकपा अध्यक्षद्वय ओली र प्रचण्ड। फाइल तस्बिर
काठमाडौं- अध्यादेश प्रकरणसँग जोडिएका घटना, ‘एक व्यक्ति, एक जिम्मेवारी’ तथा सरकारसँग जोडिएका कतिपय विवादित विषयलाई प्रतिवेदनमा राख्न ओली तयार नहुँदा नेकपाका अध्यक्ष पुष्पकमल दाहाल ‘प्रचण्ड’ले अझै प्रतिवेदन लेख्न सकेका छैनन्। गत शनिबार बसेको सचिवालय बैठकले प्रतिवेदन लेख्न अध्यक्ष प्रचण्डलाई जिम्मेवारी दिएको थियो। उनले महासचिव विष्णु पौडेलको साथ लिएर प्रतिवेदन लेख्ने भनिए पनि दुई अध्यक्षबीच नै कुरा नमिल्दा प्रतिवेदन लेखनको काम अघि बढ्न सकेको छैन।
प्रतिवेदनमा राखिने विषयवस्तुका सन्दर्भमा पछिल्ला दिनमा शीर्ष नेताहरुको दौडधुप र भेटवार्ता चलिरहेको छ।
अध्यक्ष केपी ओली अध्यादेशसँग जोडिएका प्रकरण र ‘एक व्यक्ति, एक जिम्मेवारी’ लगायतका विषय प्रतिवेदनमा नपरोस् भन्नेमा जोड गरिएका प्रचण्ड निकट एक स्थायी समिति सदस्यले बताए। उनले कोरोनामा महामारीमा सरकारले खेलेको भूमिका, बजेट लगायत सामान्य विषयमा मात्रै राख्न सुझाब दिएका छन्।
प्रचण्ड, वरिष्ठ नेता झलनाथ खनाल तथा माधव नेपाल भने ती लगायतका शनिबारको सचिवालय बैठकका निष्कर्ष पनि प्रतिवेदनमा राख्नुपर्ने पक्षमा छन्।
अर्कोतिर, दोस्रो तहका नेताहरुले आफूहरुको मुख थुन्ने किसिमबाट बैठक सञ्चालन गर्न खोजिए नमान्ने बताएका छन्। उनीहरुले शीर्ष नेताहरुलाई भेटेरै, फोनबाट यस विषयमा जानकारी दिइरहेका छन्। साथै, मंगलबार २० स्थायी कमिटी सदस्यले एक भेला गर्दै आफ्नो रणनीति तय गरेका छन्। उनीहरुले विकृति र विसंगतिको विरुद्धमा एकै स्वरमा कुरा राख्ने भएका छन्।
‘एक व्यक्ति एक जिम्मेवारी’को विषयमा ओली सहमतिबाट पछाडि हेटेको भन्दै प्रचण्डले आफू निकटका नेतासँग दुखेसो गरेका छन्। उता नेपाल पक्षले भने सो विषयमा प्रचण्डको अडानलाई साथ दिएका छन्।
नेपाल पक्षले ‘एक व्यक्ति, एक जिम्मेवारी‘भएमा अध्यक्ष पद स्वत आफ्नो पक्षमा आउने भएकाले तेस्रो अध्यक्षको प्रस्ताव समेत अस्वीकार गरेको थियो। तर, ओली सहमतिबाट पछाडि हटेको भन्दै प्रचण्ड र नेपाल दुवै रुष्ट भएका छन्।
उता ओली भने आफूलाई प्रचण्ड र नेपाल समूहले चेपुवामा पार्न थालेको भन्दै चिन्ता व्यक्त गरेका छन्। यही अवस्थामा ‘एक व्यक्ति, एक पद‘ मा गएमा आफू झन् अप्ठ्यारोमा पर्ने भन्दै सो विषयलाई थाती राख्न प्रयास गरिरहेको एक सचिवालय सदस्यले बताए।
प्रतिवेदनमा लेख्ने विषयमा सहमति नजुटे प्रतिवेदन नलेखेर सामान्य एजेण्डाको रुपमा मात्रै प्रस्ताव तयार गर्ने तयारी गरिएको छ। स्थायी कमिटीको एजेन्डा तय गर्न सचिवालय बैठक बुधबार (आज) दिउँसो ३ बजेका लागि बोलाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
