काठमाडौं– काेराेना भाइरस (कोभिड–१९)का कारण नेपालको पर्यटन तथा नागरिक उड्डयन क्षेत्रमा परेको असर र यस क्षेत्रकाे पुनरुत्थानका लागि गठित अध्ययन समितिले आर्थिक वर्ष २०७७/७८ को बजेट तथा कार्यक्रम र आर्थिक ऐन समावेश गर्ने गरी नेपाल वायुसेवा निगमको करिब ३४ अर्ब ऋणमा साढे ६ महिनाको ब्याजमा अनुदान दिनुपर्ने सुझाव दिएको छ।
संस्कृति, पर्यटन तथा नागरिक उड्डयन मन्त्रालयले गठन गरेको अध्ययन समितिले यस्तो सुझाव दिएको हो। मन्त्रालयले पर्यटन मन्त्रालयका तत्कालीन सहसचिव घनश्याम उपाध्ययाको संयोजकत्वमा समिति गठन गरेको थियो। समितिमा नेपाल नागरिक उड्डयन प्राधिकरणका महानिर्देशक राजन पोखरेल र नेपाल पर्यटन बाेर्डका सिइओ डा धनञ्जय रेग्मी सदस्य थिए।
समितिले दिएको सुझाव मन्त्रालयले अर्थ मन्त्रालयमा पठाएको छ। समितिले नेपाल वायुसेवा निगमको करिव ३४ अर्ब ऋण करिब १०.५ प्रतिशत ब्याजमा भएको र करिब शून्य आम्दानी भएको हुँदा फरक किसिमले सम्बाेधन हुनुपर्ने सुझाव दिएको हो। हाल रहेको करिव ३४ अर्ब ऋणको २०२० जनवरीदेखि जुलाई १७ सम्मको लागि ब्याजमा अनुदान आवश्यक रहेको सुझाव समितिले दिएका छ। साथै समितिले निगमलाई अतिरिक्त चालु पुँजीसमेत उपलब्ध गराउनुपर्ने सुझाव दिएको छ।
निगममा रहेको ऋण लगानीको साँवा ब्याजको किस्ता तिर्ने अवधि तीन वर्ष थप गरी ऋणको पुर्नतालिकीकरण गर्ने तथा ४ प्रतिशतमा पुनर्कर्जाको सुविधासमेत मिलाइदिनु पर्ने प्रतिवेदनमा उल्लेख छ।
नेपाल एयरलाइन्सले आन्तरिक उडानमा ९ वटा जहाज र अन्तर्राष्ट्रिय उडानमा ४ वटा जहाज प्रयोग गर्दै आएको छ। आन्तरिक उडानतर्फका ९ वटा जहाजमध्ये ४ वटामात्रै सञ्चालनमा छन् भने ५ वटा ग्राउन्डेट छन्। यसैगरी, अन्तर्राष्ट्रियतर्फ भने २ वटा एयरबस ३२० र २ वटा वाइडबडी ए३३० सञ्चालनमा रहेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।