फाइल तस्बिर
दार्चुला- भारतको पिथौरागढस्थित धार्चुला र आसपासका क्वारेन्टाइनमा रहेका २३ सय बढी नेपाली मजदुर नेपाल प्रवेश गरेका छन्। क्वारेन्टाइन अवधि सकिए पनि उनीहरु नेपाल आउन पाएका थिएनन्। बिहीबार दार्चुलाका दुई र बैतडीकाे एक गरी तीन वटा नाकाबाट उनीहरुलाई स्वदेश फर्काइएको हाे।
भारतसँगको सीमा दत्तु र खलंगा नाकाबाट बिहीबार १३ सय बढी मजदुरको उद्धार गरिएको जिल्ला प्रशासन कार्यालय दार्चुलाले जनाएको छ। दार्चुला प्रशासनले बैतडी, बझाङका नागरिकलाई दत्तु नाका भएर प्रवेश गराएको हो भने दार्चुलालगायत अन्य जिल्लाकालाई खलंगा नाका भएर प्रवेश दिइएको दार्चुलाका प्रमुख जिल्ला अधिकारी यदुनाथ पौडेलले बताए। उद्धारपछि स्वस्थ्य जाँच गरी अधिकांशलाई नै गन्तव्य पठाइएको उनले बताए।
कैलाली र कञ्चनपुरसहित केही पूर्वी जिल्लाका नागरिकलाई भने खलंगाकै क्वारेन्टाइनमा राखिएको प्रशासनले जनाएको छ।
त्यस्तै बिहीबार नै बैतडीको झुलाघाट नाकाबाट पनि नेपाल प्रवेशमा अनुमति दिइएको छ। जिल्ला प्रहरी कार्यालय बैतडीका अनुसार झुलाघाट नाकाबाट बिहीबार एक हजार ५० बढीको उद्धार गरिएको छ। उनीहरुलाई सम्बन्धित स्थानीय तहहरुमा पठाइएको छ।
उद्धार गरिएकालाई स्थानीय तहले नै क्वारेन्टाइनमा राख्नेछन्। आरडिटी परीक्षणपछि मात्र घर पठाइने पाटन नगरपालिकाका प्रमुख केशव चन्दले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
