राजनीति

अहिलेकाे सरकार पुँजीवादीहरु जत्तिको पनि भएन : श्याम श्रेष्ठ [भिडियो वार्ता]

वीरेन्द्र ओली बिहीबार, वैशाख १८, २०७७ १४:४९

काठमाडौं–राजनीतिक विश्लेषक श्याम श्रेष्ठले प्रधानमन्त्री केपी शर्मा ओली नेतृत्वको सरकार लोभीपापीहरुको अखडाजस्तो देखिएको टिप्पणी गरेका छन्। नेकपाले आफूलाई कम्युनिस्ट नै भन्न छाडेको बताउँदै उनले सामान्य पुँजीवादी पार्टीले गर्न सक्ने कामसमेत वर्तमान सरकारले नगरेको आरोप लगाए।

‘अहिलेको सरकार कम्युनिस्टको जस्तो त छँदैछैन। समाजवादी जस्तो त हुने कुरै भएन,’ उनले भने, ‘पुँजीवादी भनिनेहरुले समेत शिक्षा र स्वास्थ्यलगायत आधारभूत आवश्यकता राज्यको नियन्त्रणमा राखेर राम्रा काम गरेका छन्।’

सरकार कोरोना भाइरस नियन्त्रण तथा रोकथाममा खटिनु पर्नेमा सांसद अपहरणजस्ता जघन्य अपराधदेखि दल फुटाउने अध्यादेश ल्याउन अल्झिएको उनले बताए।
‘अहिले कोरोना भाईरसबाट मुलक आक्रान्त छ। नेपाली जनता लकडाउनमा छन्। तर प्रधानमन्त्रीले दल फुटाउन सजिलो हुनेगरी अध्यादेश किन ल्याउनु पर्‍यो?’ श्रेष्ठले भने, ‘उहाँ नचाहिँदो काममा लागेर ५० को दशकको राजनीति पुनरावृत्ति गराउन लाग्नुभयो।’

प्रधानमन्त्री केपी शर्मा ओली एकपछि अर्को गर्नै नहुने काममा लागेको भन्दै श्रेष्ठले ओलीले प्रधानमन्त्री र पार्टी अध्यक्ष दुवैबाट राजीनामा दिनुपर्ने बताए। नेपालको राजनीतिमा स–साना काम गरेर पनि लोकप्रियता हासिल गर्न सकिने ठाउँ भएको उनको बुझाइ छ।

श्रेष्ठसँग नेपाललाइभकर्मी वीरेन्द्र ओलीले गरेको भिडियो वार्ताः