समाज

चोरीका एक अभियुक्तका कारण भारतीय दूतावासदेखि जिल्ला अदालतसम्म तनावमा

दुर्गा दुलाल मंगलबार, वैशाख १६, २०७७ १६:५२

काठमाडौं- काठमाडौं जिल्ला अदालतको इजलास नम्बर १४ मा मंगलबार निकै हल्लाखल्ला भइरहेको थियो। लकडाउनका बीचमै अभियुक्तहरुको मुद्दाको सुनुवाई, म्याद थप र थुनछेकका बीचमा सामाजिक दुरी कायम गर्दै भइरहेको भएपनि जिल्ला अदालतमा हो-हल्ला थियो।

अदालतमा पेस भएको कैदी अझ इजलासमा राख्दा हतकडी खोल्ने गरिन्छ तर चोरीको आरोपमा पक्राउ परेका एक अभियुक्तलाई हतकडीसहित राखिएको थियो। कोरोना भाइरसको महामारीबीचमा डरैडरमा शुरु भएको सुनुवाईमा अभियुक्तले बयान नदिने भन्दै झगडा गर्न थालेपछि इजलासमा त्रास फैलिएको थियो।

काठमाडौ जिल्ला अदालतको इजलासमा भारतीय दूतावासका प्रतिनिधि पनि उपस्थित भएका थिए। अभियुक्तले नेपाली नबुझ्ने र बोल्न नसक्ने भनेपछि भारतीय दूतावासका प्रतिनिधि सरकारी वकिल कार्यालय हुँदै परराष्ट्र मन्त्रालयमार्फत् जिल्ला अदालत उपस्थित भएका थिए।

कोरोना भाइरसको महामारीका अदालतको आदेश र परराष्ट्रको पत्र पुगेपछि इजलास उपस्थित भएका भारतीय दूतावासका प्रतिनिधि पनि अभियुक्तको क्रियाकलाप देखेर डराएका थिए।

कोरोना भाइरसको संक्रमणलाई ख्याल गर्दै सर्वोच्च अदालतले मास्क लगाएको र अन्य सुरक्षा उपाय अवलम्बन नगरेको व्यक्तिलाई प्रवेश गर्न नदिनेलगायत २४ बुँदे निर्देशन दिएको छ। सर्वोच्चले दिएको निर्देशनलाई सक्दो पालना गराउँदै जतिसक्दो चाँडो थुनछेक गरिदिनु पनि सरकारी वकिलको कार्यालयको पत्रका आधारमा पेस भएका एक अभियुक्त बयान नदिने जिकीर गरिरहेका थिए।

यो पनि पढ्नुहोस्

कोरोनाबाट 'अल्लाह'ले बचाउने भन्दै इजलासमै मास्क फालेपछि...मंगलबार, वैशाख २, २०७७

न्यायाधीश श्रीकृष्ण भट्टराई अभियुक्तलाई शुरुमा नेपाली अनि अंग्रेजीमा सम्झाइरहेका थिए। भट्टराईसंगै भारतीय दूतावासका प्रतिनिधि उनलाई हिन्दीमा सम्झाई रहेका थिए। तर उनी सम्झन भन्दा झन् उग्र भइरहेका थिए।

यसरी जिल्ला अदालतमा यस्तो कार्य गर्ने अभियुक्त हुन्, चोरीको अभियोगमा पक्राउ परेका मोहम्मद हैदर अली।

पक्राउ परेपछि थुनामा रहेको स्थानमा पनि यस्तै गतिविधि गरेका थिए। थुनुवा कक्षमा अन्य कैदलाई दुख दिने, बिजुलीको मिटर बिगार्ने र ड्युटीमा खटिएका प्रहरीलाई नै हातपात गरेपछि सरकारी बकिलको कार्यालयले छिटो थुनछेक गरिदिन माग गर्दै इजलासमा पेश गरिएका थिए।

यसअघि पनि उनलाई म्याद थपका लागि अदालत ल्याउँदा पनि यस्तै गतिविधि गरेका थिए। उनले भारत घर बताउँदै जिल्ला अदालतको इजलासमा पेस भएलगत्तै मुखको मास्क खोलेर फालेर न्यायाधीश समक्ष नेपालीमा बयान नदिने अडान राखेका थिए। आफूलाई कोरोनाबाट अल्लाहले बचाउने भन्दै उनले यस्तो गतिविधि देखाएका थिए।

उनको यस्तो क्रियाकलापपछि इजलाशले मानसिक परीक्षण र कोरोना परीक्षण गरेर पेश गर्न भनेको थियो। तर प्रहरीले र्‍यापिड टेस्ट मात्र गरेको र मानसिक अस्पतालको रिर्पोट पेस नगरेपछि जिल्ला अदालतले फेरि पनि परीक्षण गरेर पेस गर्न आदेश गरेको छ। ‍

काठमाडौको थानकोटमा सिलिन्डरलगायत घरायसी सामग्री चोरीको अभियोगमा उनी पक्राउ परेका थिए। उनले आफूलाई कोरोना नलाग्ने र लागेपनि अल्लाहले बचाउने भन्दै मास्क लगाउन दबाब नदिन चेतावनी दिए।

न्यायाधीश भट्टराई र भारतीय दूतावासमा प्रतिनिधिले उनलाई पटकपटक सम्झाउने प्रयास गरिरहेका थिए। यसरी सम्झाउँदा अलीले आफूलाई पागल भएको बताउन थालेका थिए।