काठमाडौं- कोरोना भाइरस (कोभिड १९) का कारण रोकिएको इंग्लिस प्रिमियर लिग सुरु गर्ने विषयमा काम सुरु भएको छ। आउँदो हप्ता यकिन निर्णय गर्ने गरी लागिपरिहँदा केही क्लबले अभ्यास पनि सुरु गरेका छन्।
क्लबहरु आर्सनल, ब्राइटन र वेस्टहामले खेलाडीहरुलाई व्यक्तिगत रुपमा अभ्यास गराउनका लागि मैदानसमेत खुला गरेको छ। जसअनुसार सोमबार नै खेलाडीहरुले अभ्यास गरेका थिए।
युरोपियन फुटबलको प्रशासकीय निकाय युइएफएले बनाएको च्याम्पिन्स लिग र युरोपा लिगको योजनालाई असर नपार्ने गरी प्रिमियर लिग जुन ८ मा सुरु गर्ने र जुलाइमा सकाउने तयारी भइरहेको छ। जसका लागि १८ मेदेखि अभ्यास पूर्ण रुपमा गर्ने गरी योजना बनाइँदैछ।
यी सबै विषयमा कुराकानी गर्न माथिल्लो डिभिजनका क्लबहरुले शुक्रबार बैठक गर्दैछन्। अहिले अभ्यासमा सामेल नभएका क्लबले पनि यही हप्तादेखि व्यक्तिगत रुपमा गरीने अभ्यासहरु सुरु गर्दैछन्।
कोरोना भाइरस (कोभिड १९) कारण मार्च १३ देखि प्रिमियर लिगका खेलहरु रोकिएका छन्। अब प्रिमियर लिगमा सबै क्लबको गरेर ९२ खेल खेल्न बाँकी छ।
अब लिग सुरु गरिँदा बन्द रंगशालामा खेल खेलाइने र टेलिभिजन लाइभ प्रसारण अनुमति सित्तैमा दिने गरी तयारी भइरहेको छ। शुक्रबार क्लबहरुको बैठकमा सबै स्टेडियम प्रयोग गर्न सकिन्छ या निश्चित स्टेडियममा मात्र खेल गराउने भन्ने विषयमा पनि कुराकानी हुनेछ।
तर यो सबै निर्णय गर्न पनि कोरोनाको अवस्था आउँदो दिनमा के हुनेछ भन्नेले यकिन हुनेछ। इंग्ल्याण्डमा कोरोनाका कारण २० हजारभन्दा बढी मानिसको मृत्यु भइसकेको छ।
इंग्लिस प्रिमियर लिगमा यो सिजन लिभरपुल उपाधितर्फ अरु क्लबभन्दा दुई पाइला अघि बढिसकेको थियो। लिभरपुलले इतिहासमा सबैभन्दा छिटो उपाधि जितेर कीर्तिमान बनाउने आश गरिरहेका समर्थकहरु कोरोनाको त्रास बढ्दा निराश छन्।
हुन पनि ३० वर्षपछि लिग उपाधि जित्न लागेको लिभरपुल जति निराश यो समय अरु क्लब सायदै होला। प्रिमियर लिगमा लिभरपुल २९ खेलमा ८२ अंकसहित शीर्ष स्थानमा छ। दोस्रोमा रहेको म्यानचेस्टर सिटीको २८ खेलमा ५७ अंक छ।
प्रिमियर लिग मात्रै होइन युरोपभर नै लिग फुटबलहरु स्थगित रहेको अवस्था छ। जर्मन बुण्डेस लिगा मे ९ बाट सुरु गर्नेबारे छलफल भइरहेको छ भने नेदरल्याण्ड्सको लिग फुटबल विजेता टिम र रेलिगेसनमा पर्ने टिम नछानीकन स्थगित भएको छ। बेल्जियमले पनि लिगको यो सिजन अन्त्य भएको घोषणा नै गरिसकेको छ।
फ्रेन्च लिग वान र स्पेनिस ला लिगा अनिश्चित समयका लागि स्थगित भइसकेको छ। इटालियन सिरी ए मे महिनाको अन्तिममा सुरु गर्ने भनिए पनि त्यो असम्भव जस्तो देखिइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775575666.png)
-1764146706.png)
