कोरोनाका लागि चीनले अनुमोदन गर्‍यो तीन प्राचीन औषधि

कोरोना अपडेट

नेपाल लाइभ शुक्रबार, वैशाख ५, २०७७ १५:२४

एजेन्सी- कोभिड-१९ को लागि बन्दै गरेको औषधिमा तीन चिनियाँ प्राचीन औषधि (टिसिएम) समावेश गर्नुपर्ने भन्ने प्रस्तावलाई चीनले अनुमोदन गरेको छ। उक्त अनुमोदनपछि टिसिएमका विशेषज्ञहरूले स्वागत गरेका छन्। उनीहरूका अनुसार यसबाट अन्तर्राष्ट्रिय स्तरमा पनि सकारात्मक सन्देश गएको छ।

तीनवटा चिनियाँ प्राचीन औषधिहरू‚ क्विन्गन ग्र्यानुल्स‚ लियान्ह्वा क्विन्ग्वेन क्याप्सुल र सुएबिजिङ इन्जेक्सनलाई चीनको नेसनल मेडिकल प्रोडक्ट्स एडमिनिस्ट्रेसनमा अहिले विभिन्न परीक्षणमा रहेका अन्य औषधिमा समावेश गरेर क्लिनिकल ट्रायलका लागि तयार पारिएको छ।

टिसिएमका विशेषज्ञ डा झाङ बोलीका अनुसार यस्ता किसिमका स्वास्थ्य संकटका बेलामा उचित औषधिको प्रयोग गर्नु नै सबैभन्दा राम्रो कुरा हो।

तियान्जिन हस्पिटल अफ ट्रेडिसनल चाइनिज मेडिसिनका प्रमुख झाङ बोली भन्छन्‚ ‘यी चिनियाँ प्राचीन औषधिहरूको मूल्यांकन सम्बन्धित चिनियाँ प्रशासनले गरेर त्यसको विशेष परीक्षणपछि मात्र सरकारले यस्तो निर्णय गरेको हो। यस्ता प्रकारका औषधि चीनमा जहाँ पनि प्रयोग भइरहेका छन्। यसको पर्याप्त प्रमाण यसअघि गरिएका विभिन्न परीक्षणहरूले दिइसकेका छन्। त्यसैले भविष्यमा फेरि पनि यस्तै किसिमका महामारीहरू देखिए भने यो पनि एउटा नयाँ विकल्प हुन सक्छ।’

विशेषगरी यी औषधी क्विन्गन ग्र्यानुल्स‚ लियान्हुवा क्विन्ग्वेन क्याप्सुल र सुएबिजिङ इन्जेक्सन‚ कोरोना संक्रमित ७० हजारभन्दा बढी मानिसमा प्रयोग गरिएको थियो। टिसिएमका अनुसार यी औषधि अन्यका तुलनामा धेरै नै प्रभावकारी देखिएको थियो।

बेइजिङ हस्पिटल अफ ट्रेडिसनल चाइनिज मेडिसिनका प्रमुख लिउ क्विन्ग्वान भन्छन्‚ ‘यो अवस्थासम्म आइपुग्नका लागि धेरै स्वास्थ्यकर्मीहरूले गएको दुई महिनासम्म आफ्नो ज्यानको बाजी लगाएका छन्।’

‘चिनिया स्वास्थ्यकर्मीहरू यो प्राचीन चिनियाँ उपचार विधीलाई विश्वसामू पुर्‍याउनका लागि लालायित छन्,’ झाङले भने‚ ‘थाइल्यान्डले पनि लियान्हुवा क्विन्ग्वेन नामको औषधिका लागि 'ग्रिन सिग्नल' दिइसकेको छ भने फ्रान्सले यसमाथि क्लिनिकल ट्रायल गर्नका लागि तयार रहेको बताएको छ।’ सिजिटिएनबाट

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।