काठमाडौं – केही हप्ताअघि रिलिज भएको फिल्म 'शत्रुगते'मा देखिएकी प्रियंका कार्की आउँदो चैत्र ३० गते रिलिज हुने 'लिलिबिली'मा देखिँदैछिन्। त्यसको दुई हप्तापछि बैसाख १४ पनि 'कोहलपुर एक्प्रेस'मार्फत उनी पुनः हलहरुमा छाउने पक्का छ। यसैले देखाउँछ प्रियंकाको व्यस्त सेड्युल। उनी अभिनित फिल्म नेपाली हलहरुमा एकपछि अर्को गर्दै लागिरहनु दर्शकहरुका लागि खासै नौलो समाचार होइन।
तर उनी पेसा र लाइफ 'स्ट्यान्डर्ड' परिपूर्ति गर्नकै लागि धेरै फिल्ममा अभिनय गर्नु परेको बताउँदै आएकी छन्। तर के उनका पछिल्ला फिल्म अघिल्लाभन्दा अब्बल बनेका छन्? बाक्लो व्यस्ततासँगै उनीमाथि चुनौती पनि उत्तिकै थपिएको छ। संयोग, उनकै अभियन रहेका ‘कोहलपुर एक्प्रेस’ र ‘ह्याप्पी डेज’ आउँदो बैसाख १४ गते एकसाथ प्रदर्शनमा आउने भएका छन्। दुवै फिल्ममा उनी मुख्य भूमिकामा छिन्। आफ्नो फिल्मको प्रदर्शन मिति एकै दिन तोकिएकोमा भने उनी यतिबेला दबाबमा छिन्।
‘फिल्म सफल बनाउन निकै मेहनत गर्नुपर्छ,' उनले नेपाल लाइभसँग भनिन्, 'तर त्यसको मूल्यांकन नगरी एउटै मितिमा रिलिज गर्नु कलाकारमाथिको सरासर अन्याय हो।’। फिल्मलाई एकसाथ प्रदर्शनमा नल्याउन बारम्बार आग्रह गरे पनि ह्याप्पी डेज टिमले आफ्नो कुरा सुन्नै नचाहेको उनले आक्रोश पोखिन्। कोहलपुर एक्प्रेसको प्रदर्शन मिति भने पूर्वनिर्धारित थियो। फिल्मले निर्माण घोषणासँगै प्रदर्शन मितिबारे जानकारी गराइसकेको थियो। तर ह्याप्पी डेजले भने आफ्नो प्रदर्शन मिति पाँचौं पटकसम्म हेरफेर गर्दै बैसाख १४ लाई नै पक्का गरेको छ।
ह्याप्पी डेजका निर्देशक मिलन चाम्स भने फिल्म एकसाथ प्रदर्शनमा आउनु चाहना नभई बाध्यता भएको बताउँछन्। उनले फिल्ममा निर्देशनसँगै लगानी पनि गरेका छन्। कोहलपुर एक्सप्रेसको निर्माता भने केकी अधिकारी हुन्। केकी चाम्सका घनिष्ठ साथी हुन् भने प्रियंकालाई उनले बहिनी मान्दै आएका छन्। मिति नजुधाउन प्रियंकासँगै केकीले पनि चाम्सलाई बारम्बार आग्रह गरिन्। तर उनले परिवर्तन गर्न सकेनन्। ‘फिल्मलाई एक हप्तापछि मात्र प्रदर्शनमा ल्याउन फिल्म युनिटसँग बारम्बार छलफल गरे पनि सहमति हुन नसकेकाले यस्तो बाध्यतामा फसेको हुँ,’ चाम्सले नेपाल लाइभसँग कुरा गर्दै भने।
बैसाख १४ गते हलमा नल्याउने हो भने युट्युबमै सार्वजनिक गर्ने भन्दै फिल्मका अन्य लगानीकर्ता तथा वितरकले अडान राखेकाले आफू अप्ठेरोमा परेको उनले सुनाए। प्रियंका र केकी लगायत कोहलपुर एक्प्रेस युनिट यतिबेला चाम्सँग निकै रुष्ट देखिएका छन्। ‘कलाकारहरुले अभिनयमा निकै दखल राखे पनि कतिपय पोस्ट प्रोडक्सनका कुराहरु उनीहरुलाई थाहा नहुन सक्छ,' उनले तर्क गरे, 'त्यसैले उनीहरु रुष्ट हुन पनि अस्वाभाविक होइन।' आफ्नो कारणले मात्र नभई बाध्यताले फिल्म जुध्न पुगेकोमा आफूले केकी र प्रियंकासँग माफी मागिसकेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791562069.png)
-1786602170.png)
