समाचार

रोल्पाको त्रिवेणी गाउँपालिकाका सबै माविमा नर्सिङ सेवा

महेश न्यौपाने बुधबार, वैशाख ३, २०७७ ०९:५०

रोल्पा- रोल्पाको त्रिवेणी गाउँपालिकाका १२ विद्यालयमा नर्सिङ सेवा सुरु गरिएको छ। नेपाल सरकार र स्थानीय सरकारको सहयोगमा गाउँपालिकाका ती विद्यालयले नसिङ सेवा सुरु गरेका हुन्। विद्यालय नर्सिङ सेवाका लागि गाउँपालिकाले खुल्ला प्रतिस्पर्धाको आधारमा १२ जना नर्स छनौट गरिसकेको छ।

नर्सिङ सेवा उपलब्ध गराउने विद्यालयहरुमा जनजागृती मावि जुगार, सरस्वती मावि काउलाबोट जुगार, शिद्धरत्न मावि हान्जावाङ जुगार, सरस्वती मावि लिडदुङ बुढागाउँ, जनकल्याण मावि सिम्पानी बुढागाउँ र वीरेन्द्र मावि गाङ गैरीगाउँ रहेका छन्। त्यस्तै, गोबिन्द मावि गैरीगाउँ, अरनिको मावि नुवागाउँ, शुक्र मावि झुमलुङ नुवागाउँ, शिव मावि द्वारपानी नुवागाउँ, भगवती मावि दहवन नुवागाउँ र बालकल्याण मावि करेटी रहेको गाउँपालिकाले जनाएको छ।

‘नेपाल सरकारको प्रचलित सेवा सुविधा पाउने गरी नियुक्त नर्सहरुले गाउँपालिकाभित्रका १२ वटा माध्यमिक विद्यालयहरुमा सेवा दिने छन्। विद्यालयमा स्वास्थ्य सेवाको काम गर्ने गरी कार्यसम्पादन तोकिएको छ। त्यसैका आधारमा काम गर्छन्’, गाउँपालिकाका प्रमुख प्रशासकीय अधिकृत निमबहादुर केसीले भने।

नियुक्ति लगत्तै विद्यालय बन्द भएका कारण उनीहरु अझै कार्यक्षेत्र जान पाएका छैनन्। उनीहरुलाई कोरोना हेल्थ डेस्कमा खटाइएको छ।

विद्यालय नर्सहरुको खर्च व्यवस्थापन नेपाल सरकारको ९० प्रतिशत र गाउँपालिकाको १० प्रतिशत बजेटवाट गरिने केसीले जानकारी दिए।

नर्सहरुले आफू खटिएको विद्यालयमा नियमित चेकजाँचका साथै विभिन्न स्वास्थ्य तथा सचेतनामूलक कार्य गर्नेछन्। पोषणयुक्त खानेकुराको महत्त्व बुझाउँदै विद्यार्थीहरुलाई त्यस्ता खानाको प्रयोगमा जोड दिने कामको जिम्मेवारी पनि उनीहरुलाई छ।

विद्यालयमा स्वास्थ्य उपचारका लागि आवश्यक सम्पूर्ण उपकरण भने स्वास्थ्य मन्त्रालयले व्यवस्था गर्ने जनाइएको छ।

विद्यालय स्वास्थ्यको सबैखाले सेवा र व्यवस्थापन नर्सहरुले गर्नेछन्। किशोरकिशोरीहरुको प्रजनन तथा यौन स्वास्थ्यका बारेमा सचेतीकरण, महिनाबारी व्यवस्थापन, हिंसाबाट बालबालिकालाई कसरी बचाउने भन्ने सीप हस्तान्तरणको जिम्मेबारी पनि नर्सको हुने बताइएको छ।

विद्यालयमा खानेपानी तथा सरसफाई सञ्चालन र व्यवस्थापन, विद्यालय स्तरबाटै जुकाको औषधि वितरण, खोप कार्यक्रम र स्वास्थ्य शिक्षा सञ्चालन गरिने छ। विद्यालयमा प्राथमिक उपचार र आवश्यकता अनुसारको स्वास्थ्य परीक्षणको जिम्मेवारी समेत नर्सहरुलाई दिइएको छ।

विद्यार्थीहरुले लामो समय विद्यालयमा व्यतित गर्दा उनीहरुको स्वास्थ्य संवेदनशीलता पनि उत्तिकै ध्यान दिनुपर्ने विषय भएकाले यस खालको कार्यक्रम ल्याएको हो। संघीय सरकारले प्रदेश ५ को बाँके जिल्लामा पर्ने राप्ती सोनारी गाँउपालिका र रोल्पाको त्रिवेणी गाउँपालिकामा यस्तो कार्यक्रम सञ्चालन गरेको छ।

रोल्पाका बालकल्याण नमुना मावि, लिवाङ र मावि मौलाबोट, रांकोटले यस पूर्व नै आन्तरिक स्रोतबाट खर्च व्यवस्थापन गर्नेगरी विद्यालयमा नर्सिङ कार्यक्रम सुरु गरिसकेका थिए।