काठमाडौं– सरकारले कोरोना भाइरसको संभावित संक्रमणका कारण उत्पन्न प्रतिकूल अवस्थाबाट प्रभावित असंगठित क्षेत्रमा कार्यरत श्रमिक तथा असहायहरुलाई राहत उपलब्ध गराउने मापदण्ड ल्याएको छ।
कसले पाउँछन् राहत?
पसलबाट ग्राहकको घरसम्म सामान ओसारपसार गर्ने श्रमिक, पर्यटक, भरिया, निर्माण सामग्री भरिया तथा सवारी साधन नचल्ने बाटोमा आवश्यक वस्तु ओसारपसार गर्ने व्यक्ति, ट्रक, ट्रिपर, भ्यानबाट सामान लोड, अनलोड गर्ने श्रमिक, अन्य व्यक्तिको खेतबारीमा दैनिक ज्याला लिने गरी काम गर्ने कृषि मजदूर तथा आफ्नो नातेदारबाहेकका व्यक्तिको परिवारमा दैनिक ज्यालादारीमा सरसफाइ, शिशु तथा ज्येष्ठ नागरिक स्याहार जस्ता सेवा गर्ने व्यक्तिलाई राहत उपलब्ध गराउने मापदण्डमा उल्लेख छ।
यसैगरी गिटी कुट्ने, बालुवा चाल्ने तथा इँटाभट्टामा काम गर्ने मजदूर, निर्माण कार्यमा दैनिक ज्यालादारीमा काम गर्ने डकर्मी, हेल्परलगायतका मजदूर, नाङ्लो पसले, दैनिकरूपमा पत्रिका वितरक, साना फुटपाथ पसले, ठेलागाडा तथा साइकलमा सामान बिक्री गरी गुजारा गर्ने तथा अन्य व्यक्तिको पसलमा काम गर्ने मजदूरलाई पनि राहत उपलब्ध गराउनुपर्नेछ।
अर्थ मन्त्रालयका अनुसार अन्य व्यक्तिको मालबाहक सवारी तथा डेलिभरी भ्यान चलाउने चालक तथा त्यसका सहचालक, दैनिक ठेक्का वा ज्यालामा ट्याक्सी तथा टेम्पो चलाउने सवारी चालक, रिक्सा तथा ठेलागाडा चालक, सवारी साधनको मर्मत सम्भार गर्ने ग्यारेजमा काम गर्ने मिस्त्री तथा मजदूर, अन्य व्यक्तिको गार्मेन्ट, कार्पेट, टेलरिङ, बुछा तथा जर्ती भर्ने र कपडा पसलमा दैनिक ज्यालादारीमा काम गर्ने मजदूर र स्थानीय तहमा दैनिक ज्यालादारीमा काम गर्ने अन्य व्यक्ति राहत पाउन योग्य हुनेछन्।
कति पाउँछन् राहत?
सरकारले यसरी राहत पाउन योग्य नागरिकहरुलाई कति राहत दिने भनेर कोटा निर्धारण गरेको छ। जसअनुसार ६ किसिमका खाद्य एवं उपभोग्य वस्तु राहतस्वरूप पाउँनेछन्।
सरकारी मापदण्डअनुसार प्रति परिवार चामल ३० किलो, दाल ३ किलो, नुन २ प्याकेट, खाने तेल २ लिटर, साबुन ४ वटा र चिनी २ किलो राहत उपलब्ध हुन्छ।
यसरी राहत दिइसकेपछि स्थानीय तहले हरेकको लगत राख्नुपर्छ। साथै २ जनासम्मको परिवारका लागि उल्लेखित राहतका आधा र त्यसभन्दा धेरै परिवार सदस्य भए पूरै राहत पाइन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
