काठमाडौं– रोम सुनसान छ। वरपर सन्नाटा छ। कोरोना संक्रमणबाट मृत्यु हुनेहरुको संख्या दिनानुदिन बढ्दैछ। यतिबेला आफ्नो चिन्ता आफूलाई भन्दा पनि बढी परिवारलाई छ।
‘यस्तो अवस्थामा आफ्नै देश फर्किएर परिवारहरुसँगै बस्न रहर कसलाई हुँदैन?’ इटालीको रोम सहरबाट सुनसरीका दिवस सुवेदी सरकारलाई प्रश्न तेर्स्याउँछन्।
‘यो त्रासैत्रासका बीच आफ्नो माटोमा टेक्नमात्रै पाए पनि आधा त्रास हराउँथ्यो। बरु हामी क्वारेन्टाइनमा बस्थ्यौँ। सरकारले पैसा तिरेर राख्न नसके आफैँ खर्च गरिन्थ्यो।’ दिवस सामाजिक सञ्जालमार्फत नेपाल लाइभसँग गुनासो पोख्छन्।
अरु देशले विभिन्न मुलुक पुगेको अवस्थामा समस्यामा परेका आफ्ना नागरिकहरुलाई उद्धार गरेको खबर सुन्दा खुब लोभ लाग्छ उनलाई।
तर नेपाल सरकारले आफ्नै नागरिकहरुको बाटो छेक्दा खुब दुःख लाग्छ।
‘रेमिट्यान्सको भरमा बाँचेको सरकारलाई के अब हामीले रेमिट्यान्स पठाउन पनि रोक लगाउनु?’ उनी फेरि अर्को प्रश्न तेर्स्याउँछन्।
संयुक्त अरब इमिरेट्स (युएई) बाट उदयपुरका शिवप्रसाद लुँइटेलको गुनासो पनि उस्तै छ।
‘भिसा रद्ध भएको छ। यहाँ लकडाउन छ। यस्तो अवस्थामा आफ्नै देश फर्किन्छु भन्दा पनि सरकारले बाटो बन्द गरिदिएको छ‚’ केही समयदेखि युएईमा शिवप्रसाद अलपत्र छन्।
रोजगारीको सिलसिलामा उनी युएई पुगेको लगभग ३ वर्ष भयो। आफू कार्यरत कम्पनीमा भन्दा अर्को कम्पनीमा पारिश्रमिक र सेवासुविधा राम्रो भेटेपछि सो कम्पनीमा काम गर्न राजीनामा दिएकै बेला कोरोना भाइरस संक्रमण फैलियो।
उता राजीनामा दिएर बसेका शिवप्रसादले नयाँ कम्पनीमा काम सुरु गर्न नपाउँदै लकडाउन भयो। भिसा रद्ध पनि यही समयमा भयो। नेपाल सरकारले पनि कोरोना संक्रमण नियन्त्रणका लागि भन्दै विदेशबाट आउने नेपालीहरुलाई प्रतिबन्ध लगायो।
‘आफूसँग पैसा पनि धेरै छैन, यो अवस्था कहिलेसम्म रहने हो कुनै टुंगो छैन। ममात्र होइन‚ सरकारले आफ्ना नागरिकलाई पनि केही समय मुलुक प्रवेशमा प्रतिबन्ध लगाउँदा थुप्रै नेपालीहरु समस्यामा छौँ। यस्तो संकटको अवस्थामा सरकारले रोक लगाउँदा दुःख लागेको छ’ उनी भन्छन्।
सरकारले परदेशमा रहेका नेपालीहरुलाई स्वदेश फर्कन प्रतिबन्ध होइन‚ क्वारेन्टाइनमा बस्ने व्यवस्था मिलाउनुपर्ने उनको भनाइ छ।
सरकारले परदेशबाट आउनेहरुलाई क्वारेन्टाइनमा बस्ने व्यवस्था मिलाउनुको सट्टा स्वदेश फर्कन प्रवेश रोक लगाउनु गैह्र जिम्मेवारी रहेको कतारबाट दुर्गा जिसी बताउँछन्।
कतारमा लेवर काम गर्दै आएका उनी १७ दिनदेखि क्वारेन्टाइनमा छन्। उनीसँगै ३ सय साथीहरु पनि सेल्फ क्वारेन्टाइनमा छन्।
कतार सरकारले यो आपतकालीन समयमा सबै श्रमिकहरुलाई पारिश्रमिक तथा भत्ता दिने निर्णय गरे पनि उनीहरुलाई कम्पनीले खानका लागि २ सय कतारी रियालमात्रै दिने भनिरहेको छ।
उनी भन्छन्, ‘हामीले पारिश्रमिक पाउने ग्यारेन्टी पनि छैन। एउटै कोठामा सयौँको संख्यामा बस्दा कोरोना संक्रमणको जोखिम पनि छ। आफ्नै देश फर्किन्छु भन्दा बाटो बन्द छ। हामीलाई कति पीडा।’
भारतको मुम्बईस्थित एक होटलमा मजदूरी गर्दै आएका कैलालीका लक्ष्मणबहादुर सुनार पनि आफ्नो सरकारले परदेशीलाई पराईजस्तै व्यवहार गरेको बताउँछन्।
‘अरु सबै मुलुकले समस्यामा परेका नागरिकलाई उद्धार गरिरहेका छन्। हामी नेपालीको कस्तो दुर्भाग्य। यस्तो महामारीको बेला सरकारले बाटो बन्द गरेर राखेको छ।’ सुनार सुनाउँछन्।
विश्वमा फैलिँदै गएको कोरोना भाइरस न्यूनीकरणका लागि भन्दै यूरोप, खाडी, पश्चिम एसिया, दक्षिण कोरिया, मलेसिया, टर्की, जापान लगायत मुलुकहरुबाट चैत ७ गतेदेखि वैशाख ३ गतेसम्म नेपाली तथा विदेशी कोही पनि नेपाल आउन नपाउने स्पष्ट पारेको छ। अहिले देश पुरै लकडाउन छ।
आन्तरिक तथा अन्तर्राष्ट्रिय उडानहरु आपतकालीन अवस्थामा बाहेक बन्द छन्। अन्य मुलुकहरुले विदेश गएका आफ्ना नागरिकहरुलाई स्वास्थ्य परीक्षण गर्ने तथा क्वारेन्टाइनमा १४ दिन राखेपछि घर फर्किन पाउने व्यवस्था गरे पनि नेपाल सरकारले भने प्रवेशमा पूर्ण प्रतिबन्ध लगाउँदा विदेशमा रहेका नेपालीहरु समस्यामा परेका हुन्।
भारतका नाका हुँदै नेपाल प्रवेशमा रोक लगाइएपछि मजदुरीका लागि भारत पुगेर फर्किएका नेपालीहरु सीमानामा केही दिन अलपत्र परे।
विपतको बेलामा सीमानामा आएका नागरिकहरूलाई सरकारले बेवास्ता गरेपछि सरकार निर्दयी भएको भन्दै चौतर्फी आलोचना भएको थियो। अझै पनि उनीहरू सीमानामै छन्। भारत सरकारले क्वारेन्टाइनमा राखी रासनपानीको व्यवस्था गरिदिएपछि केही सहज भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
