काठमाडौं–लकडाउनको अवस्थामा पनि बिमा सेवा सुचारु भएको छ। बिमा कम्पनीहरुले अनलाइन प्रणालीबाट बिमाको दाबी लिने तथा भुक्तानीको दिने प्रक्रिया जारी राखेका हुन्।
बिमा कम्पनीहरुले लकडाउनको अवधिमा पनि दाबी भुक्तानी गरिरहेको बिमा समितिका कार्यकारी निर्देशक राजुरमण पौडेलले जानकारी दिए। कम्पनीहरुलाई आवश्यक निर्देशन दिन समितिका केही कर्मचारीहरु कार्यालयमै बसिरहेको पौडेलले बताए।
समितिले सम्पूर्ण बिमा कम्पनीहरुलाई दाबी भुक्तानीका लागि अलर्ट भएर बस्न निर्देशन दिएको छ। कोरोना भाइरसले पुर्याउन सक्ने क्षति न्यूनीकरणका लागि सरकारले बिमा समितिलाई आंशिक रुपमा कार्यालय खोलेर बस्न निर्देशन दिएको छ।
हाल समितिमा राजुरमण पौडेको नेतृत्वमा केही कर्मचारी परेको बेलामा आवश्यक काम गर्ने गरी सतर्क अवस्थामा छन्। लकडाउनकै अवधिमा समितिले केही दिनअगाडि बिमा कम्पनीहरुलाई चैत महिनाभर बिमा शूल्क संकलन नगर्नेसहितका निर्देशन जारी गरेको थियो।
हाल समितिले आफूले यसअघि जारी गरेका निर्देशनको पालना भए नभएको हेरिरहेको छ। यदि यस अवधिमा ठूला दाबी भुक्तानी गर्नुपर्ने अवस्था आएमा समितिले सहजीकरण गर्नेछ। सम्पूर्ण कम्पनीहरुलाई अनलाइन प्रणीबाट दाबी भुक्तानीको प्रकृया अगाडि बढाउन समितिले निर्देशन दिएको छ।
बीमितले आफूलाई भएको क्षतिको विवरण अनलाइन प्रणालीबाट कम्पनीमा जानकारी दिन सक्नेछन्। अनलाइन भएको कम्पनीमा इमेलमार्फत जानकारी दिन सक्नेछन्। आवश्यक कागजपत्र अनलाइनबाटै उपलब्ध गराउन सकिने छ। बीमित दिएको कागजपत्र तथा जानकारीका आधारमा कम्पनीहरुले दाबी भुक्तानी गर्न सक्ने पौडेलले बताए।
पुरै देश नै लक भएको हुँदा ठूला दुर्घटनाको जोखिम कम छ। तर सानातिना हुने दुर्घटनाको पनि दाबी भुक्तानी नरोकियोस भनेर कम्पनीहरुलाई आवश्यक निर्देशन जारी गरिएको पौडेलले बताए।
कोरोनाको संक्रमणबाट हुने मृत्युलाई बिमाले कभरेज नगर्ने पौडेलले बताए। तर सरकारले केही राहतको प्याकेजसहित बिमा कम्पनीहरुले पनि केही हदसम्म दावी भुक्तानी गर्नुप¥यो भने तयार रहनुपर्ने उनले उल्लेख गरे। उनले भने, ‘नियम अनुसार दाबी भुक्तानी गर्न नमिले पनि सरकारसँग समन्वय गरेर आवश्यक निर्देशन जारी गर्ने छौ।’
कोरोनाका कारणले बीमितको मृत्यु भएमा सरकारको केही राहत तथा सहयोगसहित बिमा कम्पनीहरुलाई पनि केही हदसम्म योगदान गर्न लगाउन सकिने पौडेल बताउँछन्। सरकारले पनि बिमा क्षेत्र यस्तो बेला अत्यावश्यक भएको हुँदा समितिसँग आवश्यक परामर्श लिन अलर्ट रहन अनुरोध गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
