पत्रिका पढ्दै भूमि व्यवस्था मन्त्री पद्मा अर्यालको संग्रहित तस्बिर। तस्बिर :http://padmaaryal.com
काठमाडौं- दैनिक धपेडीमा रहने भूमि व्यवस्थामन्त्री पद्मा अर्याल कोरोना भाइरस संक्रमण रोक्न सरकारले लकडाउन गरेपछि केही फुर्सदमा छिन्। कोरोना भाइरस नियन्त्रणमा गर्नुपर्ने महत्वपूर्ण काम उनको मन्त्रालय अन्तर्गत पर्दैन पनि। तैपनि उनी चासो भने राख्छिन् रे। केही अपर्झट काम परे मन्त्रालयमा पुग्ने गरेकी उनले नेपाल लाइभकर्मी लिलु डुम्रेसँग बाँडेको लकडाउन अनुभव:
लकडाउनपछिको दैनिकीमा स्वभाविक फेरबदल भएको छ। अन्य दैनिक कार्यमा परिवर्तन आएपनि बिहान उठ्ने क्रममा भनी लकडाउन अघि र पछि पनि उस्तै छ। म सबेरै ब्युँझन्छु।
लकडाउनअघि बिहान उठेर नियमित कामका लागि तयारी हुनुपर्ने भएकाले अलि बढी हतार पनि हुन्थ्यो। पुल्चोकस्थित मन्त्री निवासमा बिहानै काम लिएर आउनेको संख्या धेरै नै हुन्थ्यो। मन्त्री निवासमा आउने क्रम अहिले नगण्य मात्र छ। निवासमा आउन नमिल्ने भएपछि गर्नै पर्ने काम भए फोनबाटै हुने गरेको छ।
मन्त्रालय, सरकारी बैठक तथा जिल्लाबाहिरका कार्यक्रमले फुर्सद नै हुँदैन्थ्यो। व्यक्तिहरु घरभित्र बस्नुपर्ने अवस्थाले गर्दा अन्य काम अहिले शून्य जस्तै छ। मन्त्रालयमा गर्नै पर्ने अत्यावश्यक कामबाहेक अरु काम छैन। सरकारले कर्मचारीलाई अत्यावश्यक काममाबाहेक बिदा दिएको छ।
मैले आकस्मिक काम परेका बेला बोलाएका कर्मचारी मात्रै आउनुभएको छ। अत्यावश्यक कामका लागि मात्र आउन कर्मचारीलाई निर्देशन समेत दिने गरेकी छु। मन्त्रालयमा आएर छलफल गर्ने वातावरण छैन अहिले। तर, अहिले म मन्त्रालयकै काममा छु। मन्त्रालयमै छु। (मन्त्रीसँग वार्ता हुँदा दिउँसोको १ बजेको थियो।) आकस्मिक काम परे छोटो समयमा बैठक सक्ने गरी मन्त्रालयमा जुट्ने गरेका छौं।
कोरोना भाइरसका कारण मन्त्रालयको कामको चापमा धेरै कमी भएको छैन। तर, काम थाती रहेका छन्। नगरी नहुने काम मन्त्रालयबाट भएका छन्। यो बेला मन्त्रालयका कार्यभन्दा नागरिकलाई कोरोना भाइरसको संक्रमणबाट बच्ने उपायतिरै हाम्रो कदम बढेको छ।
लकडाउनअघि दिनमा सयौं फोन आउँथे। त्यो अहिले ह्वात्तै घटेको छ। पार्टी, सर्वसाधारण, मन्त्रालयका कामका बारेमा फोन आउने क्रम घटेको छ। केही बुझ्नपरे म आफै धेरैलाई फोन गर्छु।
कामको चाप घटेकाले विगतमा गर्न बाँकी रहेका र मन्त्रालयगत अध्ययन गर्नुपर्ने विषयमा ध्यान केन्द्रित गरेकी छु। व्यस्तताले पढ्न मन लागेका पुस्तक पनि अध्ययन गर्न समय हुँदैनथ्यो। अहिले पुस्तक पढ्ने समय समेत निस्किएको छ। समाचार र सामाजिक सञ्जाल पनि हेर्ने समय पनि निस्किएको छ। अहिले सामाजिक सञ्जाल पहिलाभन्दा बढी हेर्छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
