काठमाडौं- राष्ट्रिय सभाका अध्यक्ष गणेश तिमिल्सिनाले विश्वभरी फैलिएको कोरोना भाइरसबाट बच्न सरकारले जारी गरेको निर्देशन पालना गर्न आग्रह गरेका छन्।
आइतबार विज्ञप्ति जारी गर्दैै तिमिल्सिनाले सरकारलाई पनि अत्यावश्यकीय वस्तुहरु उपलव्ध गराउन आग्रह गरेका छन्। ‘सरकारले आफ्नो तर्फबाट यसको रोकथाम, नियन्त्रण, परीक्षण, उपचार लगायतको कार्यमा गरिरहेका पहल सकरात्मक छ’, विज्ञप्तिमा भनिएको छ, ‘यस रोगको पहिचान, परीक्षण र उपचार गर्न औषधी, प्रयोगशाला सामाग्री र पीपीई लगायतका सामानहरु देशभरका अस्पतालमा पर्याप्त मात्रमा उपलब्ध गराउन सरकारको थप सक्रियता जरुरी छ।’
यस विषम परिस्थितिको सामना गर्न नेपाल सरकार, सम्पूर्ण राजनीतिक दल, स्वास्थ्यकर्मी, सुरक्षाकर्मी, आम सञ्चारमाध्यम, नागरिक समाज तथा सम्पूर्ण नागरिकको सकारात्मक भूमिका र साथ जरुरी हुने उनको विज्ञप्तिमा उल्लेख छ।
विश्व स्वास्थ्य संगठन र नेपाल सरकारले जारी गरेका निर्देशन, आचारसंहिता, सावधानीका उपाय र आह्वानलाई परिपालना गरी रोगबाट सुरक्षित रहन तथा परिवार र समाजलाई सुरक्षित राख्न उनले अनुरोध गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
