काठमाडौं- भारतको सबैभन्दा ठूलो कमर्सियल सवारी उत्पादक टाटा मोटर्सले नै उत्पादन गर्दै आएको कार अब अलग्गै कम्पनीमार्फत् व्यापार हुने भएको छ। कार (प्यासेन्जर कार) र इलेक्ट्रिक सवारीको व्यवसाय अलग्गै सब्सिडरीमार्फत् हुने टाटा मोटर्सले विज्ञप्ति जारी गरेर जनाएको छ।
हाल टाटा मोटर्सको इलेक्ट्रिक सवारीको (इभी) प्रमुख तथा कर्पोरेट स्ट्याटेजी हेर्न शैलेश चन्द्रलाई नयाँ पिभी (प्यासेन्जर भेइकल) विजनेश भेन्चरको प्रमुख तोकिएको छ। उनलाई तोकिएको उक्त पद १ अप्रिल २०२० देखि कार्यान्वयनमा आउने छ। हालका पिभी विजनेश प्रमुख मायांक पारीकको पदावधि भने २०२१ को फेब्रुअरीबाट मात्र अन्त्य हुनेछ।
प्यासेन्जर कारको विजनेशलाई तत्कालै अलग्याएर जानुको कारण रणनीतिक साझेदार र कम्पनी दुवैलाई फाइदा पुग्ने पहिलो कदम हुने टाटा मोटर्सद्वारा जारी विज्ञप्तिमा उल्लेख छ। उक्त साझेदारीले उत्पादन, आर्किटेक्चर, पावरट्रेन्स, आधुनिक प्रविधि तथा पुँजीमा सहयोग पुग्ने विश्वास टाटा मोटर्सको छ।
कमर्सियल भेइकलको व्यवसायलाई सहयोग पुगोस् र ज्यागुअर ल्याण्ड रोभरबाट आएको डेभिडेन्डले टाटाको कार व्यापार चलिरहने विश्वास टाटा मोटर्सले लिएको छ। विगतमा पनि समय समयमा ग्रुप पिएसए, फक्सवागन ग्रुप र चेरी आटोमोबाइल्ससँग रणनीतिक साझेदारीको विषयमा छलफल भएको थियो।
आगामी एक वर्षभित्रमा टाटा मोटर्सले भारतीय बजारमा इलेक्ट्रिक सवारीसहित प्यासेन्जर कारको विजनेश अलग्गै सब्सिडरीमार्फत् छुट्याउने योजना तय गरेको छ। टाटा मोटर्सको बोर्डमा यो प्रस्ताव सैद्धान्तिक सहमतिका लागि पुगिसकेको छ।
टाटा मोटर्सले नितान्त नयाँ प्यासेन्जर कार पोर्टफोलियो बनाउने छ। त्यो आजको दुनियाको अत्याधुनिक प्रविधिमा आधारित हुनेछ। तर, यो कार्यका लागि हाल विश्वभर महामारीको रूपमा फैलिएको कोरोना भाइरस (कोभिड १९) बाधक बनेको छ। कोरोना भाइरसको संक्रमणले नयाँ विजनेश स्ट्याटेजीमा केही चुनौती थपेको कम्पनीले जनाएको छ।
नयाँ साझदारीमा मल्टिपल ग्योवल आटोमेकरहरूलाई समावेश गर्ने योजनामा कम्पनी रहेको छ। यसले गर्दा छोटो अवधिमा तुलनात्मक रूपमा सस्तो र प्रविधियुक्त कार उत्पादन गर्न सकियोस् भन्ने चाहना रहेकाे कम्पनीले उल्लेख गरेकाे छ।
पछिल्लो केही वर्षयता टाटा मोटर्सको प्यासेन्जर कार विजनेश आकर्षक रूपमा बढेको देखिन्छ। टाटाको प्यासेन्जर कार विजनेश सफल हुनमा टियागो, टिगोर, नेक्सन, हेक्जा, ह्यारियरको उत्साहजनक बिक्री पनि हो। हालसालै सार्वजनिक भएका अल्ट्राेज तथा नेक्सन इभीले समेत बजार तताई रहेको छ।
टाटा मोटर्स सन् १९८८ बाट टाटामोबाइल सार्वजनिक गर्दै प्यासेन्जर कार बजारमा प्रवेश गरेको हो। त्यस्तै सन् १९९१ मा टाटाले टाटा सइरा सार्वजनिक गरेको थियो। टाटाले सन् १९९८ मा पुर्ण रुपको प्यासेन्जर कार इन्डिका बजारमा ल्याएको थियो। त्यस्तै टाटा मोटर्सले सन् २००८ मा विश्वकै सस्तो कार टाटा नानो बजारमा ल्याएको थियो।
नेपालमा सन् २००२ देखि टाटाका कार बिक्री हुँदै आएको छ। नेपाली बजारमा टाटाका कमर्सियल तथा प्यासेन्जर कार सिप्रडी ट्रेडिङले बिक्री गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
