भैरहवा- रुपन्देहीको ओमसतिया ५ छन्दीका १० वर्षीय आकाश हरिजन सदाजस्तै गत मंगलबार पनि विद्यालय गए। समयमै विद्यालय पुगे। उनीलगायत थुप्रै विद्यार्थीले विद्यालयबाट पाउने छात्रवृत्ति पाए।
सिक्टहन माविमा कक्षा ३ मा पढ्ने हरिजनले दलित कोटाबाट छात्रवृत्ति पाएका हुन्। उनले विद्यालयबाट छात्रवृत्तिबापत ४ सय रुपैयाँ पाएका थिए।
चार सय रुपैयाँ छात्रवृत्ति पाएपछि सोही विद्यालयमा कक्षा ८ मा पढ्ने ओमसतिया ५ ढोलवजाका १५ वर्षीय दिलीप यादवले हरिजनलाई पछ्याउन थाले। विद्यालय छुट्टी भएपछि यादवले आफ्नै साइकलमा हरिजनलाई बसालेर घरतर्फ जाने भन्दै विद्यालयबाट हिंडे। तर साँझसम्म विद्यालय गएको छोरो फर्केर नआएपछि हरिजनका बाबुआमा आत्तिए। छोराको खोजी गर्न थाले। खोजी गर्ने क्रममा छोराका साथीहरुले दिलीपसँग साइकलमा गएको भनेपछि बुधबार उनीहरुले छोरा हराएकाले खोजी गरिदिन भन्दै प्रहरीमा उजुरी दिए।
बालकका बाबु ज्वाला हरिजनको उजुरीपछि जिल्ला प्रहरी कार्यालयको टोलीले १५ वर्षीय दिलीपलाई नियन्त्रणमा लियो। नियन्त्रणमा लिएपछि प्रहरीसँग हत्या गरेको स्वीकारेका दिलीपले हरिजनलाई घरदेखि डेढ किलोमिटर टाढा गहुँबारीमा लगेर हत्या गरेको बताए। उनलाई लिएर हरिजनको शव खोज्न हिँडेको प्रहरीले बिहीबार दिउँसो टाउकोमा ढुंगा र इटाले हानेर हत्या गरेको अवस्थामा गहुबारीमा हरिजनको शव फेला पारेको जनाएको छ।
जिल्ला प्रहरी कार्यालय रुपन्देहीका प्रवत्ता प्रहरी नायब उपरीक्षक खडकबहादुर खत्रीले छात्रवृत्ति पाएको चार सय रुपैयाँ प्राप्त गर्ने लोभमा दिलीपले हरिजनको हत्या गरेको स्वीकार गरेको बताए। 'छात्रवृत्ति पाएको चार सय रुपियाँ नदिएपछि हरिजनको टाउकोमा ढुंगा र इटाले हानेर हत्या गरेको हुँ', अभियुक्त दिलीपको भनाइ उद्धृत गर्दै प्रवक्ता खत्रीले भने, 'हरिजनको शवको भैरहवास्थित भीम अस्पतालमा पोष्टमार्टम गरी परिवारको जिम्मा लगाइएको छ।'
सरकारले दलित समुदायका विद्यार्थीलाई छात्रवृत्ति उपलब्ध गराउँदै आएको छ। तर यो गैरदलितले पाउँदैनन्। सोही कोटाको छात्रवृत्ति रकम प्राप्त गरेपछि आफूले नपाएको झोंकमा खेतमा लगेर हत्या गरेको पाइएको प्रहरी नायब उपरीक्षक खत्रीले बताए।
१० वर्षीय नाबालकको हत्या गर्ने दिलीप अहिले प्रहरी नियन्त्रणमा छन् भने उनलाई बाल निगरानी कक्षमा राखिएको छ। १८ वर्षमुनीका बालबालिकालाई अरु व्यक्तिसँगै हिरासतमा राखेर अनुसन्धान गर्न नमिल्ने भएकाले बाल निगरानीमा राखेर अनुसन्धान अघि बढाइएको प्रवक्ता खत्रीले बताए।
'अभियुक्त दिलीपमाथिको अभियोग पुष्टी भए जिल्ला अदालतको बाल इजलाशले बालसुधार गृहमा पठाउने आदेश दिन सक्नेछ', उनले भने, 'बालबालिका सम्बन्धी ऐनमा १४ वर्ष वा सोभन्दा माथि र १६ वर्षभन्दा कम उमेरको बालबालिकाले कुनै कसुरजन्य कार्य गरेको भए निजलाई कानुनबमोजिम उमेर पुगेको व्यक्तिलाई हुने सजायको आधा सजाय हुने व्यवस्था छ।'
मुद्दाको कारबाहीको क्रममा बालबालिकाको उमेर १८ वर्ष पूरा भएपनि त्यस्तो मुद्दा बाल अदालतबाटै कारबाही, सुनुवाइ र किनारा गर्नुपर्ने कानुनी प्रावधान छ। अभियुक्त दिलीपलाई कर्तव्य ज्यान मुद्दामा कारबाही अघि बढाइने खत्रीले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
