एजेन्सी- अमेरिकी राष्ट्रपति डोनाल्ड ट्रम्पले विश्वभर व्यापक रूपमा फैलिरहेको कोरोना भाइरसको संक्रमण गर्मी मौसम आउनासाथ रोकिने विश्वास व्यक्त गरेका थिए। गत महिना एक सार्वजनिक कार्यक्रममा सम्बोधन गर्दै राष्ट्रपति ट्रम्पले यस्तो बताएका थिए। ‘तपाईंहरूलाई थाहा छ‚ विभिन्न सिद्धान्तअनुसार गर्मी मौसम देखापर्नासाथ यो भाइरस आफैं हराएर जानेछ। र‚ यो नै सत्य हो,’ उनले भनेका थिए।
गर्मीयामसँगै यसको संक्रमणमा पनि कमी आउने/नआउने विषयमा बोल्न भने स्वास्थ्यविद् अनिच्छुक छन्। ‘कोभिड-१९ बिल्कुलै नयाँ भाइरस भएकाले यसले गर्मीयाममा कस्तो प्रभाव पार्छ भन्ने विषयमा यसै भन्न सक्ने अवस्था छैन। विश्व स्वास्थ्य संगठनले पनि कोभिड-१९ गर्मीयाममा कमी हुनेबारे केही उल्लेख गरेको छैन,’ काउन्सिल अन फरेन रिलेसन्सका ग्लोबल हेल्थ प्रोग्रामका डाइरेक्टर थोमस बोलिकीले भने।
गर्मीयामले कोरोना भाइरसको संक्रमण रोकथाम हुनेभन्दा पनि यसको असर देखिएपछि कार्बन उत्सर्जन भने रोकिएको छ। सन् २०२० को सुरुवातीसँगै बुध ग्रहमा पनि अहिलेसम्मकै इतिहासमा सबैभन्दा धेरै तापक्रम भएको रेकर्ड बसिसकेको छ।
अहिलेसम्म ४६ सयभन्दा बढी मानिसको कोरोना संक्रमणका कारण मृत्यु भएको छ भने यसको संक्रमण १ सय २४ देशमा फैलिसकेको छ। जलवायु परिवर्तनले पनि कोरोना भाइरसको संक्रमणलाई विस्तार गर्नमा महत्त्वपूर्ण भूमिका खेल्छ। कोरोनाका कारणले उद्योगहरु बन्द हुन थालेकाले इन्धन खपत कम भएसँगै चीनमा कार्बन उत्सर्जनमा पनि कमी भएको छ।
‘कोरोना भाइरसको सबैभन्दा ठूलो असर आर्थिक गतिविधिमा पर्ने देखिन्छ‚ जसले गर्दा हरितगृह ग्याँस उत्सर्जनमा पनि कमी आउँछ,’ ब्रुनल पेन्सन पार्टनरसिपका रेस्पोन्सिबल इन्भेस्ट्मेन्ट अफिसर प्रमुख फेथ वार्डले भने।
कोरोनाको प्रभाव विस्तारै कम भएसँगै विभिन्न विशेषज्ञहरुले प्रकोप सुरु भएको चीनको वुहान सहरको पर्यावरणीय सुधारलाई पनि चासोका साथ हेरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791765483.jpg)
-1786602170.png)
