काठमाडौं- १४ औं महाधिवेशनको कार्यतालिका सार्वजनिक भएसँगै कांग्रेस नेताहरुको जिल्ला दौड बाक्लिएको छ। माघ २९ मा बसेको केन्द्रीय समिति बैठकले २०७७ फागुनमा १४ औं महाधिवेशन गर्ने सर्वसहमतिमा निर्णय गरेको थियो। फागुन १६ गतेदेखि क्रियाशील सदस्यता नविकरण तथा वितरण गर्ने कार्यसूची प्रकाशित भएसँगै जिल्ला दौडमा बढोत्तरी आएको छ।
नेताहरुको पछिल्लो दौडलाई क्रियाशील सदस्य वितरणसँग पनि जोडिएको छ। क्रियाशील सदस्यता वितरणमा कांग्रेसको हरेक महाधिवेशनमा विवाद हुँदै आएको छ। महाधिवेशनमा नेताहरु विजयी हुनलाई कार्यकर्तालाई भर्याङ बनाउन आफू पक्षीयलाई सदस्यता वितरण गरेको आरोप लाग्दै आएको छ। क्रियाशील सदस्यता वितरणमा केन्द्रीय नेताहरु हाबी हुने गरेका छन्। क्रियाशील सदस्यताको बलमा निर्वाचित हुने भएकै कारण पनि नेताहरुको चासो बढ्ने गरेको छ।
महाविधेशन कार्यतालिका प्रकाशित भएसँगै वरिष्ठ नेता पौडेल पक्षका नेताहरुको जिल्ला दौड थप बढेको छ। पौडेल पक्षका नेताहरु एकत्रित भई कार्यक्रममा सहभागी हुने गरेका छन्। पार्टीको आधार क्षेत्र भन्दै कांग्रेसले अर्थ्याउँदै आएको प्रदेश २ मा पौडेल पक्षले आफ्नो नाडी छाम्ने प्रयास समेत गरेको छ। गत शनिबार आफूपक्षीय अगुवा कार्यकर्तालाई विरगन्जमा भेला गरेर पौडेल पक्ष बलियो रहेको सन्देश दिने प्रयत्न गरे।
नेपाली कांग्रेस क्षेत्रीय समितिले गरेको कार्यक्रममा गत शनिबार पौडेल पक्ष विरगन्जमा भेला भए। नेता पौडेलसहित महामन्त्री डा शशांक कोइराला, केन्द्रीय सदस्य प्रकाशमान सिंह, अर्जुननरसिंह केसी, सुजाता कोइरालालगायतका नेता विरगञ्जमा सहभागी भए। सभापति शेरबहादुर देउवाले गठन गरेका १३ विभागप्रति आपत्ति सोही स्थानबाट नेताहरुले प्रतिवाद गरे।
‘वर्तमान राजनीतिक परिवेशमा नेपाली कांग्रेसका चूनौती र समाधान’ विषयक छलफलको नाममा कार्यक्रम आयोजना गरिएपनि ‘निहित स्वार्थ’ भूमिका बढाउनु थियो। पौडेलले विरगन्जमा भने, ‘आशाको केन्द्र बन्नुपर्ने नेपाली कांग्रेस विकृतिहरुमा फसिरहेको छ। दलदलमा फसेको पार्टीलाई मुक्त गर्ने संकल्प मधेशबाट गर्नुपर्छ।’
कार्यक्रमका लागि पार्टी संस्थापन पक्षको स्वीकृति भने थिएन। संस्थापनको असहयोगको संकेत बोल्ने क्रममा नेता पौडेलले समेत गरे। अनेक धम्किका बाबजुत कार्यक्रम आयोजना गरेको भन्दै क्षेत्रीय कार्यसमितिलाई धन्यवाद दिए। संस्थापन पक्षको विरुद्धमा आरोप र असक्षमता दर्शाउँदै नेताहरुले १४ औं महाधिवेशन आफूअनुकुल गराउने प्रयास सुरु गरेका छन्।
प्रतिपक्षीय भूमिका कमजोर,विधान उल्लंघन, विभाग गठनलगायतका विषयमा नेताहरुले सभापति देउवामाथि प्रहार गरे। सभापतिको भूमिका विधिसंगत नभएको भन्दै प्रश्न पनि उठाए। सभापति देउवालाई विपक्षी दलका नेतामा हुनुपर्ने गुण नै नभएको आरोप लगाए। विगतमा विपक्षी दलको नेता आफू पनि बनेको स्मरण गर्दै भने, ‘प्रचण्डले सेनापति हटाएर सत्ता कब्जा गर्ने बाटोमा गएपछि कांग्रेसकै विरोधले राजीनामा दिन बाध्य भए।’ कांग्रेसलाई आशाको केन्द्र बनाउन मधेशबाट अभियान सुरु गर्नुपर्ने बताए। मधेशको पक्ष र देउवाको विरोधमा समय खर्चिएका पौडेलले ताली पनि पाए। कांग्रेसको जग मधेश भएको भन्दै उपस्थितलाई फुर्क्याए।
विरगन्जबाट सोही टोली अर्को दिन हेटौंडा पुग्यो। हेटौंडामा पूर्व जिल्ला सभापतिहरुको भेलामा सहभागी भए। पूर्व जिल्ला सभापतिहरुको भेलामा संस्थापन पक्ष भने सहभागी भएको थिएन। भेलामा पौडेलसहित महामन्त्री डा शशांक कोइराला, नेताहरु प्रकाशमान सिंह, अर्जुननरसिंह केसीलगायतले सम्बोधन गरे।
मूलतः पार्टीको प्रभावकारिता खुम्चिएकोप्रति नेताहरुको चिन्ता थियो। महाधिवेशन नजिकिएको समयमा पार्टी सभापतिले मनोनयन गरेका विभाग प्रमुखप्रति नेताहरुको आक्रोश थियो। पार्टी सभापतिले आफू पक्षीय नेता/कार्यकर्ताको व्यवस्थापन गर्न विभाग गठन गरेको पौडेल पक्षको आशंका छ।
हेटौंडाको कार्यक्रमपछि मंगलबार नेता पौडेल विराटनगर पुगे। कृष्णप्रसाद कोइराला स्मृति परिषदले गरेको कार्यक्रममा भाग लिन नेता डा शेखर कोइराला पनि विराटनगर पुगेका थिए।
जिल्ला दौडमा सम्भवतः पहिलो स्थान ओगट्ने नेता डा शेखर कोइराला फागुन १० बाट प्रदेश ५ जिल्लाहरुमा हुने कार्यक्रममा सहभागी भए। कोइराला नेतृत्वको टोलीमा नेतृ सुजाता कोइराला, केन्द्रीय सदस्यहरु दिपक गिरी, चन्द्र भण्डारी र गगन थापा, बर्दिया कांग्रेसका सभापती संजय गौतम, राष्ट्रिय योजना आयोगका पूर्व उपाध्यक्ष डा गोविन्दराज पोख्रेललगायत थिए। बाँके, बर्दिया, दाङ, कपिलवस्तुमा सहभागी भएर काठमाडौंमा एक रात बिताएर विराटनगर गएका डा कोइराला फेरि पश्चिम भ्रमणमा छन्।
एक साताअघि प्रदेश ५ का जिल्लाहरु भ्रमण गरेर फर्केका शेखर प्रधानमन्त्रीसँगको भेटपछि विराटनगर पुगेका थिए। कोइराला रुकुमका कार्यक्रममा सहभागी भइरहेका छन्।
पार्टीभित्र विवाद थप बल्झिएपछि चाक्सिबारीस्थित नेता प्रकाशमान सिंहको निवासमा पौडेल पक्षका नेताहरु बुधबार भेला भए। महाधिवेशन प्रभावित गर्नेगरी सभापति देउवा अघि सरेको भन्दै त्यस विरुद्ध आवाज उठाउने निर्णय गरे। साथै, पार्टी केन्द्रले बोलाएको जिल्ला उपसभापतिहरुको भेला बहिष्कार गर्ने निर्णय समेत गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
