काठमाडौं– विशेष अदालतले ललिता निवास प्रकरणमा दुईमन्त्रीहरु डम्बर श्रेष्ठ र छविराज पन्तसहित ५४ जनाको नाममा म्याद पठाएको छ।
विशेषले आइतबार उनीहरुका नाममा १५ दिनभित्र उपस्थित हुन म्याद जारी गरेको हो।
ललिता निवास जग्गा घोटालामा संलग्न भएको अभियोगमा अख्तियारले नेपाली काँग्रेसका उपसभापति विजयकुमार गच्छादारसहित ११० जनाविरुद्ध भ्रष्टाचार मुद्दा दायर गरेको थियो। अख्तियारले माघ २२ गते उनीहरु विरुद्ध विगो र जेल सजाय माग गर्दै मुद्दा दायर गरेको थियो।
अख्तियारले मन्त्रिपरिषदका अध्यक्ष खिलराज रेग्मी सरकारको समयमा मन्त्री भएका पन्तलाई सचिवको रुपमा पुरा गरेको जिम्मेवारीका लागि भ्रष्टाचार मुद्दा दायर गरेको थियो। उपसचिव हुपेन्द्रमणि केसीले तयार पारेको प्रस्ताव विभाग हुँदै भूमिसुधार तथा व्यवस्था मन्त्रालय आएको र मन्त्रालयमा सचिव छविराज पन्तले मनासिब भएको निर्णय दिएपछि तत्कालीन मन्त्री डम्बर श्रेष्ठले मन्त्रिपरिषदमा लगेका थिए।
अख्तियारले श्रेष्ठले गलत टिप्पणी सदर गरेको भन्दै ९ करोड ६५ लाख ७६ हजार विगो र जेल सजाय हुनुपर्ने माग अभियोगपत्रमा गरेको छ। त्यस्तै छविराज पन्तविरुद्ध भूमिसुधार मन्त्रालयमा सचिवको रुपमा रहँदा विभागबाट आएको प्रस्तावलाई अध्ययन नै नगरि मनासिब भएको राय दिएका थिए। २०६६ कात्तिकदेखि २०६७ माघसम्म मन्त्रालयमा रहेका उनले हुपेन्द्रमणी केसीको प्रस्तावलाई अघि बढाएका थिए। अख्तियारले उनीसँग पनि ९ करोड ६५ लाख ६७ हजार विगो र कैद सजाय माग गरेको छ।
क-कसलाई भयो म्याद जारी?
विशेष अदालतले ललिता निवास प्रकरणमा मुछिएका ५४ जनाको नाममा म्याद जारी गरेको छ।
तत्कालीन भूमिसुधार मन्त्री डम्बर श्रेष्ठ, भूमिसुधार सचिव छविलाल पन्त, इन्जिनियर राजेन्द्रमान श्रेष्ठ, नापी कार्यालय डिल्लीबजारका तत्कालीन नापी अधिकृत कमल घिमिरे, सर्भेक्षक देवबहादुर लामिछाने, अमिन भरतचन्द्र अर्याल, नापी अधिकृत जनकबहादुर भण्डारी, मालपोत अधिकृत हुपेन्द्रमणि केसी, भूमिसुधार अधिकारी शंकरप्रसाद सुवेदी, प्रमुख मालपोत अधिकृत प्रेमबहादुर खापुङका नाममा म्याद जारी भएको छ ।
त्यस्तै, तत्कालीन सहसचिव जितबहादुर थापा, मालपोत कार्यालय डिल्लीबजारका तत्कालीन नायब सुब्बा टंकनाथ पौडेल, भूमिसुधार तथा व्यवस्था विभागका पूर्व निर्देशकहरू पुष्पराज उपाध्याय, रुद्रकुमार श्रेठ र मुकुन्द आचार्य, मालपोत कार्यालय डिल्लीबजारका पूर्व प्रमुखहरू टीकाराम घिमिरे र कलाधर देउजा, शाखा अधिकृत इन्द्रप्रसाद ढुङ्गाना, सुरेन्द्रमान कपाली, धर्मप्रसाद गौतम, नायब सुब्बा टीकाबहादुर बिसी, अंगुरकुमार सिग्देल, केदारप्रसाद श्रेष्ठ, युक्तप्रसाद श्रेष्ठ, जगतप्रसाद पुडासैनी र खरिदार जीवनाथ पोखरेल लगायतका नाममा म्याद जारी भएको छ।
त्यस्तै, समरजङ्ग कम्पनीका पूर्व प्रमुख अर्जुनप्रसाद भण्डारीका नाममा पनि म्याद जारी भएको विशेष अदालतले जनाएको छ। प्रतिवादीहरूलाई म्याद तामेल भएको १५ दिनभित्र अदालतमा उपस्थित हुन भनिएको छ। म्याद गुज्रेको १५ दिनसम्म प्रतिवादीले म्याद थमौती गर्न भने सक्नेछन्।
दुई मृतकका नाममा म्याद जारी
विशेष अदालतबाट दुई मृतकका नाममा पनि म्याद जारी गरेको छ। मृत्यु भईसकेका मुकुन्दप्रसाद आचार्य र युक्त श्रेष्ठको नाममा अदालतले म्याद जारी गरेको हो। श्रेष्ठले अख्तियारको बयान चलिरहेको समयमा बालाजुमा आत्महत्या गरेका थिए। मृत्यु भइसकेका व्यक्तिको हकमा जरिवाना र कैद सजाय स्वतः मिनाहा हुने भए पनि विगो भने ठहर्न सक्ने भएकाले अदालतले म्याद जारी गरेको हो। उनीहरुका नामममा बालुवाटारमा जग्गा छ। उपरजिष्ट्रार खड्काले अरु बाँकीका नाममा पनि छिटै म्याद जारी गर्ने तयारी विशेष अदालतको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
