काठमाडौं- सेक्युरिटी प्रिन्टिङ प्रेसको क्षेत्रगत ज्ञान 'शून्य' भएका विजयप्रकाश मिश्रलाई विज्ञका रूपमा संसद्को लेखा समितिले छलफलका लागि बोलाएको पाइएको छ। २१ पुषमा लेखा समितिले मिश्रलाई छलफलका लागि बोलाएको थियो। समितिमा उनले फ्रान्स र जर्मनीका कम्पनीले गरेको प्रस्तावमा आर्थिक चलखेल भएको आरोप लगाएका थिए।
विज्ञका रूपमा आमन्त्रित मिश्रले समितिमा एकाएक आर्थिक अनियमितताको कुरा उठाएपछि सांसदहरू उनीप्रति आक्रोशित भएका थिए। समितिका सभापति भरत शाहले क्षेत्रगत विज्ञता नभएको व्यक्तिलाई समितिमा विज्ञका रूपमा बोलाएको भन्दै आपत्ति जनाएका थिए। केही सांसदले मिश्रको विज्ञताका विषयमा सोधखोज समेत गरे। तर आफूमाथि उठेका प्रश्नबारे मिश्र अलमलमा परेका थिए।
अन्ततः लेखा समितिले विज्ञ भनी बोलाएका उनै मिश्रसँग भएको संवाद सार्वजनिक भएका कारण सञ्चारमन्त्रीबाट गोकुल बाँस्कोटाले राजीनामा दिनु परेको छ।
निवर्तमान मन्त्री बास्कोटासँग संवाद प्रकरणका एक पात्र मिश्रबारे हामीले सोधखोज गरेका थियौं। मिश्रका एक आफन्तका अनुसार उनी डेढ दशकअघिदेखि जापान बस्दै आएका छन्। जापान गइसकेपछि उनी रेस्टुरेन्टमा काम गर्न थाले। र, पछि आफैं रेस्टुरेन्ट सञ्चालक बने। रेष्टुरेन्ट सञ्चालन गरेपछि नेपाल ओहोर–दोहोर बढाएका उनले नेपाली कामदारसँग मोटो रकम लिएर जापान पठाउन सुरु गरेका थिए। उनले विशेषतः 'कुक भिसा'मा कामदार पठाउने गर्थे।
लेखा समितिले विज्ञका रूपमा छलफलका लागि बोलाएपछि उनी सम्बन्धित क्षेत्रको विज्ञ होइनन्। मिश्रलाई नजिकबाट चिनेका अर्का एक व्यक्तिले नेपाल लाइभसँग भने, ‘उनी कमर्श पढेका व्यक्ति हुन्। एकाउन्टेट जागिरे थिए। पछि जापानतिर हानिए।’ लमजुङ, सुन्दरबजारमा जन्मेका मिश्रले स्नातकोत्तर तहको अध्ययन काठमाडौंबाट पूरा गरेका थिए। अध्ययन सकेपछि उनी गैरसरकारी संस्थाको जागिरे भएका थिए।
जापानमा आर्थिक रूपमा सम्पन्न भईसकेपछि उनले नेपालमा लगानी गर्ने बहानामा विभिन्न चलखेल सुरु गरे। नेताको पहुँचमा पनि पुगे। गत निर्वाचनमा गण्डकी प्रदेशका मुख्यमन्त्री पृथ्वीसुब्बा गुरुङलाई जिताउन उनी अहोरात्र खटेका थिए।
स्रोतका अनुसार गुरुङमार्फत् नै उनले नेकपाका उच्च नेतासँग हिमचिम बढाएका हुन्। पछिल्लो समय भने गुरुङसँग समेत उनको सम्बन्ध बिग्रिएको थियो। उनलाई चिन्नेहरू भन्छन्, ‘उनको भूमिका म्यानपावर एजेन्टको भन्दा बढी केही देखिएको छैन।’
महत्वाकांक्षी स्वभावका मिश्र पछिल्ला दिनमा बाह्य कम्पनीहरूका लागि ‘कमिसन एजेन्ट’का रूपमा सक्रिय देखिन थालेका थिए। मिश्रले सोलार प्लान्टको योजनासमेत नेताहरूलाई सुनाएका थिए। ‘उनको चाहना सरकारको एजेन्ट बनेर ठूलो योजनामा कार्य गर्ने थियो,’ स्रोतले भन्यो। उनी आफ्ना निकटहरुसँग भन्थे, ‘१०/१२ लाख रकम लिएर कामदार जापान पठाउनुभन्दा अब अरबको खेलमा रमाउनु पर्छ।’
कुनै बेला कमिसन एजेन्टकै रूपमा निवर्तमान मन्त्री गोकुल बाँस्कोटासँग नजिकको सम्बन्ध बनाएका मिश्रले पछिल्ला दिनमा सम्बन्ध बिग्रेपछि ‘अडियो’ चुहाएको अनुमान उनी निकटहरूको छ। मिश्रले स्विस कम्पनीको स्थानीय एजेन्टका रुपमा प्रिन्टिङ प्रेस खरिदका लागि तत्कालीन मन्त्री बाँस्कोटासँग पटकपटक कुराकानी गरेका थिए।
बाँस्कोटाको अडिओ बाहिरिएपछि मिश्रको मोबाइल अफ छ। भनिन्छ, उनी देशबाहिर छन्। अडिओ सार्वजनिक भएपछि लेखा समितिले मिश्रलाई पक्राउ गर्न सुरक्षा निकायलाई निर्देशन दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
