विराटनगर - विराटनगरको बिग होटलको सभा हलमा ‘हाम्रो अभियान सक्षम नेतृत्व, सशक्त महासंघ’ भन्ने एउटा ब्यानर टाँगिएको थियो। ब्यानरमा लेखिएको थियो नेपाल उद्योग वाणिज्य महासंघको वरिष्ठ उपाध्यक्ष पदका उमेदवार किशोरकुमार प्रधानको उमेद्वारी घोषणा सभा।
टाँगिएको ब्यानरमा एकापट्टि उम्मेद्वार प्रधानको तस्बिर थियो भने अर्कोतर्फ महासंघका वरिष्ठ उपाध्यक्ष शेखर गोल्छाको। यो तस्बिरको अर्को संयोग के भने दुवै व्यवसायी विराटनगरबाटै उदाएका थिए।
यो तस्बिरसँगै महासंघको आगामी चैतमा हुने नेतृत्व चयनको निर्वाचनमा नयाँ 'ट्विस्ट' आउने निश्चित भएको छ। चैतको महाधिवेशनपछि वरिष्ठ उपाध्यक्ष गोल्छा स्वत: अध्यक्ष हुनेछन्। गोल्छासँगै वरिष्ठ उपाध्यक्षमा अघिल्लो पटक प्रतिस्पर्धा गरेका प्रधान अहिले गोल्छाकै बलमा वरिष्ठ उपाध्यक्ष उठ्नेछन्।
प्रधानको उमेद्वारी घोषणाले महासंघ चुनावी सरगर्मीलाई एकै पटक तताइदिएको छ। महासंघको चुनावी दौडमा आफूलाई बलियो देखाउन प्रधान समूहले पूर्वअध्यक्षहरुसहित अहिले यूवा व्यवसायीको ठूलो टोलीलाई सँगै राखेको थियो। प्रधानको उमेदवारी सभामा दुई पूर्वअध्यक्ष कुशकुमार जोशी र बिनोदबहादुर श्रेष्ठसहित निवर्तमान अध्यक्ष पशुपति मुरारका सहभागी थिए। मुराकालाई महासंघको चुनावी खेलाडीको रुपमा हेरिन्छ।
यसको पनि कारण छन्। आफू अध्यक्ष भएपछि विधान नै संशोधन गरेर भवानी राणालाई स्वत: अध्यक्ष उनले नै बनाएका थिए भने गोल्छालाई अध्यक्ष बन्न रचिएको विधान संशोधनको खेल उनैले टुंग्याइदिएका थिए। जसकारण शेखर चैतपछि स्वतः महासंघको अध्यक्ष बन्दैछन्।
गोल्छालाई चैतमा अध्यक्ष बन्न रोक्नका लागि तयार गरिएको विधान संशोधनको खेलपछि तयार भएको बलियो समूहले अहिले प्रधानलाई अघि सारेको छ।
यसको अलावा मञ्चमा नाडा अटोमोबाइल्स एसोसिएसनका अध्यक्ष कृष्णप्रसाद दुलाल सहभागी थिए।
वस्तुगततर्फको उपाध्यक्षमा उमेदवारी दिने तयारीमा रहेको अञ्जन श्रेष्ठको समेत प्रधानको उमेद्वारी सभामा उपस्थिति थियो। वरिष्ठ उपाध्यक्ष नै अध्यक्ष हुने व्यवस्थाकै कारण महासंघको निर्वाचनमा सबैको ध्यान वरिष्ठ उपाध्यक्ष पदमा हुनेछ।
अहिलेको उपाध्यक्ष नै ३ वर्षपछि महासंघको अध्यक्ष हो। निर्वाचनको सयम नजिकिँदै जादाँ व्यवसायीहरुबीच चुनावी रौनक सुरु भइसकेको छ। बागलुङ लगानी सम्मेलनबाट वरिष्ठ उपाध्यक्षमा अर्का उपाध्यक्ष चन्द्र ढकालले उम्मेद्वारी दिएका थिए। ढकाललाई प्रधानले विराटनगरबाट 'काउन्टर' दिएका छन्।
महासंघको वरिष्ठ उपाध्यक्षको चुवानी माहोल अब झन्डै दुई महिनासम्म रहनेछ। प्रधानको उमेद्वारीसँगै अहिले महासंघमा स्वत: वरिष्ठ उपाध्यक्ष बन्ने र ३ वर्षपछि महासंघको नेतृत्व लिने व्यवसायी ढकालको योजनामा पनि केही धक्का लागेको छ।
अब ढकालले सहजै वरिष्ठ उपाध्यक्ष बन्ने वातावरण पनि बिग्रिएको छ। यसको एउटै कारण हो, स्वतः अध्यक्ष हुने गोल्छा, निर्वतमान अध्यक्ष मुरारका, पूर्व अध्यक्ष जोशी र श्रेष्ठको प्रधानलाई सहयोग।
महासंघको चुनावमा ५० प्रतिशत हिस्सा ओगट्ने जिल्ला/नगरतर्फको महत्वपूर्ण हिस्सा ढकालको पक्षमा छ। उनले पछिल्लोपटक आयोजना गरेका दुईवटा रात्रिभोजमा उनीहरुको उपस्थितिले पनि यसको संकेत देखिएको छ। यसमा महासंघका अर्का पूर्वअध्यक्ष चण्डिराज ढकालको महत्वपूर्ण योगदान छ।
पूर्वअध्यक्ष ढकाल महासंघमा आफ्नो बर्चश्व कायमै राख्न चन्द्र ढकाललाई जसरी पनि जिताउने अभियानमा छन् भने त्यसलाई रोक्न पूर्वअध्यक्षहरुको अर्को टोली अघि सरेको छ।
यद्यपि महासंघको राजनीति परम्परागत नरहेकाले 'भोट स्विङ'को पर्याप्त संभावना रहेको व्यवसायीहरु बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1732445217.webp)
