भैरहवा– विश्व सिमसार क्षेत्रमा सूचीकृत गैडहवा तालको संरक्षण तथा सम्वद्र्धन गर्ने उद्देश्यले प्रथम गैडहवा ताल महोत्सव–२०७६ हुने भएको छ।
नेपाल भ्रमण वर्ष २०२० तथा लुम्बिनी भ्रमण वर्ष २०७६ को अवसर पारेर ‘कृषि, शिक्षा, स्वास्थ्य, रोजगार र व्यापार, पर्यटनसहितको पूर्वाधार विकास’ भन्ने मुल नाराका साथ आगामी फागुन १ गतेदेखि १० गतेसम्म उक्त महोत्सव हुने भएको हो।
पर्यटनको प्रचुर सम्भावना बोकेको गैडहवा ४ स्थित गैडहवा तालको प्रचारप्रसार नहुँदा यसको वास्तविक अवस्था बाहिर आउन नसकेकाले तालको प्रचारप्रसारका साथै यसलाई पर्यटनको गन्तव्य बनाएर आन्तरिक तथा बाह्य पर्यटक भित्र्याउने लक्ष्य लिइएको गाउँपालिकाका अध्यक्ष तथा महोत्सव मूल आयोजक समितिका संयोजक बच्चुलाल केवटले बताए।
१ सय स्टल रहने ताल महोत्सवमा विज्ञान–प्रविधि प्रदर्शनी गरिने केवटले जानकारी दिए। महोत्सवमा भारतका चर्चित भारतीय कलाकार रितेश पाण्डेय, पवन सिंह, राजा भोजपुरीयालगायत राष्ट्रिय कलाकारको प्रस्तुति रहने उनले बताए। १ लाख दर्शकले महोत्सवको अवलोकन गर्ने र १ करोड बराबरको कारोबार हुने लक्ष्य राखिएको उनले बताए।
‘ग्रामीण भूभाग, सडक यातायातको पहुँच कम भएको गैडहवा तालमा पुग्न सबै पूर्वाधार पुरा गर्ने र पर्यटनको मनोरम स्थलमा रुपान्तरण गर्न यो ताल महोत्सवले महत्वपूर्ण योगदान गर्ने विश्वास लिएका छौं, खास गरेर जल पर्यटनको प्रचुर सम्भावनालाई खुलस्त बनाएर बाह्य तथा आन्तरिक पर्यटकको बसाई अवधि लम्ब्याउन सक्ने हो भने त्यसबाट दिगो आर्यआर्जन समेत हुन सक्छ,’ उनले भने।
पर्यटकीय आर्कषणको केन्द्रको रुपमा विकास गर्ने लक्ष्य लिइएको यो तालमा लुम्बिनी आउने पर्यटकलाई मात्रै पनि घुमाउने वातावरण तयार गरी उनीहरुको बसाई लम्ब्याउँदा पर्यटन प्रबद्र्धनमा टेवा पुग्ने उनको भनाइ छ।
ताल सैनामैना नगरपालिकास्थित कलोनीबाट करिब १२ किलोमिटर दक्षिण पश्चिममा पर्छ। प्रचारप्रसार उपसमितिका संयोजक तथा गैडहवा गाउँपालिका ८ का वडाअध्यक्ष भुवन रानाले बताए। प्रशस्त माछा उत्पादन हुने तालबाट सिँचाई सुविधासमेत प्रदान गरिएको रानाले बताए।
महोत्सवको फागुन १ गते प्रदेश ५ का मुख्यमन्त्री शंकर पोखरेलले उद्घाटन गर्ने कार्यक्रम रहेको आयोजकले जनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
