काठमाडौं– बक्यौता रकम तथा सरकारी अनुदानसमेत नपाएपछि उखु किसानले पुनः आन्दोलनको तयारी गरेका छन्। गत पुसमा भएको सम्झौताअनुसार बक्यौता नपाएपछि किसानले पुनः आन्दोलनको तयारी गरेका हुन्।
वर्षौँदेखि आफ्नो पसिनाको मूल्य पाउन पनि आन्दोलन गर्नुपर्ने बाध्यकारी अबस्था झेल्दै आएका उखु किसानहरुले फागुनदेखि आन्दोलन गर्ने नयाँ खाकासमेत तयार गरिसकेका छन्।
उखु किसान संघर्ष समितिका संरक्षक राकेश मिश्र भन्छन्, ‘फागुन ५ गतेसम्म कसको बक्यौता र अनुदान रकम कति पाउन बाँकी छ भनेर हामी तथ्यांक संकलन गर्छौँ, ६ गतेदेखि २२ गतेसम्म हामी एक छाक खाना खाएर उखु बारीमा काम गर्छौँ।’
फागुन २२ गतेदेखि चैत ३ गतेसम्म ‘चलु काठमाडौं भरु काठमाडौं’ अर्थात् ‘काठमाडौं जाऔँ काठमाडौं भरौँ’ भन्ने नाराका साथ प्रचारप्रसार गरिने कार्यक्रम रहेको संरक्षक मिश्रले बताए।
चैत ४ गतेदेखि काठमाडौंमा उखु किसानहरुले रिले अनशन सुरु गर्ने संरक्षक मिश्रले जानकारी दिए।
यस पटकको अनशनमा सकेसम्म देशैभरिका उखु किसानहरु भेला हुने र कडा आन्दोलन गर्ने चेतावनी किसानहरुले दिएका छन्।
बाँकी अनुदान पनि छिट्टै पठाउँछौँः कृषि मन्त्रालय
उखु किसानहरुलाई पठाउन बाँकी ४० करोडभन्दा बढी अनुदान छिट्टै पठाउने पहल भइरहेको कृषि तथा पशुपंक्षी विकास मन्त्रालयका सहसचिव हरिबहादुर केसीले जानकारी दिए।
‘हामीले बाँकी अनुदान रकम तत्काल किसानसम्म पु¥याउन अर्थ मन्त्रालयलाई फाइल पेश गरिसकेका छौँ’ सहसचिव केसीले नेपाल लाईभसँग भने ।
उखु किसानहरुलाई उपलब्ध गराउनु पर्ने १ अर्ब ३४ करोड बरारबर अनुदान रकम बक्यौता रहेकोमा मन्त्रालयले ९२ करोड रुपैयाँ वितरणका लागि यसअघि नै कोष तथा लेखा नियन्त्रकको कार्यालयमा पठाइसकेको छ।
केही किसानहरुले अनुदान रकम पाइसकेका छन् भने धेरै किसानले अनुदान रकम पाउन नसकेको गुनासो गरेका छन् ।
अध्ययन प्रतिवेदन तयार गर्दैछौँ : उद्योग मन्त्रालय
सम्झौताअनुसार बक्यौता रकम दिन आनाकानी गरेपछि उद्योगीमाथि अध्ययन गरी प्रतिवेदन तयार गर्न सुरु गरेको उद्योग वाणिज्य तथा आपूर्ति मन्त्रालयले जनाएको छ।
मन्त्रालयका सहसचिव नवराज ढकालकाअनुसार मन्त्रालयले उद्योगीहरुले बक्यौता रकम दिन आनाकानी गर्नुका कारणमाथि अध्ययन गरी किसानलाई बक्यौता रकम दिलाउन पहल गर्ने तयारी गरेको हो।
‘उद्योगीहरुले के कारण किसानलाई बक्यौता रकम दिन सकेका छैनन्। सो सम्बन्धमा प्रतिवेदन तयार गर्दैछौँ। चिनी बेच्न नसकेर हो वा अन्य कुनै कारणले, त्यसलाई पत्ता लगाएपछि बाँकी प्रकृया अगाडि बढ्छ’ सहसचिव ढकालले भने।
यसअघि किसानको बक्यौता रकम दिन आनाकानी गर्ने उद्योगीलाई पक्राउ गर्न उद्योग मन्त्रालयले गृह मन्त्रालयलाई पत्राचार गरेको जनाएको थियो। पुनः छलफलपछि उद्योगीहरुलाई समातेर मात्रै समस्या समाधान नहुने भएपछि मन्त्रालयमा टोली गठन गरी अध्ययन अगाडि बढाइएको मन्त्रालयले जनाएको छ।
सर्लाहीका किसानहरुले मात्रै अनुदान र बक्यौता गरेर करिब १ अर्ब रकम पाउन बाँकी रहेको उखु किसान संघर्ष समितिका संरक्षक मिश्रले बताए।
देशैभरिका दर्जनौँ चिनी उद्योगहरुबाट किसानले वर्षौँदेखिको अर्बौँ बक्यौता रकम पाउन सकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
