काठमाडौं- माघ महिना बजारका लागि घट्ने सिजन हो। माघ र फागुनमा अधिकांश कम्पनीले लाभांश दिसकेका हुन्छन्।
यसले गर्दा यी दुई महिना बजार घट्ने अनुमान गरिन्छ। तर यस वर्षको पुस माघमा बजार उल्लेख्य सुधार भयो।
सेयर बजार ११ सय अंकमा झर्दा पेनिक भएका लगानीकर्ता बजारभन्दा बाहिरै थिए। तर बजार एकाएक सुधार हुन थालेपछि तिनै लगानीकर्ता बजार प्रवेश गरेका छन्। यसै वर्ष कम्पनीहरुले प्रदान गरेको लाभांश र दुई सय अंकभन्दा माथिको सुधारले लगानीकर्ताहरुले केही राहत पाएको ब्रोकर एशोसिएसनका अध्यक्ष भरत रानाभाटले जानकारी दिए।
दोब्बरभन्दा धेरैले नोक्सानमा देखिएका लगानीकर्ताहरुको पोर्टफोलियो सुधार हुन थालेपछि उनिहरु उत्साहित भएका हुन्। हिजोका दिनमा एक दुई हजार कित्ता सेयर हुने लगानीकर्ताहरुको सेयर संख्या कम्तिमा पनि ५० प्रतिशतले बढेको छ।
सेयर संख्या धेरै हुँदा उनिहरु आफूसँग भएको केही सेयर बेचेर बजारबाट थप सेयर खरिद गरिरहेका छन्। बजारमा लगातार सुधार हुँदा केही लगानीकर्ताहरुले यसै अवधिमा राम्रो नाफा आर्जन गरेका छन्।
पछिल्ला दिनको बजारको ट्रेण्ड हेर्दा धेरै अंकले सुधार हुने र थोरै अंकले घटिरहेको छ। यस्तो अवस्थामा लगानीकर्ताहरुले राम्रो पैसा कमाउन सक्छन्। ब्रोकरहरुका अनुसार यसै अवधिमा कमाएको पैसालाई पनि लगानीकर्तारुले सेयरमै लगानी गरेका छन्। यसले बजार थप चलायमान बनेको छ।
कमाएको पैसा बाहिर जान थाल्यो भने लगानीकर्ताहरुको तरलता घट्दै जान्छ। तर उनिहरुले सेयरबाट आर्जन भएको पैसा पुनः सेयरमै लगानी गर्दा बजार गतिशील बनेको एक ब्रोकरले बताए।
बजार केही सुधार हुने बित्तिकै हौसिएर सेयर उठाउने लगानीकर्ता बजार घटेको बेलामा भने चुप लाग्छन्। दुई साता अगाडि दोहोरो अंकले सेयर बजार सुधार हुँदा कारोबार रकम दैनिक दुई अर्ब रुपैयाँ नाघ्दै आएको थियो। तर पछिल्लो समय केही करेक्सन हुँदा कारोबार रकम एक अर्बभन्दा कमको कारोबार हुँदै आएको छ।
आइतबार सेयर बजार १२ अंकभन्दा धेरैले घटेको थियो। सूचकमा गिरावट आएसँगै कारोबार रकम पनि घटेको थियो। सोमबार पनि बजार घट्ने लगानीकर्ताहरुको विश्लेषण थियो। तर बजार दुई घण्टापछि केही सुधार देखियो।
यही सुधारकै अवधिमा कारोबार रकम भने एक अर्ब नाघ्न सकेन। सोमबार ४.२८ अंकको सुधार हुँदा ९३ करोड २० लाख रुपैयाँको कारोबार भएको छ। उक्त कारोबारमा सबैभन्दा धेरै हिस्सा शिवम् सिमेन्टको मात्रै १३ करोड ६६ लाख रुपैयाँको कारोबार भएको हो।
कम्पनीले चालु आर्थिक वर्षको दोस्रो त्रैमासिक वित्तीय विवरण सार्वजनिक गर्न बाँकी छ।
पहिलो त्रैमासिक अवधिमा कम्पनीको नाफामा भारी गिरावट आउँदा कम्पनी सेयर मूल्यमा भारी गिरावट आएको थियो। तर सोमबार कम्पनीको सेयर मूल्यमा २२ रुपैयाँले सुधार भएको छ। कम्पनीले राम्रो नाफा आर्जन गर्ने अपेक्षाले दोस्रो बजारमा मूल्य बढिरहेको हो।
म्युचुअल फण्ड, हाइड्रोपावर, फाइनान्स र जीवन बीमाको सूचकमा गिरावट आएको छ भने बाँकी सूचकहरु सुधार भएका छन्। बजार सुधारको अवधिमा सबैभन्दा धेरै बीमा कम्पनी र माइक्रोफाइनान्सको सेयरमा सुधार देखियो।
यिनै कम्पनीमा आएको सुधारबाट राम्रो नाफा आर्जन गरेका लगानीकर्ता तिनै कम्पनी सेयर बिक्री गरेर बैंकहरुको सेयर खरिद गरिरहेका छन्। यस अवधिमा बजार बुझेका लगानीकर्ताहरु सेयर उठाइरहेका छन्।
बढ्दो ट्रेण्डमा घटेको बेलामा किन्ने र बढेको बेलामा बिक्री गर्ने मान्यता लगानीकर्ताहरुको हुन्छ। यसैअनुसार बजार बुझेकाहरु सेयर खरिद गरिरहेका छन् भने केही लगानीकर्ताहरु नाफा बुक गर्न सेयर बिक्री गरिरहेका छन्।
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
