काठमाडौं- सरकारले अर्थसचिवको जिम्मेवारी शिशिरकुमार ढुंगानालाई दिएको छ।
मंगलबार बसेको मन्त्रिपरिषदको बैठकले ढुंगानालाई अर्थसचिव बनाउने निर्णय गरेको हो।
अर्थ मन्त्रालयमै राजस्व सचिवको जिम्मेवारी सम्हालिरहेका ढुंगानालाई अर्थसचिवको जिम्मेवारी दिइएको हो।
अर्थका तत्कालीन सचिव डा राजन खनालको अवकाश भएको करिब एक हप्तापछि सरकारले ढुंगानालाई यो जिम्मेवारी दिएको हो।
को हुन् ढुंगाना?
भक्तपुर चाँगुनारायणमा जन्मिएका ढुंगानाले नेपाल कमर्स क्याम्पस मिनभवनबाट स्नातकोत्तर गरेका छन्। ढुंगाना २०७३ माघ २० गते सचिव बढुवा भएका ढुंगाना सुरुमा सुदूरपश्चिमाञ्चल विकास क्षेत्रको क्षेत्रीय प्रशासक भएका थिए।
त्यसपछि अर्थ मन्त्रालयमा राजस्व सचिव भएका उनको सरुवा २०७५ मंसिरमा प्रधानमन्त्री तथा मन्त्रिपरिषद कार्यालयमा गएका उनी फेरि राजस्व सचिवमा नै फर्किएका थिए।
दुईवर्ष तथ्यांकमा नायब सुब्बा भएका ढुंगानाले २०५४ सालमा शाखा अधिकृत परीक्षा उत्तीर्ण गरेका थिए। शाखा अधिकृत भएको ६ वर्षमा ढुंगानाले उपसचिवको परीक्षा उत्तीर्ण गरे। २०६० साल भदौ १२ गते उपसचिव भएका ढुंगाना २०६३ साउन ८ गते अर्थ मन्त्रालय प्रवेश गरेका थिए।
ढुंगानाले २०६५ चैत १० गते सहसचिव पास गरे। सहसचिवको रुपमा उनको पहिलो पोष्टिङ आन्तरिक राजस्व कार्यालय क्षेत्र नं १ को प्रमुख भएक उनी त्यसपछि राजस्व अनुसन्धान विभागको उपमहानिर्देशक बने।
त्रिभुवन अन्तर्राष्ट्रिय विमानस्थल भन्सार कार्यालयको प्रमुख हुँदै अर्थ मन्त्रालयको प्रशासन महाशाखा प्रमुख बने। उनी आर्थिक नीति विश्लेषण महाशाखा हुँदै भन्सार विभागको महानिर्देशक बने।
करका महानिर्देशकको 'रिप्लेस' भन्सार महानिर्देशकबाट
ढुंगाना अघिका सचिव खनाल आन्तरिक राजस्व विभागको महानिर्देशक हुँदै अर्थसचिव हुने बाटो तय गरेका थिए। २०६६ सालमा लाजिम्पाट पुगेका उनी त्यहाँबाट अर्थ मन्त्रालय फर्किएसँगै अनुगमन तथा मूल्यांकन महाशाखा र राजस्व व्यवस्थापन महाशाखाको प्रमुख भएका थिए। अर्थ मन्त्रालयमै राजस्व सचिव हुँदै अर्थसचिव बनेका थिए।
ढुंगाना दुई पटक राजस्व सचिव भए। सुदूरपश्चिम क्षेत्रीय प्रशासकबाट काठमाडौं फर्किँदा राजस्व सचिव भएका उनी बीचमा करिब १० महिना प्रधानमन्त्री तथा मन्त्रिपरिषद कार्यालय बसेर फेरि यही जिम्मेवारीमा आइपुगे। राजस्व सचिवमा फर्कँदा नै उनलाई भावी अर्थसचिवका रुपमा हेरिएको थियो।
अर्थसचिवका रुपमा उनको चुनौती
चालु आर्थिक वर्षको बजेटको मध्यावधी समीक्षाको दुई दिनअघि सरकारले उनलाई थप जिम्मेवारी दिएको छ। बजेट कार्यान्वयन सुरु भएको ७ महिना बित्न लाग्दा अपेक्षित उपलब्धि हासिल गर्न नसकेर यतिबेला अर्थमन्त्री डा युवराज खतिवडा दबाबमा छन्। अपेक्षित खर्च नहुने र लक्षित राजस्व नउठ्ने अवस्थाबाट सरकार थलिएको छ।
सुस्त पूर्वधार विकास, सुस्त कानुन निर्माण र कर्मचारी व्यवस्थापनमा ध्यान नदिँदा कमजोर भएको अर्थ मन्त्रालयको साख जोगाउने दायित्व उनको काँधमा छ। प्रधानमन्त्री केपी शर्मा ओलीले नै आइतबार राष्ट्रिय विकास समस्या समाधान समितिको बैठकमा सरकारले गरेअनुसार उपलब्धि नभएको गुनासो गरेका थिए।
यस्तो अवस्थामा स्रोतको संयोजन, व्यवस्थापन र विन्यास गर्नुपर्ने दायित्व ढुंगानासामू छ। अर्थ मन्त्रालयको संरचनालाई आफ्नै 'स्पिड'मा अघि बढाउन सके ढुंगानाको बाँकी कार्यकाल सफल हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
