काठमाडौं- वैदेशिक रोजगार विभागका नवनियुक्त महानिर्देशक कुमार दाहालले विभागमा भइरहेका राम्रा कामहरुको बटमलाइनलाई नै निरन्तरता दिने बताएका छन्।
महानिर्देशक दाहालले नेपालको अर्थतन्त्र र आम नागरिकसँग प्रत्यक्ष सरोकार राख्ने थलो विभागका अवसर र चुनौति दुईवटै पाटाहरुलाई ध्यान दिँदै राम्रा पक्षलाई निरन्तरता दिने बताएका हुन्।
सोमबार वैदेशिक रोजगार पत्रकार समाजसँगको भेटघाट कार्यक्रममा बोल्दै महानिर्देशक दाहालले विभागमा आफूमाथि आएका अवसर र चुनौती दुवै पक्षलाई आत्मसाथ गर्ने बताए।
‘म विभागको जिम्मेवार पदमा म आएको छु। हिजोका महानिर्देशकले जुन सुशासनको बाटो बनाउन सुरु गर्नुभएको थियो, म त्यही बटमलाइनलाई आधार मानेर अगाडि बढ्छु। अझै केही कुराहरु डिजिटलाइज गर्न बाँकी छ। त्यो कामलाई पनि निरन्तरता दिन्छु‚’ महानिर्देशक दाहालले भने।
आम युवाका समस्या पहिचान गरेर अघि बढ्ने प्रतिबद्धता
देशको कुल गार्हस्थ उत्पादनमा करिब ४० प्रतिशत योगदान पुर्याउने वैदेशिक रोजगारीसँग सम्बन्धित विभाग भएकाले विभागको प्रत्यक्ष सरोकार अर्थतन्त्रसँग रहेको महानिर्देशक दाहालले बताए।
‘जहाँ पैसासँग सरोकारको काम हुन्छ त्यहाँ अवश्य विकृतिहरु हुन्छन्। यी विकृतिहरु नियाल्नका लागि थुप्रै चुनौतीहरु छन्। चुनौतीमाथि खुट्टा नचिप्ल्याई आफूलाई ब्यालेन्समा राखेर अघि बढ्छु‚’ महानिर्देशक दाहालले प्रतिबद्धता जनाए।
‘आम यूवाका समस्या पहिचान गरेर समस्या हलका लागि पहल गर्न सकियो भने विभाग एक अवसर पनि हो। समस्यामाथि आफैँ चिप्लियो भने यो चुनौती पनि हो‚’ महानिर्देशक दाहालले भने।
म्यानपावरलाई नैतिकताको दायरामा
म्यानपावरहरुले आम युवाहरुलाई वैदेशिक रोजगारीमा पठाउने जिम्मेवारी लिएर सरकारसँग सरोकार गरिराख्नुभएको छ। हामीसँग केही ऐन, कानुन, कार्यविधीभित्र समस्या होला। त्यसमाथि छलफल गरी परिमार्जन गर्न आवश्यक भए त्यसमाथि काम गर्न सकिन्छ।
तर हामी नैतिकताको दायरामा रहेर काम गर्नुपर्दछ। नीजि क्षेत्रले पनि नैतिकताको दायरालाई जोड दिनुपर्ने महानिर्देशक दाहालले जोड दिए।
शून्य लागत कार्यान्वयनमा जोड
विभागका नवनियुक्त महानिर्देशक दाहालले मलेसियालगायत खाँडीका ६ राष्ट्रमा सरकारले लागू गरेको फ्रि भिसा फ्रि टिकट कार्यान्वयनमा जोड दिने बताएका छन्।
‘फ्रि भिसा फ्रि टिकट नीति कार्यान्वयनका लागि कामदारबाट लाखौँ रकम म्यानपावरहरुले लिइराख्नुभएको छ। सबै म्यानपावरलाई ठग भन्न मिल्दैन। केही म्यानपावरहरु राम्रा पनि हुनुहुन्छ। अवैध रुपमा कामदारबाट लाखौँ रकम असुलेर १० हजारको लिखत थमाउने म्यानपावरमाथि अब कडा कारबाही हुन्छ‚’ महानिर्देशक दाहाल भन्छन्, ‘मैले सबै म्यानपावर व्यवसायीलाई अहिले नै भन्छु। उत्तरदायी भएर अगाडि बढौँ।’
कन्सल्टेन्सीमाथि कडाइ
पछिल्लो समय वैदेशिक रोजगारीका नाममा युवाहरुलाई ठगी गर्दै आएका शैक्षिक परामर्श केन्द्र (एजुकेशन कन्सल्टेन्सीहरु) माथि विभागले कडाइ गर्ने महानिर्देशक दाहालले बताए।
‘कन्सल्टेन्सीले युवाहरुबाट नयाँ नयाँ जुक्ति लगाएर ठूलो रकम ठगी गरिरहेका छन्।अझ रोजगारीका नाममा ठगी गर्ने प्रवृति बढेकाले यस्ता कन्सल्टेन्सीमाथि विभागले अब निगरानी बढाउँछ‚’ महानिर्देशक दाहाल भन्छन्।
विभागमा कर्मचारी हेरफेर
विभागमा जिम्मेवार भएर काम नगर्ने कर्मचारी हेरफेर गर्ने महानिर्देशक दाहालले बताएका छन्।
कार्यालयमा कर्मचारीले भ्रष्टाचार र आर्थिक चलखेल हुन नदिन सजग हुनुपर्नेमा महानिर्देशक दाहालले जोड दिए।
महानिर्देशक दाहालले भने, ‘आफू पनि चलखेल गर्दिनँ। विभागमा कुनै कर्मचारीबाट यस्ता कुकार्य हुँदैन भन्नेमा विश्वस्त छु। म अध्ययन गर्दैछु। विभागमा कुन कर्मचारी राख्ने कुन कर्मचारी यहाँबाट निकालेर छाँटकाँट गर्ने।’
वैदेशिक रोजगारीलाई सुरक्षित व्यवस्थित तथा मर्यादित बनाउन गन्तव्य मुलुकहरुसँग समेत छलफल गर्ने र गन्तव्य मुलुकका रोजगारदाताहरुसँग प्रत्यक्ष सम्पर्क बढाउनेतर्फ जोड दिने महानिर्देशक दाहालको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
