काठमाडौं- वाणिज्य बैंकहरूको नाफा वृद्धिदरमा अपेक्षाकृत कम भएको छ। चालु आर्थिक वर्ष (२०७६/७७)को दोस्रो त्रैमासिक अवधिमा बैंकको नाफा ७ दशमलव ६४ प्रतिशतले मात्र सुधार भएको छ। जबकि अघिल्लो वर्ष (२०७४/७५) यसै अवधिका तुलनामा गत वर्ष (२०७५/७६) ३९ दशमलव ४१ प्रतिशतले बैंकहरूको नाफामा सुधार भएको थियो।
बैंकहरूले ऋणसँगै चर्को ब्याज असुलेर नाफा आर्जन गरेको भन्दै व्यवसायीहरूले आन्दोलन गरेपछि नेपाल राष्ट्र बैंकले बैंकहरूको स्प्रेडदरमा अंकुश लगाएको थियो। व्यवसायीको विरोधका कारण राष्ट्र बैंकले ५ प्रतिशतको स्प्रेडदरलाई ४ दशमलव ५ प्रतिशत गर्दै हाल ४ दशमलव ४ प्रतिशतमा झार्न निर्देशन दिएको छ। तरलता अभावको भरपुर फाइदा उठाउँदै अघिल्ला वर्ष बैंकहरुले राम्रो नाफा आर्जन गरेका थिए।
बैंकहरूको स्प्रेडदर घट्दा नाफा वृद्धिदर घटेको हिमालयन बैंकका प्रमुख कार्यकारी अधिकृत अशोक राणाले बताए। बैंकहरूको निक्षेपसँगै कर्जा विस्तारमा सुधार देखिए पनि खुद ब्याज आम्दानीमा भने सुधार आउन नसकेको उनको भनाइ छ।
चालु आर्थिक वर्षको सुरुवाती अवस्थादेखि नै बैंकिङ प्रणालीमा थप तरलताको सिर्जना हुँदै आएको छ। यसका साथै राष्ट्र बैंकले वाणिज्य बैंकहरूलाई सम्पूर्ण स्थानीय निकायमा अनिवार्य शाखा कार्यालय खोल्न निर्देशन दिएको छ। अब वाणिज्य बैंकहरूले ८ वटा स्थानीय निकायमा मात्रै शाखा खोल्न बाँकी छ।
दुर्गममा शाखा कार्यालय खोल्नुपर्दा बैंकहरूको सञ्चालन खर्च बढ्दै आएको छ। शाखा कार्यालय स्थापना गर्दाको खर्चका साथै नयाँ कर्मचारीको भर्नाले गर्दा यस्तो खर्च बढ्दै गएको हो। अधिकांश बैंकहरूले कर्मचारीहरुको तलब बढाएका छन्। यसले पनि बैंकको खर्च बढ्दै गएकाले यसको असर नाफामा परेको हो।
पुँजी वृद्धिको दबाबले व्यवसाय विस्तारमा आक्रामक बनेका बैंकहरूको नाफामा भने ब्रेक लागेको छ। चालु आर्थिक वर्षको दोस्रो त्रैमासिक वित्तीय विवरण सार्वजनिक गर्ने २१ वटा वाणिज्य बैंकहरूले २६ अर्ब ९७ करोड रुपैयाँ नाफा आर्जन गरेका हुन्। यिनै बैंकहरूले गत वर्षको यही अवधिमा २४ अर्ब ४२ करोड रुपैयाँ नाफा आर्जन गरेका थिए। यो अपेक्षाकृत कम नै हो।
जनता बैंकलाई मर्ज गरेसँगै ग्लोबल आइएमई बैंक वृद्धि गर्ने बैंकको शीर्ष स्थानमा छ। यो बैंकले गत वर्षका तुलनामा यो वर्षको दोस्रो त्रैमासिक अवधिमा ७३ प्रतितश नाफा वृद्धि गरेको आँकडा निकालेको छ। प्रतिशेयर आम्दानीको हिसाबले भने ग्लोबल धेरै पछाडि छ।
(तलको बार चार्ट तलमाथि र दायाँबायाँ स्क्रोल गरेर हेर्न सक्नुहुनेछ)
दोस्रो धेरै नाफा गर्नेमा राष्ट्रिय वाणिज्य बैंक छ। यो बैंकले दोस्रो त्रैमाससम्म आइपुग्दा २ अर्ब ५ करोड रुपैयाँ नाफा आर्जन गरेको छ। बैंकको नाफा गत वर्षभन्दा १४ प्रतिशतले घटेको हो। यो नाफा बैंकका प्रमुख कार्यकारी अधिकृत किरण कुमार श्रेष्ठले बैंकको वार्षिकोत्सवको अवसरमा भनेको आधारमा लिइएको हो। तर बैंकले अहिलेसम्म वित्तीय विवरण सार्वजनिक गरेको छैन। नबिल बैंकले अझै वित्तीय विवरण सार्वजनिक गर्न बाँकी छ।
यसै अवधिमा ५ वटा वाणिज्य बैंकको नाफामा गिरावट आएको छ। राष्ट्रिय वाणिज्य बैंक, नेपाल इन्भेस्टमेन्ट बैंक, सिद्धार्थ बैंक, नेपाल एसबिआई बैंक र सिटिजन्स बैंकको नाफा गत वर्षको भन्दा नाफा कम छ।
सबैभन्दा धेरै नाफा सुधार गर्नेमा एनएमबी बैंकको ४७.४० प्रतिशतले बढेको छ। गत वर्ष सबैभन्दा अगाडि राष्ट्रिय वाणिज्य बैंक थियो। दोस्रो नम्बरमा नेपाल इन्भेष्टमेन्ट बैंक थियो। बैंकले एक अर्ब ९७ करोड रुपैयाँ नाफा गरेको थियो। बैंकको केही कर्जा बिग्रिए पछि बैंकको नाफामा प्रभाव पर्दै आएको छ।
वाणिज्य बैंकहरूको नाफा
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
