काठमाडौं– संस्कृति, पर्यटन तथा नागरिक उड्डयनमन्त्री योगेश भट्टराईले नेपालका विश्वसम्पदा खतरा र कालोसूचीमा नपर्ने कुरामा ढुक्क हुन आग्रह गरेका छन्। पूरातत्व विभागले आइतबार काठमाडौंमा गरेको कार्यक्रमलाई सम्बोधन गर्दै मन्त्री भट्टराईले युनेस्कोले पठाउने हरेक मोनिटरिङमा नेपाल सफल हुने पनि दाबी गरे।
नेपाल विश्व मानव सभ्यताकै केन्द्र भएको उल्लेख गर्दै उनले विश्वका जुनसुकै विश्वविद्यालयका मानव सभ्यतासम्बन्धी अध्ययन अनुसन्धानकर्ताले नेपाल आएर यहाँको संस्कृति र सभ्यताको अनुसन्धान नगरे त्यो अनुसन्धान अपुरो हुने पनि बताए।
नेपाल भ्रमण वर्ष २०२० मनाइरहेको सन्दर्भमा पर्यटकीय महत्वका हिसाबले पनि यहाँको पुरातात्विक सम्पदाको संरक्षण र प्रवद्र्धनमा सरकार लागिरहेको उनले बताए।
उनले लुम्बिनीमा व्यापार गर्न नपाइने भन्दै परोपकारी भावनाका साथ खुलेका गुम्बामा व्यापार भएको पाइएमा कारबाही गर्ने बताए। मन्त्री भट्टराईले आगामी दुई वर्षभित्र विश्व समुदाय माझ २०७२ को महाभूकम्पले क्षति भएका सबै पुरातात्विक एवं साँस्कृतिक सम्पदाको काम सम्पन्न भएको घोषणा गरिने पनि जानकारी दिए। उनले भूकम्पले क्षति भएका सम्पदाको ६० प्रतिशत काम सकिएको र आगामी दुई वर्षमा बाँकी सबै काम सम्पन्न हुने बताए ।
मन्त्री भट्टराईले उपत्यकाका सात वटै विश्वसम्पदा स्थललाई जोड्ने गरि चाडै साइकल लेनको निर्माण गरिने तथा भक्तपुर, पाटन र वसन्तपुर दरबारलाई रातिसमेत भ्रमण गर्न सकिने गरि ‘भ्याली वाइ नाइट’ को काम भइरहेको बताए। लाइटिङ जडानको काम सकिनासाथ यी सम्पदामा रात्रिकालीन भ्रमणको व्यवस्था हुने उनले बताए। नेपालका कतिपय सम्पदाको अरु मुलुकले नक्कल गरेर गलत प्रचार गरेको सन्दर्भ उल्लेख गर्दै मन्त्री भट्टराईले भने– ‘सम्पदा बनावटी हुँदैन। यो रेडियो, घडी बनाएजस्तो होइन अरु कसैले उत्पादन गरेर लैजान पाउँदैन।’
कार्यक्रममा पुरातत्व विभागका महानिर्देशक दामोदर गौतमले भूकम्पबाट क्षतिग्रस्त सम्पदाको अहिलेको अवस्थाबारे जानकारी गराएका थिए। भूकम्पले ३१ जिल्लामा ९२० वटा सम्पदा क्षति भएकोमा ४०० वटा सम्पदा पुनर्निमाण सम्पन्न भएको त्यसअवसरमा जानकारी दिइयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
