काठमाडौं- मंगलबार सामाजिक सञ्जालमा नेकपा समर्थित कार्यकर्ताहरुले अर्थ मन्त्रालयको एउटा पत्र सार्वजनिक गरे। अर्थ मन्त्रालयले महालेखा नियन्त्रक कार्याललाई लेखेको त्यो पत्रमा पूर्वी नेपालमा पर्ने मुलघाटदेखि ओलानचुङगोला जोड्ने सडकका लागि रकमान्तर निकासाका लागि स्वीकृति दिएको उल्लेख थियो।
अर्थ मन्त्रालयले विकास निर्माण, आर्थिक सहयता वितरण तथा अन्य भैपरी आउने कामका लागि चालु आर्थिक वर्यमा गरेको रकमान्तर तथा निकासीको विवरण भदौयता सार्वजनिक गरेको छैन। तर यो पत्रले के देखाउँछ भने मन्त्रालयबाट पूर्वाधार विकास आयोजना तथा अन्य कामका लागि रकमान्तर र निकासा गइरहेको छ।
सरकारी हिसाब राख्ने महालेखा नियन्त्रक कार्यालयका अधिकारीहरु रकमान्तर र निकासाका पत्रहरु आइरहेको बताउँछन्। अर्थ मन्त्रालयका अनुसार भौतिक पूर्वाधार तथा यातायात मन्त्रालयको पुँजीगत बजेट शीर्षक नं ३३७०१११८४ बाट रकम झिकेर आयोजनालाई बजेट दिइएको छ। नेपाल सरकारको स्रोतबाट नै दायित्व बहन गर्ने गरी रकमान्तरको निर्णय अर्थले गरेको छ।
यो त सार्वजनिक भएको रकम मात्रै हो। अर्थ मन्त्रालयको बजेट तथा कार्यक्रम महाशाखा स्रोतले रकमान्तर निरन्तर भइरहेको जानकारी दिएको छ। 'नियमितरुपमा रकमान्तर भइरहेको छ,' अर्थ मन्त्रालय स्रोतले भन्यो।
अर्थ मन्त्रालयले तेह्रौँ दक्षिण एसियाली खेलकुद आयोजना गर्नका लागि पनि ठूलो रकम रकमान्तर गरिदिएको छ। सार्वजनिक चासोको यो विषय पनि मन्त्रालयले अहिलेसम्म बाहिर ल्याएको छैन। 'यसमा ठूलो रकम रकमान्तर भएर गएको छ,' स्रोतले भन्यो, 'यसबाहेक चिनियाँ राष्ट्रपतिको नेपाल भ्रमणको तयारी, उच्च पदस्थको विदेश भ्रमण तथा अन्य आर्थिक दायित्व बहनका लागि रकमान्तर गरिएको छ।'
रकमान्तर गलत हो?
सार्वजनिक निकायलाई विनियोजित बजेटबाट काम गर्न अपुग भएमा अन्य आयोजना तथा कार्यक्रममा विनियोजित बजेट उपलब्ध गराउनुलाई नै रकमान्तर मानिन्छ। अर्थ मन्त्रालयले वार्षिक बजेट एवं विकासका कार्यक्रमभित्रैबाट रकमान्तर गर्ने गरेको छ।
'रकमान्तर नराम्रो त होइन, तर यसले बजेट यथार्थपरक नबनेको अवस्था दर्शाउँछ,' अर्थ मन्त्रालयका एक अधिकारीले भने। बजेट अनुमान तथा कार्यान्वयन यथार्थपरक नहुँदा रकमान्तर गर्नुपर्ने अवस्था आउँछ।
अर्थ मन्त्रालयले बजेट अनुशासन कायम गर्दै रकमान्तर कडाइ गर्ने दावी गर्दै आएको थियो। तर आफ्नै प्रतिवद्धता विपरित मन्त्रालयले रकमान्तरको स्वीकृति दिइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
