काठमाडौं- कमसल निर्माण सामग्री प्रयोग गरी कमजोर संरचना निर्माण गर्ने निर्माण व्यवसायीलाई कालोसूचीमा राखेर कारबाही गर्नु सांसदहरूले माग गरेका छन्।
संघीय संसद् प्रतिनिधिसभा अन्तर्गतको विकास तथा प्रविधि समितिको सोमबारको बैठकमा सांसद्हरूले यस्तो माग गरेका हुन्। निर्माण व्यववसायीहरुसँग छलफल गर्दै सांसदहरूले गुणस्तरहीन निर्माण सामाग्रीको प्रयोग गर्ने निर्माण व्यवसायीलाई कालोसूचीमा राखेर कारबाही गर्नु उचित भएको बताएका हुन्।
समिति सभापति कल्याणीकुमारी खड्काले कमसल सामग्री पर्न जाने भन्ने व्यवसायीका कुरा मान्न नसकिने बताउँदै हालसम्मको स्थिति हेर्दा व्यवसायीहरूले मिलेमतोमा कमसल निर्माण सामग्री प्रयोग गर्ने गरेको पाइएको बताएकी थिइन्। उनले त्यस्ता निर्माण व्यवसायीलाई कालोसूचीमा राख्ने व्यवस्था उचित भएको बताउएकी हुन्।
उनले जनप्रतिनिधि नै ठेकेदार भएका कारण मिलेमतो बढी हुने गरेको बताए। ‘जनप्रतिनिधिलाई ठेकेदार बनाउन पाइँदैन, यो प्रष्ट कुरा हो। कोही 'इन्भल्भ' छ भने उसले पनि अब ठेकेदारी गर्नुहुँदैन, ठेकेदारी गर्ने हो भने ठेकेदारी नै गर्नुपर्छ अथवा निर्माण व्यवसायी नै हुनुपर्छ,’ समिति सभापति खड्काको धारणा थियो।
सांसद गणेशकुमार पहाडीले सम्झौता भएपछि कुनैपनि काम समयमा सम्पन्न नगर्ने निर्माण व्यवसायीलाई पनि कारबाही गर्नुपर्ने बताउए। उनले कुनैपनि बाहनामा काम नसक्ने प्रवृतिको अन्त्य गर्नका लागि पनि कारबाही गर्नुपर्नेमा जोड दिए।
‘सम्झौता भइसकेपछि कुनैपनि काम सेड्युलअनुसार काम नभए निर्ममतापूर्वक कारबाहीमा जानुपर्छ। यसमा निर्माण व्यवसायीहरुपनि तयार हुनुपर्छ,’ उनले भने।
बैठकमा निर्माण व्यवसायी महासंघका अध्यक्ष रवि सिंहले निर्माण व्यवसायीका समस्याको विषयमा जानकारी गराए। उनले कतिपय अवस्थामा निर्माण व्यवसायीको धारौटी समेत जफत गरी कालो सूचीमा राख्ने र कारबाही गर्ने नीतिगत व्यवस्थाका कारण निर्माण कार्य प्रभावित हुँदै आएको बताए।
समितिले निर्माण क्षेत्रका समस्या र चुनौतीका विषयमा जानकारी लिन मंगलबार नेपाल निर्माण व्यवसायी महासंघका पदाधिकारीहरुसँग छलफल गरेको हो। पछिल्लो समय कमजोर संरचनाहरु बन्ने क्रम बढ्दै गएको र निर्माण व्यवसायीहरु पनि सार्वजनिक खरिद ऐन प्रति असन्तुष्ट रहेकाबेला समितिले छलफललाई तीव्रता दिएको हो। समितिले सोमबार पनि निर्माणाधीन पुलको अवस्थाको विषयमा भौतिक पूर्वाधार तथा यातायात मन्त्रालय र सडक विभागसँग छलफल गरेको थियो।
(फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
