काठमाडौं- जापानी कार उत्पादक कम्पनी टोयोटाको विलासी ब्रान्ड लेक्ससका कार भारतमै एसेम्बल हुने भएको छ। भारतीय विलासी कार बजारको ‘स्पेस’लाई उपयोग गर्ने लक्ष्यसहित लेक्ससको एसेम्बल प्लान्ट स्थापना गर्न लागेको हो।
लेक्ससले भारतमा एसेम्बल प्लान्ट स्थापनाका लागि १ करोड अमेरिकी डलर लगानी गर्ने भएको छ। लेक्ससले जर्मन विलासी कार मर्सिडिज, बिएमडब्लू, अउडीलगायतसँग प्रतिस्पर्धा गर्नेछ।
लेक्ससले भारतको बैंगलोरमा प्लान्ट सेटअप गरिसकेको छ। उक्त एसेम्बली प्लान्टबाट सुरुमा लेक्ससको इएस सेडान कार उत्पादन हुनेछ। त्यस्तै एसेम्बलको पाइपलाइनमा रहेको अर्को कार हो एनएक्स एसयुभी। हाल भारतीय बजारमा लेक्ससका आधा दर्जन मोडल बिक्री हुँदै आएका छन्। यी कारको मूल्य ५८.२ लाखदेखि २ करोड ३२ लाख भारुसम्म रहेको छ।
भारतमा पूर्ण रुपमा बनेर आयात हुने सवारीमा उच्च कर भएकाले सबैजसो सवारी उत्पादकले भारतमै एसेम्बल प्लान्ट स्थापना गरेका छन्। त्यसैले भारतमै एसेम्बल भएपछि लेक्ससको कार सस्तो समेत हुनेछ।
हाल भारतमा लेक्ससको डिलर नेटवर्क समेत न्यून रहेको छ। मुम्बई, दिल्ली, गुणगाउँ र बैंगलोरमा मात्र डिलर रहेको छ। भारतीय प्लान्टबाट सवारी उत्पादन हुन थालेपछि डिलरसमेत विस्तार हुने कम्पनीले जनाएको छ।
भारतमा २०१९ मा विलासी कारको बजार ३५ हजारवटाको थियो। जसमा लेक्ससले करिब ६ सयवटा सवारी बिक्री गरेको तथ्यांक ‘द इकोनोमिक्स टाइम्स’ले लेखेको छ। जसमा लेक्ससको बजार हिस्सा १ देखि २ प्रतिशत रहेको छ।
लेक्ससका कार नेपाली बजारमा समेत उपलब्ध छन्। टोयोटाको नेपालका लागि आधिकारिक बिक्रेता युनाइटेड ट्रेडर्स सिन्डिकेट प्रालिले नै लेक्ससका सवारी उपलब्ध गराउँदै आएको छ। तुलनात्मक रुपमा महँगो रहेकाले हाल लेक्ससका कार सानो संख्यामा बिक्री हुँदै आएको छ। भारतमा एसेम्बल भएर नेपाल ल्याउँदा लेक्ससका कार सस्तो हुने अनुमान गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
