काठमाडौं- चार युवाबाट लाखौँ रकम असुली गरी उन्मुक्तिका लागि एक म्यानपावर सञ्चालकले गरेको बदमासी खुलासा भएको छ।
गल्फ रिक्रुटमेन्ट म्यानपावर सञ्चालक (हाल साधना म्यानपावरसँग मर्जर भइसकेको) कृष्णबहादुर तामाङले यस्तो बदमासी गरेको सार्वजनिक भएको हो।
आफ्नो म्यानपावरबाट चेक रिपब्लिकमा प्याकिङ काममा पठाइदिन्छु भन्दै ४ युवालाई ठगी गरी उन्मुक्तिका लागि तामाङले संस्थागत ठगीलाई व्यक्तिगत ठगीमा परिणत गरिदिएका हुन्।
यसरी खुल्यो घटना
म्यानपावरबाट ठगिएका पीडितले वैदेशिक रोजगार विभागमा उजुरी दिएका थिए।
धरौटी रकम कटौतीको प्रक्रियामा जान ७ दिन मात्रै म्याद बाँकी थियो।
धरौटी रकम कटौतीमा जानुअघि पीडितको माग र प्रमाणका आधारमा क्षतिपूर्ति दिनु नपर्ने भए लिखित जवाफसहित विभागमा उपस्थित हुन गत मंसिर २ गते विभागले पत्र काटेको थियो।
सो पत्रमा लेखिएको छ, ‘विक्रम कार्कीलगायत ४ जना पीडितलाई वैदेशिक रोजगारीमा चेक रिपब्लिक पठाउने भनी ११ लाख ५० हजार रकम लिई लिखितसमेत गरी वैदेशिक रोजगारीमा नपठाएकाले पीडितको समस्या समाधान गर्न तोकिएको ३ दिने र २४ घण्टे पत्रद्वारा जानकारी गराइएकोमा हालसम्म पीडितको समस्या पूर्ण रुपमा समाधान हुन नसकेकाले प्रालिको धरौटी कट्टा गरी पीडितको माग र प्रमाणका आधारमा क्षतिपूर्ति दिनु नपर्ने आधार प्रमाणका कारण र कागजात भए सो समेत लिई (७) दिन भित्र विभागमा उपस्थित हुन जानकारी गराईन्छ।’
.jpg)
सो पत्रपछि म्यानपावर सञ्चालक कृष्णबहादुर तामाङ विभागमा उपस्थित भई ती युवासँग गरिएको कारोबार म्यानपावर तथा शेयर लगानीकर्तासँग सम्बन्धित नभएकाले पीडितको क्षतिपूर्ति सबै आफैँ व्यहोर्ने हुँदा धरौटीबाट नकटाउन सनाखत गरे। त्यसपछि उनी सम्पर्कविहीन छन्।
धरौटी काटेर भएपछि आफूले बुझाएको रकम फिर्ता पाइन्छ भन्ने झिनो आश बोकेका ती युवा म्यानपावर सञ्चालक फरार भएसँगै थप चिन्तामा छन्।
‘म्यानपावरविरुद्ध हामीले हालेको उजुरी हामीलाई थाहै नदिई व्यक्तिगत उजुरी भएछ, हामीले म्यानपावरमै गएर रकम बुझाएको हो। त्यसलाई पनि व्यक्तिगत भन्न मिल्ने रहेछ। अब हाम्रो पैसा कसले दिन्छ?,' पीडित विक्रम कार्कीले नेपाल लाइभसँग भने।
विभागको जवाफ- रकम बुझाउने बेला हामीलाई सोध्या थियो र?
‘मर्जर भएको साधना म्यानपावरमा जाँदा जाँ जान्छस् जा भन्छ। वैदेशिक रोजगार विभागमा पुग्यो पैसा बुझाउने बेलामा हामीलाई सोध्याथिस् र भनेर विभागका कर्मचारीले ठाडो जवाफ फर्काउँछन्। हामी कहाँ जाने?,’ काठमाडौं टेकुका अजय परियारले प्रश्न गरे।
अधिकांश पीडितको गुनासो अजयको जस्तै छ, 'वैदेशिक रोजगारीका क्रममा साहुबाट ऋण लिएको रकम कि त म्यानपावरले खाइदिन्छ कि दलालले।'
त्यसपछि न्यायको झिनो आश बोकेर विभाग पुगेका अधिकांश पीडितलाई कर्मचारीले दिने जवाफ यस्तै हुने गरेको अधिकांश पीडित पक्षको गुनासो छ। 'अब हामी कहाँ जाने,' पीडित ती युवाले प्रश्न गरे।
यसरी ठगिएका थिए युवा
चेक रिपब्लिक मुलुकमा मासिक ८० हजार नेपाली रुपैयाँ कमाइ हुने प्याकिङ कामका लागि आफ्नो म्यानपावरमा डिमान्ड आएको म्यानपावर सञ्चालक तामाङले ओखलढुंगा चम्पादेवी गाउँपालिकाका टेकबहादुर कार्कीलाई सुनाउँछन्। तामाङ चिनजानकै व्यक्ति भएकाले टेकबहादुरले सजिलै विश्वास गरे।
राम्रो काम र कमाइ भएपछि उनी आफ्ना ३ जना छोरा (विक्रम कार्की, विष्णुबहादुर कार्की र सन्तोष कार्की) रिपब्लिक मुलकलाई पठाउन तयार हुन्छन्। उनीहरुसँगै विक्रमका साथी टेकुका अजय परियार पनि रिपब्लिक जान तयार भए।
सुरुमा म्यानपावरले भिसा प्रोसेसिङका लागि भन्दै जनही १ लाख माग्यो। उनीहरू सो रकम बुझाए।
दोस्रो पटक वर्क पर्मिट तथा अन्तर्वार्ताका लागि भन्दै पुनः ४ जनाबाट ११ लाख ५० हजार रकम माग गर्यो। राम्रो कमाई हुने भएपछि उनीहरुले सो रकम पनि दिए।
रिपब्लिक मुलुकको दूतावास नेपालमा नभएकाले भारत हुँदै जानु पर्ने सुनाइयो उनीहरुलाई। काठमाडौंबाट उनीहरू दिल्ली पुगे।
.jpg)
भारतमा पुगेर १५ दिन बसे। भिसा नआएको भनिएपछि उनीहरु फर्किए।
विष्णुबहादुर कार्की भने ३ पटक भारत पुगेर फर्किएका युवा हुन्। उनको सबै डकुमेन्ट नक्कली भएको दूतावासले बताएपछि बल्ल आफूहरू ठगिएको थाहा भयो। त्यसपछि म्यानपावरको कार्यालयमा पुग्दा म्यानपावर बन्द थियो। सञ्चालकलाई फोन गर्दा सम्पर्क हुन सकेन।
उजुरी गर्नका लागि बुझाएको रकमको कुनै प्रमाण थिएन उनीहरुसँग।
गत साउनमा म्यानपावर सञ्चालक फेला पारी रिपब्लिक मुलुक पठाउनका लागि भन्दै आफूहरुबाट पहिलो चरणमा ४ लाख र दोस्रो चरणमा ११ लाख ५० हजार गरी १५ लाख ५० हजार रकम लिएको लिखत तयार गरे। सोही लिखतका आधारमा गत साउन १२ गते उनीहरूले विभागमा म्यानपावर उपर उजुरी दिएका थिए।
उजुरी दिएको ६ महिना बितिसक्दा पनि पीडितले क्षतिपूर्ति पाउन सकेका छैनन्।
म्यानपावरले बदमासी गरी व्यक्तिगत ठगी भएको सनाखत गरी फरार हुँदा पीडितहरूले क्षतिपूर्ति पाउने समय लम्बिएको हो।
.jpg)
वैदेशिक रोजगार विभागका महानिर्देशक भीष्मकुमार भुसालसँग यस सम्बन्धमा नेपाल लाइभले प्रतिक्रिया लिँदा आफूले फाइल नै नहेरेको प्रतिक्रिया दिए। यस विषयमा उनले थप कुराकानी गर्न चाहेनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
