काठमाडौं- नेपाल व्यवस्थापन संघको कार्यसमितिको लागि १६ जनाले मनोनयन दर्ता गराएका छन्। माघ २४ गते हुने निर्वाचनका लागि व्यक्तिगत सदश्यबाट १६ जना इन्छुक देखिएका हुन्। संघको कार्यसमितिमा १७ जना हुने प्रावधान छ।
साधारण सदस्यको तर्फबाट इन्द्रकुमार श्रेष्ठ, डा. राजन थापा, डा. रमेशकुमार भण्डारी, आशा राना अधिकारी, सरोजकुमार प्रधान, सुजनकुमार आचार्य, मोहनराज ओझा, किरणकुमार श्रेष्ठ, धर्मनन्द अवस्थी, युगराज कर्डेल शर्मा, अजयकुमार मिश्र, सुमन पोखरेल, हेमाकुमारी अधिकारी, मिलन गुरुङ, मनिस झा र अनु जोशी रहेका छन्। संस्थागत सदस्यका रुपमा आउन सक्नेले पनि व्यक्तिगत रुपमा निर्वाचनमा भाग लिएका छन्।
संस्था धेरै कमजोर भएपछि पछिल्लो पुस्तालाई भित्र्याउने उद्देश्यले उनीहरु निर्वाचनमा जाने भएका हुन्। सबै उही पुरानै व्यक्तिले संस्था चलाउनाले संस्थाप्रतिको विश्वास कम हुन थालेपछि नयाँ योग्य व्यक्ति ल्याउने पहल सुरु भएको उम्मेदवारी घोषणा गरेका मनिस झाले बताए।
कुनै समय संघको २५ सयभन्दा धेरै सदस्य थिए। तर संस्थाले राम्रो काम गर्न नसकेपछि यस वर्ष जम्मा १ सय ७६ जनाले मात्रै व्यक्तिगत रुपमा सदस्यता नविकरण गराएका छन्। त्यस्तै संस्थागत रुपमा ९७ वटा सदस्य संस्था रहेका छन्।
आजीवन सदस्यको रुपमा भने ८ सय ९१ जना रहेका छन्।
उक्त १६ जनाबाट ११ जना निर्वाचित हुनेछन्। बाँकी ६ जना संस्थागत सदस्यहरुबाट कार्यसमितिमा प्रतिनिधि हुने व्यवस्था छ। साथै कार्यसमितिमा एक जना सदस्य सचिव हुने व्यवस्था छ। अहिलेसम्मको अभ्यासअनुसार नेपाल राष्ट्र बैंकले उपाध्यक्ष पाउँदै आएको छ।
तर अध्यक्ष र महासचिवमा संस्थागत सदस्यहरुलाई राखिएको छैन। संस्थाबाट प्रतिनिधि भएर आउँदा भोलीका दिनमा संस्थाबाट हटेको अवस्थामा अप्ठ्यारो पर्ने भएकाले उक्त दुई पदमा व्यक्तिगततर्फबाट निर्वाचित गर्ने प्रावधान छ।
२०३७ सालमा स्थापना भएको संघले स्थापनाकालदेखि नै तालिम, अध्ययन र अनुसन्धान, पूर्व बजेट छलफल, पोष्ट बजेट छलफल, मौद्रिक नीतिमा छलफलजस्ता कार्यक्रम गर्दै आएको छ।
धेरै राम्रा व्यक्तिहरु अध्यक्ष भएको यो संस्था पछिल्लो समय सुस्त बन्दै आएको छ। संस्था सुस्ताउदै गर्दा सदस्यता नविकरण गर्नेको संख्या पनि घट्न गएको हो।
संघले म्यानेजमेन्ट डेभलपमेन्ट सेन्टर र म्यानेजमेन्ट डेभलपमेन्ट क्याम्पस सञ्चालन गरिरहेको छ। यसले केही हदसम्म संस्थालाई अगाडि बढाउन सकेको छ।
आगामी दिनमा संघलाई अझ सशक्त ढङ्गले अगाडि बढाउन नयाँ व्यक्तिहरु आउनुपर्ने झाको तर्क छ। अवकासको जीवन बिताउन आउने प्रवृत्तिले धेरै अगाडि बढ्न नसकेको संस्थाप्रति नयाँ नयाँ व्यक्तिहरुले आउन रुचाइरहेका छन्।
राष्ट्रिय वाणिज्य बैंकका प्रमुख कार्यकारी किरणकुमार श्रेष्ठ संस्थागत रुपमा प्रतिनिधी नभई व्यक्तिगत रुपमा निर्वाचनमा होमिएका छन्।
त्यस्तै आइएमईका सुमन शर्माले पनि व्यक्तिगत रुपमा उमेद्वारी दिएका छन्। यसले संस्थालाई थप बलियो बनाउने विश्वास लिइएको छ।
अहिलेसम्मको सहमतिअनुसार किरणकुमार श्रेष्ठलाई अध्यक्ष बनाउने चर्चा छ। तर १७ जनाको कार्यसमिति निर्वाचित भएपछि मात्रै उनीहरुले अध्यक्ष‚ उपाध्यक्ष चयन गर्नेछन्। निर्वाचनका लागि मनोनयन गर्ने अन्तिम दिन बिहिबारसम्म तोकिएको थियो।
माघ २४ गते इलेक्ट्रोनिक्स भोटिङ हुने व्यवस्था गरिएको छ। माघ २५ गते निर्वाचित हुनेहरुबाट प्रबन्ध समितिको पदाधिकारीहरको निर्वाचन गर्ने कार्यक्रम तय गरिएको छ। मतदान म्यारियट होटलमा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232974.jpg)
-1786602170.png)
