काठमाडौं- राष्ट्रिय सभामा रिक्त पदका लागि सातै प्रदेश मतदान सुरु भएको छ। बिहान १० बजे सुरु भएको मतदान दिउँसो ४ बजे समापन हुनेछ।
निर्वाचन आयोगले बुधबार सार्वजनिक गरेको तालिका अनुसार प्रदेश १ मा विराटनगर महानगरपालिकाको वीरेन्द्र सभागृहमा मतदान सुरु भएको हो।
प्रदेश २ मा जनकपुर उपमहानगरपालिकाको महेन्द्र नारायणनिधि स्मृति भवन, बागमती प्रदेशमा ललितपुर महानगरपालिका ४ वडासमितिको भवन, गण्डकी प्रदेशको जिल्ला निर्वाचन कार्यालय कास्कीमा मतदान सुरु भएको जानकारी आयोगले दिएको हो।
प्रदेश ५ को घोराही उपमहानगरपालिकाको कर्मचारी मिलन केन्द्रको भवन, कर्णाली प्रदेशको जिल्ला निर्वाचन कार्यालय सुर्खेतमा र सुदूरपश्चिम प्रदेशको सिलगढी नगरपालिकाको पद्म पब्लिक मुक्तिनारायण उच्च माध्यमिक विद्यालयमा केन्द्र तोकिएको छ। यी मतदान केन्द्रमा पनि मतदान सुरु भएको छ।
प्रदेश १ मा प्रदेश सदस्य र स्थानीय तहका प्रमुख/उपप्रमुख गरी ३६७, प्रदेश २ मा २७२, बागमती प्रदेशमा ३४८, गण्डकीमा २३० मतदाता छन्। त्यसैगरी, प्रदेश ५ मा ३०५, कर्णालीमा १९८ र सुदुरपश्चिममा २२९ मतदाता छन्।
राष्ट्रियसभामा रिक्त १८ जनाका लागि निर्वाचन भएको हो। एक पदमा चाहिँ सरकारको सिफारिसमा राष्ट्रपतिले मनोनित गर्नेछिन्। प्रदेश सभा सदस्यको मतभार ४८ र स्थानीय तहका प्रमुख/उप प्रमुखको मतभार १८ हुन्छ। १८ सदस्यका लागि ४५ जनाले उम्मेदवारी दिएका छन्।
पार्टीहरूसँग छलफल गरी सकेसम्म बिहीबार नै नतिजा सार्वजनिक गर्ने तयारी निर्वाचन आयोगले गरेको छ।
नेकपाले इन्दु गौतम, देवेन्द्र दाहाल, गोपी अछामी, तुलसा दाहाल राधेश्याम पासवानलाई उम्मेदवार बनाएको छ। यस्तै गंगा बेल्वासे, डा. बेदुराम भुसाल, भगवती न्यौपाने, नारायणकाजी श्रेष्ठ, विमला घिमिरे गोपाल भट्टराई, जगप्रसाद शर्मा, सुमित्रा बिसी, मायाप्रसाद आचार्य, तारामान स्वाँर र शारदा भट्ट आज हुने निर्वाचनमा सत्तारुढ नेकपाबाट भिड्दैछन्।
प्रमुख प्रतिपक्षी दल कांग्रेसबाट निरबहादुर विश्वकर्मा, मिना पुलामी मगर, राजेन्द्र घिमिरे, नगिना यादव, भोला पन्जियार उम्मेदवार बनेका छन्। त्यस्तै, छलीकुमारी शर्मा उपाध्याय, हरिशरण श्रेष्ठ, सूर्यप्रसाद रेग्मी, विमला गौचन, बालकृष्ण पाण्डे, गिरिजा न्यौपाने , मेराज हलवाई उम्मेदवार बनेका छन्। सावित्री पौडेल, डिल्लीराम पाठक तुलसी देवकोटा र प्रताप ठगुन्ना पनि राष्ट्रियसभाको निर्वाचनमा प्रतिस्पर्धा गर्दैछन्।
प्रदेश २ मा कांग्रेस र समाजवादी पार्टीको गठबन्धन बनेको छ। सत्तारुढ दलसँग प्रदेश २ मा गठबन्धन बनाएको राजपाले प्रदेश २ मा मृगेन्द्रकुमार सिंह यादव र शेखरकुमार सिंहलाई उम्मेदवार बनाएको छ।
नेकपाले प्रदेश २ मा राजपासँग गठबन्धन गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
